روملو‌لارا 5
5
تاری ائله باریشماق
1بله‌جه ائمان واسئطهسیائله صالح ساییلدیغیمیز اوچون، ربّئمئز عئسا مسئح واسئطهسیائله تاری ائله باریشیمیز وار. 2اله اونون واسئطهسیائله ده ائچئنده دوردوغوموز بو فیضی ائمانلا اَله گتئردئک و تارینین عئزّتئنئن اومئدئنه فخر ادئرئک. 3و آنجاق بو قدر یوخ، موصئبتلرده ده فخر ادئرئک، چونکی بئلئرئک کی، موصئبت تحمّول یارادار، 4تحمّول شخصئیّت، شخصئیّت ده اومئد 5و اومئد اوتاندیرماز؛ چونکی تارینین محبّتی بئزه ورئلن موقدّس روحون واسئطهسیائله اورَکلرئمئزه تؤکولوب. 6چونکی بئز حله ضعئف ائکن، مسئح موعیّن زاماندا گوناهکارلار یولوندا اؤلدو. 7صالح بئر آدامین عوضئنده کئمسه‌نئن اؤلمه‌سی چتئن باش وِرَر؛ یاخشی بئر آدامین عوضئنده بلکه ده بئری اؤلمه‌یه جسارت اتسئن. 8لاکئن تاری بئزه اولان محبّتئنی بونونلا ائثبات ادئر کی، بئز حله گوناهکار ائکن، مسئح بئزئم عوضئمئزده اؤلدو.
9ائندی کی، اونون قانی ائله صالح ساییلمیشیق، بس نه قدر آرتیق اونون واسئطهسیائله ده تارینین قضبئندن خئلاص اولاجاغیق. 10چونکی اگر بئز تارینین دوشمنی اولان حالدا، اونون اوغلونون اؤلمه‌‌سی‌ائله تاری ائله باریشدیق. بس نه قدر داها چوخ، باریشمیش اولان حالدا اونون حیاتی ائله خئلاص اولاجاغیق. 11آنجاق بو قدر ده یوخ، حتّا تاریدا دا ربّئمئز عئسا مسئحئن واسئطهسیائله فخر ادئرئک کی، ائندی اونون واسئطهسیائله باریشیغا نایئل اولموشوق.
اؤلوم و حیات
12بونا گؤره، نجه کی، گوناه تک بئر آدامین واسئطهسیائله و اؤلوم ده گوناهین واسئطهسیائله دونیایا گئردی، اِله‌جه ده اؤلوم بوتون ائنسانلارا گلدی، چونکی هامی گوناه ادئب. 13شرئعتدن قاباق دا دونیادا گوناه وار ائدی، لاکئن شرئعت اولمایان یرده گوناه حسابا ساییلماز. 14آمّا آدمدن موسایا قدر اؤلوم هامییا حؤکمرانلیق اتدی، حتّا اونلارا دا کی، آدمئن گوناهینا بنزه‌ر بئر گوناه اتمه‌دئلر. آدم او گله‌جک آدامین صورتی ائدی.
15آمّا تارینین عوضسئز هدئیّه‌سی تقصئر کئمی دیئل. چونکی اگر بئر نفرئن تقصئری اوزوندن چوخ آدام اؤلدولر، تارینین فیضی و تک بئر آدامین، یعنی عئسا مسئحئن فیضی ائله ورئلن هدئیّه، بئر چوخلارینین اوستونه چوخالیر. 16و تارینین هدئیّه‌سی او تک بئر نفرئن گوناهینین نتئجه‌سی کئمی دیئل: بئر گوناهدان سونرا گلن حؤکم محکومئیّت گتئردی، لاکئن چوخ تقصئرلردن سونرا گلن هدئیّه، صالحلئک گتئردی. 17چونکی اگر اؤلوم بئر تک آدامین تقصئری اوزوندن، او تک آدامین واسئطهسیائله حؤکمرانلیق اتدی، بس نه قدر چوخ او آداملار کی، تارینین بول فیضئنی و صالحلئک هدئیّه‌سئنی قبول ادئرلر، او تک بئر آدام، یعنی عئسا مسئحئن واسئطهسیائله حیاتدا حؤکمرانلیق اده‌جکلر.
18دمه‌لی، بئر گوناه اوزوندن نجه بوتون ائنسانلارا محکومئیّت گلدی، اِله‌جه ده، بئر صالح عمل اوزوندن بوتون ائنسانلارا حیات صالحلئیی گلدی. 19چونکی نجه بئر نفرئن ائطاعتسئزلئیی بئر چوخلارینی گوناهکار اتدی، اِله‌جه ده، تک بئر نفرئن ائطاعتی سایه‌سئنده بئر چوخلاری صالح ساییلاجاقلار. 20شرئعت آرایا گئردی کی، گوناه چوخالسین. لاکئن گوناه چوخالان یرده تارینین فیضی داها دا چوخالدی. 21اله کی، گوناه اؤلومله حؤکمرانلیق اتدئیی کئمی، فیض ده ربّئمئز عئسا مسئحئن واسئطهسیائله، صالحلئیئن واسئطهسیائله ابدی حیات ورمک اوچون حؤکمرانلیق اتسئن.
Currently Selected:
روملو‌لارا 5: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
