Gen 16
16
Heiga ma natuna Ismayel.
1Abram kawana Serai na gagarina, ma ina bigabiga wavinena na Egypt wawaya kana vava Heiga. 2Mara sago Serai inae Abram kurina ma ivona bo, “Bada ivi tarapaparaneku da ke ati tuwa. Kade aku bigabiga wavinena yavata kota kena da iti tuwa. Ini tuwa na natuna ana viini da tuna tepanai aku ribiribi ina tupuwa.”
Abram ivi vaghinei. 3Tuna kubiine Serai ina bigabiga wavinena Heiga irutini ineyei Abram kurina da iti kawanei. Ti na Keinan dobunai imakamakai da madegha 10 ikovi ma muriyai weni berana itupuwa. 4Ivi kawanei na Heiga damina iviiya da iropeya. Ma ivi karei da ikayokayotata ma Serai ikitakitaoruwei.
5Vaghina ma Serai, Abram ivonei bo, “Tam kubera beroi da Heiga ekayokayotata. Taku mani nani wavinena ku imam aterei, ma karako na iakova meyei da iropeya na ekitakitoruweku. Ainowi Bada kurina da weni nuwapoyina ini maninini. Ma iyi ti wavui?”
6Ma Abram ivonapotei bo, “Kevi yana, wavinena na tam am bigabiga, tuna na am rewapana gaburinai da kuni badei. Am kayowanai keberai kurina.” Nani murinai Serai ivi karei da Heiga ivivi tupaketowanei, tuna kubiine iverau.
7Iverau da ku vusira sago warereyai, nani vusirina na keta enenae ku Sura kwanatuna na baranai. Ma Bada ina aneya inekiibau kurina. 8Ivona bo, “Heiga, tam Serai ina bigabiga wavinem, mimei kupisi ma mike kenenae?”
Ma ivonapotei bo, “Aku bada wavinena ivivi tupaketowaneku na averau.”
9Ma Bada ina aneya ivonei bo, “Kevovirame am bada wavinena kurina ma kevotekatekei.” 10Ma aneyina ina sisiya ikwapanatini da ivona bo, “Ana berim da tupurereghim ina peyari kirakai da ke ruvaruvana da wawaya ini yavisi.”
11Ma ku tepana ivona bo,
“Kuni tuwa da natum tomowa
ma kuni vavei Ismayel,
iyamna Bada sisiya ivi yanei da tam nuwapoya kamonai.
12Ina magura na tuna nakanani ma donki dipa.
Wawaya peyarisi ini kawapatesi
ma ti bade ini kawapatei.
Tuna mani ina rakaraka yavata ini makiiberowana.”
13Nani murinai Heiga, Bada kurina kana vava vuna ikwatukwatui, ivonavonei bo, “Tam God Kekitakitiku.” Ma bade ivona bo, “Wawayina ekitakitiku na taku mani matakuwai akitai. Anotakavakavai.” 14Tuna kubiine wawaya nani dogona ivi vavei Be Layai Roi, iyamna “God yawayawana ekitakitiku na tuna ina dogo.” Ma dogona na patana da Kades ma Beredi basusiyai emakamakai.
15Vaghina ma Heiga, Abram natuna ivi tuwei da tomowa. Ma Abram ivi vavei Ismayel. 16Natuna itupuwa na Abram kana madegha 86.
Currently Selected:
Gen 16: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
