مرقوس 7
7
ائنسانی نجئس ادن نه‌دئر؟
(متّا 15:1-20)
1فرئسئلر و اورشلئمدن گلن بعضی عالئملر عئسانین یانینا ییغیلدیلار. 2و اونون شاگئردلرئندن بعضئلرئنی گؤردولر کی، نجئس اَللرله، یعنی یویولمامیش اَللرله چؤرک ییئرلر. 3چونکی فرئسئلر و بوتون یهودئلر اجدادلاریندان قالمیش عادته گؤره، اَللرئنی یاخشی یومایینجا یمک یمزلر. 4و بازاردان گلن واخت دا قوسل اتمه‌یئنجه یمک یمزلر. کاسالارین، چاینئکلرئن، و مئس قابلارین یویولماسی کئمی اؤزگه چوخ عادتلر رئعایت ادئرلر.
5فرئسئلر و عالئملر عئسادان سوروشدولار: «نه اوچون سنئن شاگئردلرئن اجدادلاریمیزین عادتلرئنی رئعایت اتمه‌یئب، نجئس اَللرله چؤرک ییئرلر؟»
6عئسا اونلارا ددی: «اِشَعیا پیغمبر نه یاخشی سئز رئیاکار آداملار باره‌سئنده نبئلئک ادئب! نجه کی، یازیلیب؛
”بو خالق دوداقلاری ائله منه حؤرمت ادئر،
لاکئن اورَکلری مندن چوخ اوزاقدیر.
7عبث یره منه عئبادت ادئرلر،
ائنسانین ددئکلرئنی منئم ددئکلرئم یرئنده تعلئم ورئرلر.“#7:7 اِشَعیا ۲۹:۱۳
8سئز تارینین ددئکلرئنی بوراخیب، ائنسانلارین عادتلرئنی رئعایت ادئرسئنئز.»
9و اونلارا ددی: «سئز، اؤز حدئثلرئنئزی رئعایت اتمک اوچون، تارینین امرئنی نه گؤزل آتیرسینیز. 10چونکی موسا ددی:
”آتا و آنانا حؤرمت ات.“#7:10 چیخیش ۲۰:۱۲ و تثنئیه ۵:۱۶
و
”آتاسینا یا دا آناسینا یامان دئین آدام گرک اؤلومه ورئلسئن.“#7:10 چیخیش ۲۱:۱۷ و لاوئلی‌لر ۲۰:۹
11آمّا سئز دیئرسئنئز: ”اگر بئر آدام آتا-آناسینا دسه؛ مندن گؤزله‌دئیئنئز کؤمک وقف‌دئر، یعنی، هدئیّه آدیندا تارییا تقدئم اولوب.“ 12آرتیق آتا-آناسینا کؤمک اتمک اوچون اونا ائجازه ورمئرسئنئز. 13بله‌جه نسئلدن نسئله کچمئش عادتلرئنئزله، سئز تارینین سؤزونو باطئل ادئب، بونا اوخشار چوخ شیلر ادئرسئنئز.»
14عئسا جاماعاتی گئنه یانینا چاغیریب ددی: «هامینیز منه قولاق آسین و آنلایین. 15هچ بئر شی یوخدور کی، اشئکدن ائنسانین ائچئنه گئرئب اونو نجئس اتسئن. ائنسانی نجئس ادن اونون ائچئندن چیخان شیلردئر. 16اشئتمه‌یه قولاغی اولان اشئتسئن.»
17و جاماعاتی ترک ادئب، اِوه گئرنده شاگئردلری اوندان بو مثلئن معناسینی سوروشدولار. 18عئسا اونلارا ددی: «مگر سئز ده بو قدر نادانسینیز؟! مگر آنلامیرسینیز کی، هچ شی اشئکدن ائنسانین ائچئنه گئرئب اونو نجئس اده بئلمز؟ 19چونکی اوره‌یئنه یوخ، قارنینا گئرئر و اورادان اشئیه چیخیر.» عئسا بو سؤز‌له بوتون یمکلری تمئز سایدی.
20و سؤزونه بله داوام وردی: «ائنسانی نجئس ادن، ائنسانین ائچئندن چیخاندیر. 21چونکی ائچه‌رئدن، ائنسانین اوره‌یئندن‌دئر کی، پئس دوشونجه‌لر، عئفّتسئزلئک، اوغورلوق، جئنایت، زئنا، 22طاماحکارلیق، پئسلئک، حئیله، شهوت، پئس‌گؤز، کوفر، قورور، و سفه‌لئک اشئیه چیخیر؛ 23بوتون بو شیلر ائنسانین ائچئندن چیخیب، اونو نجئس ادئر.»
بئر آروادین ائمانی
(متّا 15:21-28)
24عئسا اورادان چیخیب صور سرحدلرئنه گتدی و بئر اِوه گئرئب هچ کسئن بئلمه‌سئنی ائستمه‌دی. لاکئن گئزلی قالا بئلمه‌دی. 25بئر آرواد کی، کئچئک یاشلی قیزی ناپاک روح الئنده اسئر ائدی، عئسانین حاقّیندا اولان خبرلری اشئدئب گلدی و اونون آیاقلارینا دوشدو. 26بو آرواد یهودی دیئلدی، سورئیه‌‌فئنئقی عئرقئندن ائدی. آرواد گلئب عئسایا یالواردی کی، او ناپاک روحو قیزیندان اشئیه قووسون. 27عئسا اونا ددی: «قوی اوّل اوشاقلار دویسونلار. چونکی اوشاقلارین چؤره‌یئنی آلیب، ائتلره آتماق یاخشی دیئل.» 28آرواد عئسایا جاواب ورئب ددی: «بلی، یارب! آمّا ائتلر ده سوفره آلتیندا اوشاقلارین قیرینتی‌لاریندان یئیرلر.» 29عئسا آروادا ددی: «بو سؤزو ددئیئن اوچون گت، او ناپاک روح قیزینی بوراخیب.» 30آرواد اِوئنه گدئب، ناپاک روحو قیزیندان چیخمیش و قیزینی یاتاغی اوستونده یاتمیش تاپدی.
عئسا کار و پلتک بئر آدامی صاغالدیر
31عئسا گئنه صور سرحدلرئنی ترک ادئب، صیدا بؤلگه‌سئندن دکاپولئس دئیارینین اورتاسینا، جلئل دهنزئنه گلدی. 32کار و پلتک بئر آدامی اونون یانینا گتئردئلر و اونا یالواردیلار کی، اَلئنی اونون اوستونه قویسون. 33عئسا اونو خالقین یانیندان آییریب، بئر یانا چکدی و بارماقلارینی اونون قولاقلارینا قویدو و توپوروب اونون دئلئنه سورتدو. 34و گؤیه باخیب آه چکدی و اونا ددی: «اِفّاتا، یعنی آچیل.» 35او آدامین قولاقلاری آچیلدی و فورَن دئلئنئن دویونو آچیلیب، دوزگون دانیشماغا باشلادی. 36عئسا اونلارا تاپشیردی کی، هچ کئمه بو باره‌ده بئر شی دمه‌سئنلر. آمّا نه قدر جئدّی تاپشیریردی، او قدر ده چوخ یاییردیلار. 37و لاپ چوخ حیرتله‌نئب دیئردئلر: «هر شیی یاخشی ادئر؛ هم کارلاری اشئتدئرئر، هم ده دئلسئزلری دانیشدیریر.»
Currently Selected:
مرقوس 7: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
