Gen 42
42
Josepa varevaresina inae ku Egypt.
1Keinan dobunai, Jeikap sisiya ivi yanei da Egypt dobunai vavai imakamakai na natunatuna ivonesi bo, “Avi kubiine komakamakai ma koikitavonevoneyana? 2Sisiya avi yanei da Egypt dobuna kamonai na vavai emakamakai. Koru ku Egypt da witi kona gimara da tuna tepanai tamakai da ke tarabobo.”
3Vaghina ma Josepa varevaresina ivi 10 ioru ku Egypt da vavai ita gimara. 4Ma Jeikap natuna Benjamin, tuna Josepa tina kikei, ke ita vonatawei da varevaresina yavata ita nae, iyamna iyabumana da berona ita kayo panani.
5Keinan dobuna kamonai na bade gomara irakata. Tuna kubiine ke Jeikap natunatuna kava ma bade wawaya viya yavata ioru ku Egypt da vavai ita gimara.
6Ma tuna maranai na Josepa na bada ghamana Egypt kamonai ma tuna vavai ivivi gimara wawaya kurisi. Vaghina ma varevaresina inekiibau kurina da irunomei, maghighisi ku dowa. 7Josepa ikitisi na ivogiinisi, ma kegha da iberai da nakanani ma ke itakovisi ma ere ghakighakina ivi sisiya kurisi. Ma ina wawaya sago na gamona ivivi damani kurisi i dughu kamonai. Tuna kubiine varevaresina inotai da tuna na Egypt tomowa ma Hibru gamona ke iti sisiyei. Ivi tarakiiyanesi bo, “Tami imapatana kopisi?”
Ma ivonapotei bo, “Tokai na Keinan dobunai kapisi da vavai kana gimara.”
8Josepa na varevaresina ivogiinisi ma varevaresina tuna ke ita vogiini. 9Ma ina nota ivovira da ikikava ivi matu na inotai ma ivonesi bo, “Tami na nanaga wawayimi, kopisi da akii mitamita tarabogina koekwekwai.”
10Ma ivonapotei bo, “Kegha akii bada, tokai am bigabiga, kapisi da vavai kana gimara. 11Tokai na tomowa sago kava natunatuna. Am bigabiga wawaya maninikai. Tokai na ke nanaga wawayikai.”
12Josepa ivonapotesi bo, “Kegha! Kopisi da akii mitamita tarabogina koekwekwai.”
13Ma ivonapotei bo, “Tokai am bigabiga katupuwa da tomotomowa kavakava akii vi 12 ma akii mamai na sago kava ma tuna na Keinan dobunai emakamakai. Ma tikii kikei murimuri vaghina na akii mamai yavata emakamakai ma varesikai sago na irabobo.”
14Josepa ivonesi bo, “Vona bubuna da tami na nanaga wawayimi. 15Ma vaghina, weni nakanani ana berai da akovimi ana viiya da tami kovonavona bubuna bo koibero. Pero avanai amiimiiri na avonavonemi da weni dobunai kona makamakai da timi kikei wike ina nekiibau na vaghina kana votawemi da kona nae. 16Ami yonayona kona vonatawei ami mamai kurina da timi kikei ina rutinapiyei. Ma tami na ku gabura ana teremi kona makamakai da timi kikei ina nekiibau wike. Ina nekiibau na akova kiimatana ana viiya da kovonavona bubuna bo kegha. Ma kegha na Pero avanai amiimiiri na avonavonemi da tami na nanaga wawayimi.” 17Ma Josepa ipanisi ma ku gabura iteresi da mara aroba imakai.
18Mara kana viaroba kamonai na Josepa ivonesi bo, “Taku na God ayabuyabumanei, tuna kubiine bera maninina ana berai. Kona bera bubuna na ke ana kiivunumi. 19Mikeda tami na wawaya maninimi na ami wawaya sago gabura kamonai ina makai ma peyarimi na vavai kona kavara kona nae ami rakaraka vitonara ekarakarisi na kurisi. 20Ma timi kikei murimurina na koviiya da kopiyei kuriku. Tuna maranai anakovi da ami sisiya na vona bubuna na ke ani rabobomi.”
Ma peyarisi ivi vaghinei da nakanani ina berai. 21Ma ti mani kamosiyai ivi sisiya, ivona bo, “Vona bubuna da kata kovogha, varesita kurina tabera beroi, tuna kubiine weni nuwapoyina tapanapanani. Takitai da varesita ivi kamyuyuwa kirakai ma ivivi nowi ina yawasa kubiine na ke kati nuwapoyei, tuna kubiine tota bade na nuwapoya tapanani.”
22Ma Ruben ivonesi bo, “Rorova kava tami avonemi da tomowa kikei kurina berabero ke kata berai ma aku sisiya ke koti yanei. Ma wekarakava na tarana isororo kubiine, kovoghina taviiviiya.” 23Ivivi sisiya na ke itakovi da aviyavisina ivivi sisiyei na Josepa ivivi yanei. Inotai da Hibru gamo ke itakovi iyamna wawaya sago na ina sisiya ivivi damani kurisi.
24Josepa varevaresina ikuyowesi inae ma itou. Ma itou ikovi na ivovira da kurisi ivi sisiya. Ma Simiyon iviiya da maghinosiyai ma ikutatani.
Josepa varevaresina ivovira ku Keinan.
25Josepa ina bigabiga ivonesi da witi varevaresina i ku kutu ghamaghamasi iti tupotupo ma bade gavunai i mani na ituwaname i ku kutu kamosi. Ma vavai ita veresi da kii keta tamiina kubiine, na kudubina iberai. 26Vaghina ma, kudubina i ku donki ivi geru ikovi na ivomiiri inae.
27Ma inenae da kena kubiine na i wawaya sago ina kutu ivotawei da vavai ita viiya ina donki kubiine na ipanani da ina mane na ina kutu kamonai. 28Ma varevaresina ivonesi bo, “Aku mane na iuwana meyei aku ku kutu kamona, kokitai, weni.”
Vaghina ma nuwanuwasi ikarai, ivi kitavonevonei ma ere kirokirorosi ivona bo, “Avi kubiine weni berana God iberai kurita?”
29Ku Keinan inekiibau na aviyavisina peyarina itupuwa Egypt dobuna kamonai ma ketiyai na i mamai Jeikap kurina ivi mamatara, ivona bo, 30“Egypt dobuna kana bada ghamana ivi wavukai na ere ghakighakina ivi sisiya kurikai da nakanani ma tokai na nanaga wawayikai. 31Ma kegha da kavonapotei bo, ‘Tokai na ke nanaga wawayikai, tokai na wawaya maninikai. 32Ma tokai na katupuwa da tomotomowa akii vi 12 ma akii mamai na sago kava ma varesikai sago na irabobo ma tikii kikei murimuri vaghina na akii mamai yavata Keinan dobunai emakamakai.’ ”
33“Vaghina ma bada ghamana ivonekai bo, ‘Weni nakanani kona berai da anakovi da kovonavona bubuna bo koibero. Kwinami sago na yavata kana makai ma peyarimi na vavai kona kavara kona nae da ami rakaraka vitonara ekarakarisi na kurisi. 34Ma timi kikei murimuri vaghina korutinapiyei kuriku da anakovi da tami kovonavona bubuna da tami wawaya maninimi ma ke nanaga wawayimi. Tuna maranai na varesimi ana vere meyemi ma ani vaghinei da weni dobunai kona gimagimara.’ ”
35Ma peyarisi i kutu kamosiyai vavai ivivi kiibuni na ipanani da i kutu kamosiyai gimagimara manesi na kudubina nani. I mamai yavata nani manesi ikitakitai na iyabumana kirakai. 36Ma i mamai ivonesi bo, “Ami kayowana da natunatuku kudubimi ani wapimi bo? Josepa namada irabobo, ma bade Simiyon iwapa ma wekarakava na ami kayowana da Benjamin kona viitawei bo? Bera kudubina na imiirikuputeku.”
37Ruben ina mamai ivonei bo, “Benjamin kevereku ma kevi tumaghaneku da ana rutini kana vovira. Mikeda ke ana rutinapiyei na natunatuku ivi ruwa kevi kiivunuwana, kaku kovogha.”
38Ma kegha, Jeikap ivona bo, “Ke kovokovoghina da natuku yavata konoru, namada ina tuwa irabobo ma ina kina kava emakamakai. Taku namada amorapa kirakai ma mikeda keta borinai berona ina panani na tuna nuwapoyina ini raboboku. Anoru raborabobosi i ku dobu.”
Currently Selected:
Gen 42: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
