Mateu 11
11
Vakwoda vamwe Nshuwau Wakubatisha
Lukashi 7:17-23
1Napanelo Yesu pamalidile kuvapa malailililo vakwoda vake kumi na mbili avalá, andyúma kuka ndapundisha na ndavalanganga ntenga mumakaja aisemu ayo.
2Nshuwau jo àvele nkalaboshi, paigwite uti vinu vyashitenda Klistu andívatuma vakwoda vake 3vakamudye doni, “Da wako ni aijá úshilota kwida kwali tunnindile junji?” 4Yesu kushidoni, “Wena mukamwaulile Nshuwau jo vyamwigwa na vyamwona avi. 5Vakuputala mevo vankupata kulola, vakudidimanga madodo vankuwena, vamalemba vankuvatadya kutakata, vákaigwa vankwigwa, vakupela vankuvadyuwa na vamashikini vankuvalangangiligwa ntenga wambone. 6Andijaligwa aijá ákangunyatila nangu.”
Mapundisho kwamwaa umwe Nshuwau
Lukashi 7:24-35
7Napanelo vakwoda vake Nshuwau akuno vauma, Yesu andítunduvanga kumanyiya imbumba yavanu ing'ano imwe Nshuwau aashidoni, “Da mwenu muukile ndalola nyamani kushimbweshe akulá? Muukile ndalola udani úshipunga imepo? 8Da muukile ndalola nyamani? Nannola munu ágwalidile dinguvo dyabei? Mwenu, vanu vagwalíla dinguvo dyabei vaikala muding'ande dyavaumu. 9Kanji napanelo muukile ndalola nyamani? Muukile nannola nkúlava? Elo, ninkumwaulila doni, nae pankulava po, andipunda. 10Aju ni aijá wavamwandike doni,
“ ‘Mushu mwako, nannangaledya múntenga wangu,
nae andakukandyangidya indila yako.’#11:10 Lola Malakiya 3:1.
11“Ninkumwaulila mwiu doni, pakati pavanu vamushilambo shapai ashi, haumilidile nkúlava ámpundile Nshuwau Wakubatisha. Ata ive davo aijá ndikidiki muutawala wakuwa wo, nae ni nang'olo ámpundile Nshuwau jo. 12Kutunduvangila wakati umwe Nshuwau Wakubatisha mpaka ambi apa, utawala wakuwa unkuka na dimongo na valikanyilídya vankwinjila.#11:12 Kwali: …utawala wakuwa unkutandegwa ing'ondo na vanu vakalau vankukamula kwankukunya. Kwali: …utawala wakuwa vanu vankwinjila kwankukunya na vanu vankukunya vankupata. 13Mwaa Vakulava uti pamo na Lilamulo vandilava mpaka Nshuwau 14napane ikava kenga munkuulula kwamini, bai nae ni jojo Liyashi áshilindiligwa kwida. 15Aijá ávenavo matu akwigwidya, aigwe.
16“Napanelo vanu vaimbula ai ndivalinganiange na nyamani? Vanavo vavelé kenga vadyoko vaikalénge mumautu aumbala vaulanila doni,
17“ ‘Tundimwambela magoma,
mwenu hamuvinile.
Tundimba dimu dyashililo,
mwenu hamulidile.’
18“Shapo lola, andida Nshuwau pakalya na pakakumbila, mwenu muushidoni, ‘Anintawala lijini ajo.’ 19Andida Mwana Wamunu alya na akumbila, mwenu muushidoni, ‘Nnole munu wakululuka na lilevi, njave vakukatisha-ukodi na vakutega.’ Kanji napane limanyilo lyake Nnungu linkulilodya kuva lyashaliya nkati muvitendo vyake.”
Dilana kwamakaja ákalijugulenge
Lukashi 10:13-15
20Yesu napane kutwala kutunduvanga kutangadikanga minjini vyatandile makango oe mwaa havalotíle kulijugulanga, 21“Upambale wako Kolashimu! Upambale wako Beteshaida! Makango atandéke kwenu leka àtandeke ku Tilu namu ku Shidoni, vanavo doni vàlijugulenge tangu kala. Doni vàlitaenge maguni na vàpakalenge liu. 22Nangu ninkumwaulila mwiu doni, muliduva lyaukumu vatilu namu vashidoni vandadyanga kuliko mwenu. 23Nawako Kapalanaumu! Da ulota kulikwedya mpaka kuwa? Bai vandakupandamwalela kumoka. Makango atandéke kwako wako leka àtandeke ku Shodoma, njini awo ukandipagwa mpaka nelo. 24Napane nangu ninkukwaulila mwiu doni, muliduva lyaukumu shilambo sha ku Shodoma shindadyanga kuliko mwenu.”
Idananga kwangu nangu nampumudya
Lukashi 10:21-22
25Napanelo muwakati awo Yesu andítangola kushidoni, “Ninkukulambwalela#11:25 Kwali: Ninkukutumbyanga… Atata, Umu wakuwa na pai, pakuvapiyanga vinu avi vanu valimanyilo na valipundishídye kuvalodya vanu vila. 26Elo Atata, mwaa amu ni momo mwaulatalele umwene. 27Vinu uti aningukamudya Atata. Hapali junji ámmanyite Mwana ila Atata na hapali ámmanyite Atata ila Mwana pamo namu aijá walota kunnodya mwene Mwana.
28“Idananga kwangu mwenu uti díndabadabyenge dibasha, nangu nampumudya. 29Lyunge likangoti lyangu na lipundishe kwangu. Nangu ni wakulimaladya na wantima wakulishapeya na mwenu mundapata kupumula kwaungumi wenu. 30Mwaa likangoti lyangu halinapwateka shinu na ibasha yangu inkugaluka.”
Currently Selected:
Mateu 11: kde
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
