Matiyu 27

Be kwuznennu Paịleti Jizọsi

(Mak 15:1; Luk 23:1,2; Jọn 18:28-32)

1N'ọnu ọsisi, kpakara ele risi arịohna nụ ele okno badnụ ele Ju gbarụ iznuznu, kpebi o gbu Jizọsi. 2Be kne a eriri, duru a zne, gweru a nyewhete n'aka Paịleti nye nẹechi.

Ẹnwu Judasị

(Ẹrnu 1:18,19)

3Nga Judasị nye reru a whnụrnu nụ be kperu Jizọsi ikpe ẹnwu, marnụhnini mernu a k'agịda, ọ chịhnalanu ele risi arịohna nụ ele okno badnụ nri siliva ẹto wam, 4kaa, “M mmehiele m nụ ogweru ọvnarna nye ikpe mána resi anụ.”

Be kanụ a, “Ndaa ke gbasịri aị? Kị bụ mkpa ị.” 5Judasị tụsa ịwai wam nụ rime Ọro Nsọ Chiokike, whọga, kpọgbu ẹhni a.

6Ele risi arịohna gweru kpakara ịwai wam, kaa, “O megidnernu iwu aị o yisi ịwai ka nụ nhne be bịta ịwai n'Ọro Nsọ Chiokike, kwnornu nụ ọ bụ ịwai ọvnarna.” 7Be kpebi o gweru ịwai wam zụ ẹli ele kpụ ite hne be jeeli ele izne. 8Ka kpayarụ be nookwu a Ẹli Ọvnarna dụ tna. 9Nhne ka mernu ma nhne Jerimaya nye ọwhnurninya kwuru mezu,

“Be gweru

nri siliva ẹto

bụ ọnu ahịa

ele Izirẹli whnụrnu ọnu a,

10be gweru a zụya ẹli ele ọkpu ite,

lele kpa Nyenwe aị nyernu m n'iwu.”

Jizọsi gwuzo nụ ruwhnu Paịleti

(Mak 15:2-5; Luk 23:3-5; Jọn 18:33-38)

11Kọvu nụ Jizọsi gwuzo nụ ruwhnu nye nẹechi ẹchi, nye ọchichi wam sịkwa a, “Ị bụ Eze ele Ju?”

Jizọsi sarụ a, “Owe! Jị n'iwhuru i karụ kpam.”

12Nga ele risi arịohna nụ ele okno badnụ noobno a nhne, ọ sála be nhne ọbula. 13Paịleti sịkwa a, “Ị nụ́na kpakara nhne be noobno i?” 14Kọvu nụ Jizọsi sála a ọka ọbula, ke mernu o gbagwojiri nye ọchichi anya k'agịda.

Be marnụ Jizọsi ikpe ẹnwu

(Mak 15:6-15; Luk 23:13-25; Jọn 18:39—19:16)

15N'Iriri Ọgawhe ọbula, nye nẹechi ẹchi nẹesigbasinu be otu nye ikelu be rịoru a. 16Be nwernu otu nye ọjo ke ọhna marnụ zị n'ọro ikelu be nookwu Barabasị. 17Nga igbudu badnụ wam gbakọru, Paịleti sịkwa be, “Ndaa nye anụ pioru me sịgbasinu anụ, Barabasị#27:17 Barabasị: Agwna ọkwukwo kwuru Jizọsi Barabasị sọbu Jizọsi, nye be kwu Karaịsi?” 18Paịleti kwuru ka kwnornu nụ ọ magwụ nụ be kwuyannụ a Jizọsi kwnornu ọwho-anya.

19Kpa Paịleti dazịri nụ ngadna ikpe a, nnwerne a ziznenu a izi, kaa, “Aka ị zị́ nụ nhne gbasịri nye mee mma wam, kwnornu nụ m tarụ m agịda awhnụwhnu nụ mbọro tna kwnornu a.”

20Kọvu nụ ele risi arịohna nụ ele okno badnụ sigidnernu igbudu ele badnụ wam be rịo a Barabasị, gbu Jizọsi.

21Paịleti sịkwa be, “Ndaa nye anụ pioru me sịgbasinu anụ n'ẹhni badnụ lawụru ka?”

Be kaa, “Barabasị.”

22Ọ sịkwa be, “Kịni bụ nhne anụ pioru me mee Jizọsi, nye be kwu Karaịsi?”

Kpakara be siwama, “Kpọgidne a n'ọgba.”

23Paịleti sịkwa, “Kịni mernu? Kịni bụ nhne ọjo ke o mernu?”

Be siwama okokoba ke kakwo, kaa, “Kpọgidne a n'ọgba.”

24Nga Paịleti whnụrnu nụ o nwée rikne mee nhne ọbula, kọvu agịda ọgbugbo dnarnụ, o gweru mini kwọ aka a lawụru nụ ruwhnu kpakara be, kaa, “Aka m zị rịchna n'ọvnarna nwerukna ka, anụ n'iwhuru anụ magwụ nhne gbasịri a.”

25Kpakara be karụ, “Ọvnarna a zị nụ risi aị, zị masị nụ risi rụmu aị.”

26Paịleti sịgbasinu be Barabasị. Nga ọ pnịarnu Jizọsi nhne, o gweru a nyewhete be ma be kpọgidne a n'ọgba.

Ele ọgwnu kparịri Jizọsi

(Mak 15:16-20; Jọn 19:2,3)

27Ele ọgwnu nye ọchichi duru Jizọsi zne n'ọbna ele ọgwnu hne kpakara odobiri ele ọgwnu gbarụ a gburugburu. 28Be tụma a iwo a, wosi a iwo ihie ihie. 29Be kpa okpu igwnu, kpusi a nụ risi, nyee a mkpara n'akarikwnunga, gbunu a mpnerne ọchi nụ ruwhnu a, kparị a, be kaa, “A bekwulem jị, Eze ele Ju.” 30Be gbụ a ọnu-mini, gweru mkpara wam nẹeli a nụ risi. 31Nga be kparịkworu a, be tụma a iwo wam, wosi a kpakara iwo a, duru a zne ma be kpọgidne a n'ọgba.

Be kpọgidnernu Jizọsi n'ọgba

(Mak 15:21-32; Luk 23:26-43; Jọn 19:17-27)

32Nga be whụyaru, be whnụrnu otu nwerukna Sirini, rẹwhna a bụ Saịmoni, be sigidne a ma o vuru ọgba a sno be.

33Nga be vaduru hne be kwu Gọlugota, ke bụ “Hne Okpokoro Risi,” 34be nyee Jizọsi manya be gwarụ nhne lu nlulu. Kọvu nga Jizọsi ratụru a riro, o kwéle ọ nwọ a. 35Be kpọgidne a n'ọgba, ele ọgwnu ke iwo a n'esilawụru be nga be vukworu ọgbanuchi. #27:35 Agwna ọkwukwo kwuru: Be mernu ka ma nhne be kwuru hite n'ọnu nye ọwhnurninya mezu, “Be keri iwo m n'esilawụru be, gweru iwo m vu ọgbanuchi.” 36Be dazịri ẹli neese a. 37Be bịtaru n'olu risi a nhne be bnornu a, “Ka bụ Jizọsi, Eze ele Ju.” 38Be kpọgidnernu ele buznu lawụru nụ Jizọsi n'olu ọgba, otu badnụ n'akarikwnunga a, nye ke berere n'akarita a. 39Ele naagawhe naakaja a, neewhnuwhne risi, 40be kaa, “Jị nye naakwnadna Ọro Nsọ Chiokike, wu a n'ọbochi ẹto, znọhia ẹhni ị. Ọ bụru nụ ị bụ Nnwọ Chiokike, hi n'olu ọgba hiedna.”

41Ọ bụ masị kpa ele risi arịohna nụ ele zni iwu nụ ele okno badnụ naakparị a. 42Be kaa, “Ọ znọhiaru ele berere, kọvu o nwée rikne znọhia ẹhni a, ọ bụ eze Izirẹli, o hi n'olu ọgba hiedna kịtna, a jeekweru nụ a. 43Ọ tụkwasiri Chiokike mkpọma, ọ znọhia a kịtna, ọ bụru nụ ọ masịri a, kwnornu nụ ọ karụ, ‘M bụ m Nnwọ Chiokike.’ ” 44Ọ bụ masị kpa ele buznu wam be kpọgidnernu be nụ Jizọsi n'olu ọgba zị masị naakparị a.

Ẹnwu Jizọsi

(Mak 15:33-41; Luk 23:44-49; Jọn 19:28-30)

45Hite n'esilawụru iwhnehnie,#27:45 n'esilawụru iwhnehnie: ọkwukwo ke mbọm kwuru ige awa isunu ọchichiri gbasnirni kpakara ẹli wam dụ n'ọtnu-ige ke ẹto.#27:45 ọtnu-ige ke ẹto: ọkwukwo ke mbọm kwuru ige awa tolu 46N'ọtnu-ige ke ẹto, Jizọsi jiri okne nkọli siwama, kaa, “Ẹloi, Ẹloi, lama sabatanị,” ke bụ, “Chiokike m, Chiokike m, kịni mernu ị ghasarụ m?”

47Agwna ele gwuzo ndụndu nụrnu a, be kaa, “O noosukwu Ẹlaija.”

48Ngangam, otu badnụ gba ẹso gweru spọnji gbajite a nụ manya gbarụ ọka, tụkwasi a n'olu isisi, nyee a ma ọ nwọ. 49Ele berere kaa, “Gharụ a, a lesi ma Ẹlaija jaava ọ znọhia a.”

50Nga Jizọsi jiri okne nkọli si okokoba berere, o nwebime inwe.

51Ige wam ikpe obnosni ke Ọro Nsọ Chiokike gbawarụ ibekala lawụru hite n'olu dụ n'ẹli. Ẹli otne enye dnarnụ, agịda rugwu gbawarụ. 52Ilili kpumernu, agịda ele nsọ hiri n'ẹnwu lizọ, 53be whụya nụ rime ilili. Nga Jizọsi hiri n'ẹnwu lizọ, be bnazne nụ rime ẹli-ọhna nsọ, gesi agịda ele badnụ ẹhni be.

54Nga nye nẹechi otu riwhu ele ọgwnu nụ ele ọgwnu a zị neese Jizọsi whnụrnu ẹli otne enye nụ kpakara nhne mernu, be tụ ogwnu k'agịda, be kaa, “N'ezi, nyerukna ka bụri Nnwọ Chiokike.” 55Agịda ele rinya zị masị hne zị ikere neelekiri, ele hi nụ Galili snornu Jizọsi va, neeznenu a izi. 56N'esilawụru be bụ Meri Magịdalini, nụ Meri nne Jemisi nụ Josefu, nụ nne rụmu Zebidi.

Be liri Jizọsi

(Mak 15:42-47; Luk 23:50-56; Jọn 19:38-42)

57Nga ogbednachi, otu nye eze be kwu Josefu, nye Arimatiya, nye sno apna Jizọsi, 58znekwnusiri Paịleti, rịo a iznu Jizọsi. Paịleti nyernu iwu be vute a iznu Jizọsi. 59Josefu vuru iznu wam, whụ a n'ikpe abọchna marnụ mma, 60zne lite a nụ rime ilili ikne ke aka a, ke o gwuwaru nụ rime rugwu. O vuru otu rugwu hna ezi kpusni ọnu-mgbo ilili wam. 61Meri Magịdalini nụ Meri kịyari zị ndụndu, kete ruwhnu n'ilili wam.

62N'ekile a, ke bụ ọbochi ke sno ọbochi ojiknernu, ele risi arịohna, nụ ele Farisi gbakọru znekwnusi Paịleti, 63kaa, “Nda-aị-kwu, a chenwanyarnụ nụ nye nduwhu wam karụ nga ọ zị bụdnu, ‘Nga ọbochi ẹto whemernu, m jeehi n'ẹnwu lizọ.’ 64Kam kpayarụ, nyee iwu ma be mesni ilili wam rikne dụ ọbochi ẹto, ma ele sno apna a gharụ o znurnu a n'abalị, kanụ ele badnụ nụ o hiri n'ẹnwu lizọ. Aghalaghala ke ipne-aznụ jaakakwo ke mbọm.”

65Paịleti kanụ be, “Anụ zne, gweru ele ọgwnu, be se, anụ mesni ilili wam rikne kpa anụ nwernu rikne o mee a.” 66Be zne, mesni ilili rikne, kasị ilili a akara n'olu akaworugwu, bịta masị ele nse.

Currently Selected:

Matiyu 27: ikwNT

Highlight

Copy