Gen 15

God ma Abram vivaghina makamakiina iberai.

1Nani murinai Abram, Bada mekeyuna ikitai da kurina ivivi sisiya, ivonei bo,

“Abram, kam papara ana vowai.

Tuna kubiine ke kuna yabumana.

Ma am miiya ghamanakina ana verem.”

2Ma Abram ivonapotei bo, “O Bada, bera kudubina na tam kibadei. Miiya ghamana kuta vereku na iyamna kegha. Taku na gagariku, natuku kegha. Tuna kubiine ana rabobo na aku bigabiga tomowina mura kudubina rapekuwai ina viiya. Tuna na Damaskas tomowa Eliyesa.” 3Ma bade ivona meyei, “Kevi yana. Kesago natuku sago kuta vereku, tuna kubiine bigabiga wawayina aku mura ina viiya da ina buderi.”

4Vaghina ma Bada ivi sisiyame, ivona bo, “Kegha. Nani bigabiga wawayina am mura ke ini rapenei. Tam mani natum vaghata am mura ina viiya da ina buderi.” 5Ma irutini ikiibau ku matara ma ivonei bo, “Ketepa ku kunuma da gwamegwame kuni yava tovoni. Kegha, ke kovokovoghina.” Vaghina ma, ivonei bo, “Tupurereghim ina peyari da gwamegwame nakanani.”

6Ma Abram ivi tumaghana da Bada ina sisiya na vonavaghata. Ma Bada God ikitai da Abram ina vitumaghana irakata, tuna kubiine ivi nuwabiibiiyei ma ivonakiiyaragha da Abram na ina wawaya maninina.

7Ma bade Abram kurina ivona bo, “Taku na Bada. Taku arutinim da Kaldiya damsi i kwanatu Uru kukiibutawei ma kupisi wike. Ma weni dobuna ana verem da kuni rapenei.”

8Ma Abram ivona bo, “O Bada, bera kudubina na tam kibadei. Ma kade, matakira kuta vereku da atakovi da weni dobuna ani rapenei.”

9Vaghina ma Bada God ivona bo, “Kau wavinena sago, gote sago, ma sipu tomowina sago, ivi aroba kii madegha aroba na peyarisi kerutinapiyesi. Ma yavata na gabubu sago ma kughukughu sago kekavarapiyei.”

10Abram ghamoghamosi ipiyei Bada God kurina na ivi kiivunuwana ma tupuwisi ivi tarasepiyana. Sago sago duma basunai itarasepini da kii nevaneviiyai irereghisi. Ma kiusi na kudukudubisi itura, ke iti tarasepiyana. 11Ma siya kamkam kiusi viya ipisi da ghamoghamo viyosi ita kam ma Abram ikwavinisi da inae.

12Ravi ipika na Abram matana ikiikovowi da ikenanunuwapa ma nubakutuva ghamana itinariyai. Ma yabumana damina iviiya da ininina ogariri igheyei. 13Ma Bada God ivi sisiya kurina, ivona bo, “Vonavaghata ana vonem. Mara karakava epipisi da tupurereghim ini numataya, dobu viruwai ina makii kirakai da madegha 400 ina kovi. Ma nani kamonai nokoni dobuna wawayisi tupurereghim ini kayonogenogeyanesi da ini kamyuyuwa. Ini sleiv, biga vitana ina beraberai ma miiyiina kegha. 14Ma muriyai, iyavo kava tupurereghim ini kayonogenogeyanesi na kii kovogha ana veresi. Ma tupurereghim dobuna ina kiibutawei na mura ghamana ina kavari ina nae. 15Ma tam na am yawasa dobuwai ina guri kirakai ma nuwanubiiyai kuna rabobo da ina dogom. 16Ma Amo damsi ana voteresi weni dobunai ina makai da i bera beroberosi ina rakata kamowa na muriyai kovogha ana veresi. Ma tupurereghim na kimta ruwamaruwa ina kovi ma nani murinai ina vovirame wike.”

17Madegha ioru ma ivi didibari. Vaghina ma, Abram ikita da bayawa sago ikitai ma kamonai keyama ikarakarata ma ibubau. Ma bade kibe ere yebayebarina irumatara da ghamoghamo tarasepisepisi basusiyai ikarata inae. 18Ma nani maranai Bada vivaghina makamakiina iberai Abram yavata. Ivona bo, “Weni dobuna na tupurereghim ana veresi, i tano paratina na Egypt okowina da ku Yuperetis okowina. 19Nani kamonai na Kena damsi i tano, Kenisi damsi i tano, Kadimo damsi i tano, 20Hiti damsi i tano, Peru damsi i tano, Repa damsi i tano, 21Amo damsi i tano, Keinan damsi i tano, Giraga damsi i tano ma bade Jebu damsi i tano na kudubina tupurereghim ana veresi.”

Currently Selected:

Gen 15: pwgB

Highlight

Copy