Gen 7
7
Kutukutuva ghamana itupuwa.
1 Bada ivona bo, “Nowa, akitim da tam kava dobu kamonai am yawasa na maninina kavakava. Tuna kubiine tam, kawam ma natunatumi, kakawasi yavata korui ku waka. 2Ma meni ghamoghamosi ma kiusi avi vaghinei da kam ma suwara kubiine na tomotomowisi ivi 7 ere kakawasi kerutinaruwesi. Ma meni ghamoghamosi na ke biibiisi suwara kubiine, ti na puyapuyakisi, na sagosago duma ere kakawasi kerutinisi da ku waka kona rui. 3Ma kiu kitasi bogii ma bogiiyai keviinisi ina pisi da kiu sago sago duma kii kita nununai tomotomowisi ivi 7 ere kakawasi na keghamosi da yawayawasi ina makamakai da kutukutuva murinai ini tuwame dobuwai. 4Mara 7 murinai na garewa ana vonatawei da mara 40 ma didibara 40 ina katukatuna da bera kudubina yawayawana dobuwai ayamoni na peyarina ana kiipupunatawei.”
5Ma vaghina, Nowa ikikava Bada ivonaverei na peyarina ibera yavui.
6Nowa kana madegha 600 na kutukutuva ivi karei 7da kawana yavata, natunatusi, kakawasi yavata na peyarisi irui ku waka da kutukutuva ita veruvuvurei. 8Ma bade ghamoghamo bogii ma bogiiyai ere kakawasi ku waka irui, ti na puyapuyakisi ma ke puyapuyakisi, kiu ma dowatetetesi yavata. 9Tomotomowisi ere kakawasi ipisi Nowa kurina da yavata irui ku waka. God ikikava ivonaverei na iberai. 10Mara ivi 7 kamonai ivovunagha ikovi na kutukutuva ivi karei dobuwai.
11Nowa kana madegha 600 ma nawaravi kana viruwa kamonai, mara kana vi 17 na kutukutuva ivi karei. Dowa kamonai vusira peyarina ivi tamobubuwana da okowa irakata. Ma kunuma itamotate da garewa vitana ivi karei. 12Nakanani ikatukatuna inenae da mara 40 ma didibara 40 ikovi.
13Garewa ivi karei na Nowa kawana yavata ma natunatusi ivi aroba, ti na Sem, Ham ma Jepeta, kakawasi yavata na peyarisi namada ku waka irui. 14Ma bade ghamoghamo manamisi ma siya dipa, ghamaghamasi ma gisigisisi, rovorovosi ma dowatetetesi, kiu bogii ma bogiiyai na peyarina ere kakawasi namada irui. 15Bera kudubina yawayawana dobuwai na ruwaruwi duma ipisi Nowa kurina da waka kamonai. 16Ma vaghina, ikikava God ivonaverei na Nowa peyarina iberai ikovi. Tomotomowisi ma wivinesi igeru yavu na murinai Bada waka kana matuketa ivopotai.
17Ma mara 40 kamonai kutukutuva igheghae ma okowa irakarakata ma idoga da waka irutenama. 18Ma okowa igheghae da idoga kirakai ma wakana na okowa tepanai itenatenama. 19Igheghae da koya ighegheyana kirakai na kudubina ikamyanumisi. 20Okowa ighae da 7 mitas koya vovosi ma ku tepana. 21Ma bera kudubina yawayawana dobuwai ivivi dagudagu na iwapa. Kiu, ghamoghamo manamisi ma siya dipa ma dowatetetesi ma bade wawaya, peyarina na iuma dodo. 22Bera kudubina yawayawana tano tepanai yasi itawetawei na irabobo. 23Bada God bera kudubina ikiipupunatawesi da wawaya kegha, ghamoghamo kegha, dowatetetesi kegha ma bade kiu kegha. Ma Nowa ma iyavo kava waka kamonai imakamakai na ti kava ke ita rukwa.
24Ma okowa dobu itenukutuvi inene da mara 150 ikovi.
Currently Selected:
Gen 7: pwgB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.