ECCLESIASTES 1

Andi-kakanaan so Bilay

1Sikara yay salita na Managpulong, say lakin anak nen David, tan ari na Jerusalem.

2Tuan andi-kakanaan, andi-kakanaan, kuay Managpulong. Andi-kakanaan so bilay, andi-kakanaan ya amin. 3Antoy nagunggonay too, anggaman a mankimey lan mankimey legan na bilay to? 4Mansosoblay so kailalakan ya onsabi, balet anggapo niy angomanan na mundo. 5Ombubutay tan onseselek so agew, tan ompapawil ed nanlapwan to. 6Onsisiplug so dagem ed abalaten, onsisiplug ed baybayontetelek tan ompapawil tan pawil-pawil labat ya onsiplug. 7Amin da ray ilog onaagos ed dayat balet siansian ag ni ra napno, ompawil ed sengeg na saray ilog so danum, insan onagos lamet ed dayat. 8Amin a bengatla mansusumpal ed kapagaankapagaan ya ag nayarin ibalikas. Ag napepenek so mata ed inenengneng to; ag met napepenek so layag ed idedengel to. 9No antoy agawa la nen saman nagawa lamet. Naolit-olit labat so nagagawa. Anggapoy antokaman a balo diad tapew na dalin. 10Kuanda, Nengneng yo! Nia so bengatlan balo! Balet andi, agawa la nen saman, abayag la kasakbayan a nianak itayo. 11Anggapoy toon makanununot no anto so agawa ed linmabas, tan anggapo so toon makanunot no anto so nagawa manlapud natan ya anggad arapen iran agew.

Say Asalsali na Managpulong

12Siak, say Managpulong, nanari ak ed intiron Israel diad Jerusalem. 13Ginetmak a sukiten tan aralen ya amin iray nagagawa diad tapew na dalin.

Say Dios impasen to itayod makapasinagem a kipapasen. 14Anengneng kon amin iray agawa diad mundo, et nengneng yo, andi-kakanaan ya amin. Singa oosilan mo so dagem. 15Ag mo nayarin peteken so pikewet; ag mo nayarin bilangen so anggapo.

16Inkuankod siak a dili, Nagmaliw ak a matalonggaring a too; lalon makabat ak nen say siopaman ya akaonan nanoley ed Jerusalem. Amtak no anto so tuan kakabatan tan pakatalus. 17Ginetmak ya aralen so pandomaan na pakatalus tan inkakulang-kulang, say kakabatan tan say kaambagelan. Balet naamtaan ko a singa ak onoosil ed dagem. 18No dakel so kakabatan mo, dakel met so kapagaan mo; no kaonungay amtam, ontan met so panermenan mo.

Currently Selected:

ECCLESIASTES 1: PnPV

Highlight

Copy