زِکَرئیّا 7
7
رئیاکارلیق محکوم اولور
1داریوش پادشاهین حاکئمئیّتئنئن دؤردونجو ائلئنده، دوقّوزونجو آی اولان کئسلِو آیینین دؤردونجو گونو، زِکَرئیّایا ربّئن سؤزو نازئل اولدو. 2او واخت بِیت‌ائل اهالئسی شَر-اِصِری، رِگِم-مِلِکی و اونون آداملارینی ربّئن حوضورونا گؤندَردئلر کی، یالوارسینلار و 3قوشونلار ربّئنئن اِوئنده اولان کاهئنلردن و پیغمبرلردن سوروشسونلار: «آیا گرک بِشئنجی آیدا، بو چوخ ائل‌لر عرضئنده اتدئیئمئز کئمی، گئنه ده یاس توتوب اؤزوموزو یمکدن اوزاق ساخلایاق؟» 4او واخت منه قوشونلار ربّئنئن بو سؤزو نازئل اولدو: 5«بوتون اؤلکه خالقینا و کاهئنلره دِه: ”یتمئش ائل عرضئنده او زامان کی، بِشئنجی و یدّئنجی آیلاردا اوروج توتوب یاس ساخلاییردینیز، مگر منئم اوچون اوروج توتوردونوز؟ 6یِیئب-ائچدئیئنئز زامان، مگر اؤزونوز اوچون یِیئب-ائچمئردئنئز؟“ 7مگر ربّئن بو سؤزلری هَمَن سؤزلر دیئل کی، اورشلئمئن و اطرافینداکی شهرلرئن اَمئن-آمانلیق ائچئنده یاشایدیغی زامان نِگِب و هامار بؤلگه‌ده ائنسانلارین ساکئن اولدوغو زامان اوّلکی پیغمبرلرئن واسئطه‌سی‌ائله دیئلمئشدی؟»
8زِکَرئیّایا ربّئن بو سؤزو نازئل اولدو: 9«قوشونلار ربّی بله دیئر: ”دوزگون و عدالتله موحاکئمه ادئن. هر کس بئربئرئنه محبّت و مرحمت گؤرسدسئن. 10دول آروادا، یِتئمه، قرئبه و یوخسولا ظولم اتمه‌یئن. اوره‌یئنئزده بئربئرئنئزئن ضئدّئنه پئس نئیّتلر توتمایین.“ 11آنجاق اونلار اشئتمَکدن بویون قاچیرتدیلار، عئنادکارلیقلا آرخا چِوئردئلر، اشئتمه‌مَک اوچون قولاقلارینی باغلادیلار. 12اورَکلرئنی داش کئمی بَرک اتدئلر کی، قوشونلار ربّئن اؤز روحو ائله اوّلکی پیغمبرلر واسئطه‌سی‌ائله گؤندَردئیی قانونو و سؤزلری اشئتمه‌سئنلر. بونا گؤره ده قوشونلار ربّی اونلارا چوخ قضبلَندی. 13قوشونلار ربّی دیئر: ”من چاغیردیغیم زامان، اونلار قولاق آسمادیلار. بونا گؤره ده، اونلار چاغیردیغی زامان، من ده قولاق آسمایاجاغام. 14اونلاری طوفان کئمی تانیمادیقلاری بوتون مئلّتلرئن آراسینا سَپَله‌دئم. آرخادا قویدوقلاری اؤلکه اِله وئران قالدی کی، اورایا گدئب-گلن اولمادی. گؤزل تورپاق خارابالیغا چِوئرئلدی.“»
Currently Selected:
زِکَرئیّا 7: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
