Mateu 27

Yesu vankumuukanavo kumwe Pilatu

Malukushi 15:1; Lukashi 23:1-2; Nshuwau 18:28-32

1Napanelo lyamba linyeiku, vanang'olo uti vavakulangalalela-shadaka pamo na vanang'olo vavenentete vandíikala nguguvale kutwala kuunganila vammyae Yesu. 2Nadoni vanavo vakamunga kumuukanavo kumwe Pilatu nang'olo walijimbo.

Yuda ankulipambilila

Vitendo 1:18-19

3Napanelo Yudashi aijá annimídye Yesu, pamanyite doni Yesu andyukumigwa andílilingulanga kutwala kuujiya dishingo salasini adilá dyalyava kwavanang'olo vavakulangalalela-shadaka na kwavanang'olo 4aashidoni, “Nditega. Nditadya vijaike myadi víkave makosha.” Vanavo kushidoni, “Wetu shetu nyamani? Mwaa awo wako wako umwene.” 5Bai nae akajaa dishingo adilá mwing'ande ya Nnungu mwene kuka ndalipambilila. 6Napanelo vanang'olo vavakulangalalela-shadaka vakatwala dishingo adilá kutwa kushidoni, “Lilamulo linkutuleya njuluku au kuvika mulishanduku lyanjuluku waing'ande ya Nnungu mwaa upatikanenge mumyadi.” 7Bai vanavo kupakanila njuluku awo vashume lishamba limwe pundi jumo wakumba ulongo pakulota live lyutu lyakuvashika vakwaloka. 8Ni ashi shavashamela mpaka nelo lina lya Lishamba Lyamyadi. 9Napavedoni andíwikila popo malove atangaléke kwaindila yankúlava Yelemiya doni,

“Vanditwala dishingo salasini dyalyava,

shilinga shavagwene vanaishilaeli kutosha kunshumidya nae.

10Vanavo njuluku awo kushuma lishamba limwe pundi wakumba ulongo,

kenga mo mwangulamulidile Umu ngutende.”#27:10 Lola Shakaliya 11:12-13.

Yesu pamevo pamwe Pilatu

Malukushi 15:2-14; Lukashi 23:3-5, 13-23; Nshuwau 18:33-19:15

11Napanelo Yesu vandímwimidya pamevo pake nang'olo walijimbo nae kutwala kumudya, “Da wako ni umu wavayuda?” Yesu kushidoni, “Wako ni úvalanganga.” 12Bai vanang'olo vavakulangalalela-shadaka pamo na vanang'olo pavashinkashali, nae hashijang'ula. 13Pilatu kutwala kumudya, “Da vinu vyoe vyavakukashali avi haunaigwa shinu?” 14Yesu kulamana na kujang'ula ata lilove limo mpaka nang'olo walijimbo kushanga.

15Napanelo kula pashishiwika shikukulu, Pilatu ashindavaungulila nkúngwa jumo wavashinjugwa venentete. 16Andípagwa nkúngwa jumo wakumanyika namene walina Yesu Balabashi.#27:16 Mumaandiko amo akala ni mwavaandike lina lya Yesu Balabashi anji muvele Balabashi tu. Nimumo momo munshitali wa 17. 17Bai vanu vàumbalanidile Pilatu kuvaudya, “Wakwashi wamulota nimuungulile, Yesu Balabashi kwali Yesu wavanshema Klistu?” 18Andyúdya davo mwaa andímanya kenga vandimuukanavo kwake nae kwamwaa waing'ou. 19Namomo Pilatu àikele palibengi, ndyagwe kumpalakadyedya ntenga wakushidoni, “Haunaliinjidyange mumwaa wamunu ajo waishaliya. Nangu nelo nindyuvauvanga namene ngulatanga kwamwaa wake nae.” 20Kanji vanang'olo vavakulangalalela-shadaka pamo na vanang'olo vandívatumbilikanga venentete pakulota vanjugwe avaungulile Balabashi, Yesu jo vammalidye. 21Kutwala nang'olo walijimbo kudya kavili, “Pakati pavanu ava vavili, wakwashi wamulota nimuungulile?” Vanavo do, “Balabashi!” 22Nae, “Napane kushi Yesu wavanshema Klistu nintandele mwashi?” Vanavo uti do, “Nkamele panshalaba!” 23Nae kudya kavili, “Da nae po atandilé shaukalau shani?” Vanavo kumamodya kukugwanga pashanya po, vaashidoni, “Nkamele panshalaba!”

Pilatu ankunkamudya Yesu vankamele panshalaba

Malukushi 15:15; Lukashi 23:24-25; Nshuwau 19:16

24Napanelo Pilatu pamanyite doni hashipali shuululika na shititimbu shinkutunduvanga, andítwala medi kunavanga mmakono pamevo pavanu uti aashidoni, “Kujaika kwamyadi vyamunu aju, nangu hanguve makosha. Ing'ano ayo yenu mmene.” 25Venentete uti kushidoni, “Makosha akujaika myadi avyo atupate wetu pamo na udukulu wetu.” 26Bai Pilatu andívaungulila Balabashi, Yesu jo kunshapa viboko na kuvaing'a vakankamele panshalaba.

Vaing'ondo vankumwiludyanga Yesu

Malukushi 15:16-20; Nshuwau 19:2-3

27Vaing'ondo vake nang'olo walijimbo vakantwala Yesu kumuukanavo kwing'ande yanang'olo wave kushema shipinga uti shavaing'ondo kuntang'anedya. 28Vanavo vakamulanga dinguvo dyake kungwadya ikanju yanauvi. 29Vakadinga lidaka lyamiva kungwadya mmuti, mmakono mwake kunkamudya nkungulandi, kunguguvalila mushu mwake akuno vantanila vaashidoni, “Shikamu Umu wavayuda!” 30Vanínshunangila mata kutwala kumpoka nkungulandi wo kunkanyalela jo mwene mmuti. 31Vakantanile, vandímula ailá ikanju yanauvi kungwadya dinguvo dyake kumuukanavo nankamela panshalaba.

Kukamalalegwa kumwe Yesu

Malukushi 15:21-32; Lukashi 23:26-43; Nshuwau 19:16-27

32Napanelo pavashuma nkaja mo vanínkodya munu jumo wa ku Shilene walina Simoni, vanavo kutwala kumuungila alitike nshalaba umwe Yesu. 33Vakawika palyutu lyavashema Gologota, yani lyutu lyashivanga, 34vanavo kumupa ugwalwa wavinyu wavanganiénge na shinu shakukalala nae akalinge andíta kukumbila. 35Vakankamela panshalaba kutwala dinguvo dyake kujavananga kwaindila yakujalanga gudugudu#27:35 Lola Dimu 22:18. Maandiko anji ankushidoni, …vandijalanga gudugudu pakulota liwikile popo lilove lyatangwele nkúlava doni, “Vandijavananga dinguvo dyangu namomo vandijalanga gudugudu kwamwaa wadinguvo dyangu.” 36na vàikalenge popo vashinannaledya. 37Napanelo pamuti pake vandíkamela shibau shavaandike nkanidyo umwámba nae doni, “Aju Yesu, Umu Wavayuda.” 38Popo po, vandívakamela vakwiva vavili pamo namu nae, jumo kunkanakono junji kunshanda.

39Bai vanu váshipita apo vashindamwabalanga Yesu akuno vapukunianga myuti#27:39 Lola Dimu 22:7; 109:25. 40vaashidoni, “Wako únabamola ing'ande ya Nnungu na kudenga kwamaduva matatu, bai liposhe gwegwe umwene! Shuluka panshalaba po ukava umwanangwe Nnungu!” 41Na yadavo vanang'olo vavakulangalalela-shadaka pamo na vamwalimu vadishaliya na vanang'olo vashinanniulanga vaashidoni, 42“Vanji andivaposha kanji kuliposha mwene hanaulula shinu. Ashii aju, Umu wa ku Ishilaeli! Bai ashuluke ambi popa panshalaba po pakulota tunkulupile. 43Aju apa ashinankulupila Nnungu bai Nnungu jo aide amposhe ikava kenga ankunnagwaledya#27:43 Lola Dimu 22:8. mwaa ashishidoni, ‘Nangu nimwanagwe Nnungu.’ ” 44Nimumo momo vakwiva avalá vavakamadíle pamo namu nae navanavo vashinanniulanga.

Kupela kumwe Yesu

Malukushi 15:33-41; Lukashi 23:44-49; Nshuwau 19:28-30

45Napanelo kutunduvangila wakati wasasita mpaka satisa shilambo uti shindida shii. 46Paiwikile satisa, Yesu kukugwa pashanya po aashidoni, “Eloi, Eloi, lama sabakitani?” yani “Nnungu wangu, Nnungu wangu, mwaa shani uningwambukanga?”#27:46 Lola Dimu 22:1. 47Bai pakati pavanu ve vapagwíte apo vanji vo pavaigwite, vanavo kushidoni, “Anshema Liyashi ajo.” 48Munu jumo pakati pave kutukutinneu ndatwala shipande shaivonu kushuvika muulimu, kupambya munkungulandi kuka ndamupa Yesu akumbile. 49Vanu vanji kushidoni, “Nneke! Leka tulole ikava kenga Liyashi jo andaida namposha.”

50Bai Yesu andíkugwa kavili pashanya po kutwala kujaa imumu. 51Mwe! Inguvo ailá yamwing'ande ya Nnungu kupapuka kuma kushanya mpaka mwina,#27:51 Inguvo ayo ishiinikidya lyutu lyakwilimyanga. Ikapapuke, inding'a litala lyakuwika vanu mulyutu alyo. shilambo kundangenda na majanga kutumbukanga. 52Vyonga kushimukanga, mili vyoe vyavakwilimyanga vapadíle, kudyuka. 53Vanavo pavaumanenge muvyonga ling'oto lyakudyuka Yesu, vandíinjila munjini wakwilimyanga vanu voe kutwala kuvona. 54Napane nang'olo wavaing'ondo pamo na avalá vavénavo váshinshunga Yesu, pavagwene shilambo shindangenda na vinu vinji víshitandeka, vanavo kujopa kutwala kushidoni, “Munu aju mwiu avele mwanagwe Nnungu.” 55Popo po vandíimilanga vakongwe voe kwakushu valola, vakongwe avo ni vovo ve vamwodíle Yesu kuma ku Galileya vapita vantumika. 56Pakati pavakongwe avo, andípagwa Maliya wa ku Magadalena, Maliya anyoke Tiyagu namu Yoshe na kupagwa jujugwave vanavake Shebedeu.

Kunshika kumwe Yesu

Malukushi 15:42-47; Lukashi 23:50-56; Nshuwau 19:38-42

57Napanelo paiwikile yalyulo kuwika munu jumo ntajili wa ku Alimateya walina Yoshe, nanae ashiva nkwóda wake Yesu. 58Bai nae andyúka kumwe Pilatu ndajugwa mili wake Yesu, Pilatu kulamulila vamupe. 59Nae kutwala mili aulá kukulunganga mwinguvo yakutakata yakunamikanga 60kuka ndashika mushonga shake shaambi shatumidídye vapakeye mulijanga. Nae kwingiliya lijanga likumene kudiva pannango, mwene kuka. 61Po pashonga po, andíikala Maliya wa ku Magadalena namu aijá Maliya junji.

Vakulaledya shonga

62Napanelo palyamba lyake, yani liduva lyakupumula,#27:62 Mushigalegu: …yani liduva ling'oto lyaliduva lyakulipanganianga… vanang'olo vavakulangalalela-shadaka pamo na mapalishayo, vandímuukila Pilatu 63ndamwaulila kushidoni, “Nang'olo, wetu tunkukumbukila doni aijá munu nshwang'a àvele mumi ashishidoni, ‘Akapita maduva matatu, nangu ndadyuka.’ 64Napavedoni lamulila vashunge namene shonga shake mpaka muliduva lyantatu pakulota vakwoda vake havanaide ndamwiva shilo kutwala kuvaulila venentete doni, ‘Andidyuka pakati pavakupela.’ Nadoni kushang'apa aku kulota kuva kwakumamodya kupunda kutandi.” 65Pilatu kutwala kushidoni, “Munkuvanavo vaing'ondo, wena mukashunge mwamuululila mmene.” 66Bai vanavo vandyúka ndashunga shonga sho kwaindila yakuvika shimanyikilo palijanga po na kuvavika vakulaledya.

Currently Selected:

Mateu 27: kde

Highlight

Copy