Malukushi 11

Imbumba inkupuwangila kwinjila kumwe Yesu

Mateu 21:1-11; Lukashi 19:28-40; Nshuwau 12:12-19

1Napanelo vanavo pavavandike pa Yelusalemu vàvele pa Betepashi na Betaniya, palishinga lyamilandi Vyaulivela Yesu andívatuma vakwoda vake vavili 2kutwala kuvaulila doni, “Wena palikaja livéle mushu mo. Pamwinjila munankodya mwana wapunda ákanava kunkwela munu vamuungangidile. Mwenu muungule mumwidenavo. 3Akamudya munu kushidoni, ‘Da punda jo mumuungulila nyamani?’ Mwaulile doni, ‘Umu ankunnota, ling'oto andamuujiya.’ ”

4Vanavo kuka nankodya mwana wapunda vamuungangidile pannango nanyenje ibalabala kutwala kumuungula. 5Napanelo pakati pavanu ve vapagwíte apo kuvaudya, “Mumuungulila nyamani punda jo?” 6Vanavo kuvajang'ula kenga mo mwavaulidile Yesu, vanu vo kuvaleka vauke. 7Bai vanavo kumwidanavo punda jo kumwe Yesu kuntandikanga dinguvo, Yesu kunkwela. 8Vanu voe kupita vatandikanga dinguvo dyave mwindila, vanji kwanganga dinavi dyamilandi kupita valadyanga ndila. 9Vanu váshuka mushu na váshaloka panyuma vashindapita vatangola pashanya po vaashidoni,

“Ashibike!”

“Aalaligwe áida palina limwe Umu!”#11:9 Lola Dimu 118:25-26.

10“Walaligwe utawala wída watatagwetu Daudi!”#11:10 Lola II Samuwele 7:12-16.

“Kushibika kupagwe kushanya-uti!”

11Bai Yesu andíinjila pa Yelusalemu kukinneu ndainjila nng'ande ya Nnungu. Nae andílalyanga shana kula shinu kanji kwodamwaa wakati undípita andyúma namu avalá kumi na mbili kuka ku Betaniya.

Yesu ankutaa dilana nnandi

Mateu 21:18-19

12Palyamba lyake pavashuma pa Betaniya Yesu kunkola indala. 13Akone kwakushu nnandi uvéle mwankuju#11:13 Nnandi au uvele kenga shimanyikilo shalikulupililo lyavanaishilaeli. Yesu patangwele yannandi au, ashamba likulupililo lyavanaishilaeli halishivanavo vyepo. Nadoni vanavo indivavaikila vaukumigwe. Linganianga: Yelemiya 8:13; Osheya 9:10-16; Mikeya 7:1-4. ùvele na mamba ake, nae kuka ndalola nakapanji andona shinu shoeshoe. Pavandike hagwene shinu ila akodidye mamba mwaa hauvele wakati wakupa vyepo. 14Bai nae andítangalela nnandi awo kushidoni, “Kwako wako mwiko, halya munu kavili vyepo.” Malove alo, vakwoda vake vashindaigwa.

Kuvingangigwa kwavakushulusha mwing'ande ya Nnungu

Mateu 21:12-17; Lukashi 19:45-48; Nshuwau 2:13-17

15Vanavo vankuwika pa Yelusalemu. Yesu painjidile mwing'ande ya Nnungu andítunduvanga kuvakumulanga vanu váshishumidyanga na váshishumanga vinu, kugang'alanga dimesha dyavakushenji-njuluku na dikiti dyavanu váshishumidyanga ding'unda. 16Nae ashindaleya munu kunyukata shinu shanshulushu mwing'ande ya Nnungu 17na ashindapundisha aashidoni, “Da havaandike, ‘Ing'ande yangu indashamegwa ing'ande yakushwalidya venentete uti’?#11:17 Lola Ishaiya 56:7. Kanji mwenu munditenda kuva shivava shavakwiva.”#11:17 Lola Yelemiya 7:11. 18Malove alo, vanang'olo vavakulangalalela-shadaka pamo na vamwalimu vadishaliya vashindaigwa. Vanavo vashindalambela dindila dyakummalididya mwaa vashinanjopa kwoda vanu uti vashindashanga mapundisho ake. 19Pauwikile wakati wayalyulo vanavo vandyúma panjini po.

Lipundisho kwannandi wataile Yesu dilana

Mateu 21:20-22

20Napanelo lyamba lyake vapita pannandi po ndakodya ujumile kutunduvangila dinyija. 21Patulu kukumbukila kutwala kumwaulila Yesu, “Labi, lola nnandi wautaile dilana wo, undijuma.” 22Yesu kushidoni, “Mwenu, Nnungu nkulupile. 23Ninkumwaulila mwiu kenga munu woewoe átangalela lishinga ali doni, ‘Bubuka apa uke ukalijele mwimanga,’ atangola bila kwambambidyanga muntima mwake, akulupila kenga vyatangwele vindátandeka, vindatandakela mo mwatangaladile. 24Napavedoni ninkumwaulila, uti vyamulota kujugwa kwaindila yakushwali kulupila kenga mundipata nadoni vindakutandakela momo. 25Pamushwali, shikapagwa shinu muntima mwako na munumwavo, nnivalive pakulota Tatagwenu ávele kuwa nanae annivalive kupujungula kwenu.” 26#11:26 Mumaandiko oe akala inamba idikidiki ya 26 hainapagwa shinu. Mumaandiko anji vandyándika doni, Kanji mwenu mukanannivaliva munu kupujungula kwake, nanae Tatagwenu ávele kuwa hannivaliva shinu kupujungula kwenu.

Nyani akupele lilamulo ali?

Mateu 21:23-27; Lukashi 20:1-8

27Vanavo vankwinjila kavili pa Yelusalemu. Napanelo Yesu apita awanawananga mwing'ande ya Nnungu, vandímwidila vanang'olo vavakulangalalela-shadaka, vamwalimu vadishaliya pamo na vanang'olo 28kutwala kumudya, “Vinu avi unkutenda kwamadalaka shani? Da madalaka ene lo autandela vinu avi akupelé nyani?” 29Yesu kushidoni, “Nanangu ndamudya shinu shimo mukangujang'ula, nanangu madalaka angutandela vinu avi, ndamwaulila. 30Da ubatisho umwe Nshuwau walakadilé kuwa kwali kwavanu? Ngujang'ula!” 31Vanavo kwaulanila shivenevene vaashidoni, “Tukaashidoni, ‘Walakadilé kuwa,’ nae andatudya, ‘Mwaa shani hamunkulupidile?’ 32Ata tukaashidoni, ‘Walakadilé kwavanu…’ ” Vanavo vashindavajopa venentete mwaa venentete vashindamwamini Nshuwau kuva nkúlava. 33Bai vanínjang'ula, “Wetu hatumanyite.” Yesu kutwa kushidoni, “Ata nanangu momo hanimwaulila madalaka angutandela vinu avi.”

Currently Selected:

Malukushi 11: kde

Highlight

Copy