مرقوس 14
14
عئسانین اؤلومو یاخینلاشیر
(متّا 26:1-16، لوقا 22:1-6، یوحنّا 11:45-53)
1پاسخا و فطئر بایرامینا ائکی گون قالمیشدی. باش کاهئنلر و دئن عالئملری عئسانی حئیله ائله توتوب اؤلدورمهسی بارهده بئر یول آختاریردیلار. 2آنجاق دیئردئلر: «بو ائش بایرام گونلرئنده اولماسین، یوخسا خالق آراسیندا ائغتئشاش باش وِرَر.»
3عئسا بیتعنیادا، جوذاملی شمعونون اِوئنده، سوفره باشیندا اوتورموشدو کی، بئر آرواد مرمر قابدا چوخ باهالی خالئص سونبول یاغی گتئردی و قابی سیندیریب، یاغی عئسانین باشینا تؤکدو. 4بعضئلری گئلیلهنئب آرالاریندا ددئلر: «بو یاغ نه اوچون بله ائصراف اولوندو؟ 5چونکی بو یاغ اوچ یوز دئناردان#14:5 بئر فحلهنئن بئر ائلّئک اوجرتی چوخ ساتیلیب فاغیرلارا ورئله بئلردی.» و آروادا دیئنمهیه باشلادیلار.
6آمّا عئسا ددی: «اونونلا ائشئنئز اولماسین! نه اوچون اونو ائنجئدئرسئنئز؟ او، منه یاخشیلیق اتدی. 7چونکی فاغیرلار دائم سئزئن یانینیزدادیرلار و نه زامان ائستیهسئنئز، اونلارا یاخشیلیق اده بئلرسئنئز. لاکئن من، دائم سئزئن یانینیزدا دیئلم. 8آرواد الئندن گلنی اتدی و باسدیریلماق اوچون منئم بدنئمی ائرهلئدن یاغلادی. 9دوغروسونو سئزه دیئرم؛ بو خوش خبر دونیانین هاراسیندا موژده ورئلسه، بو آروادین اتدئیی ائشدن ده یاد ادئلهجک.»
10اونائکی شاگئرددن بئری، ائسکاریوتلو یهودا، باش کاهئنلرئن یانینا گتدی کی، عئسانی اونلارا تسلئم اتسئن. 11کاهئنلر بونو اشئدنده سوئندئلر و یهودایا پول وعدهسی وردئلر. او دا موناسئب بئر فورصت آختاریردی کی، عئسانی اونلارین الئنه ورسئن.
ربّئن ضئیافتی
(متّا 26:17-30، لوقا 22:7-23، یوحنّا 13:21-30)
12فطئر بایرامینین اوّلئنجی گونو کی، پاسخانین قوربان قوزوسو او گونده کسئلردی، شاگئردلر عئسایا ددئلر: «پاسخا یمهیئنی هارادا یمک ائستهیئرسن؟ گدئب هارادا حاضیرلایاق؟»
13عئسا شاگئردلرئندن ائکئسئنی گؤندَرئب اونلارا ددی: «شهره گدئن، سهنگله سو داشییان بئر نفر سئزه راست گلر. اونون دالینجا گدئن. 14بو آدام هارایا گئرسه، او اِوئن صاحئبئنه دیئن: ”اوستاد دیئر: هارادادیر او حاضیرلانان اوتاق کی، شاگئردلرئمله بئر یرده پاسخا یمهیئنی اورادا یِیئم؟“ 15او دا سئزه بالاخانادا دؤشَنمئش و حاضیرلانمیش بئر اوتاق گؤرسهدر. پاسخا یمهیئنی اورادا حاضیرلایین.»
16شاگئردلر چیخیب، شهره گتدئلر و هر شیی اونلارا ددئیی کئمی تاپیب، پاسخا یمهیئنی حاضیرلادیلار. 17آخشام اولاندا عئسا اونائکئلرله گلدی. 18سوفره باشینا اوتوروب یمک یئینده، عئسا اونلارا ددی: «دوغروسونو سئزه دیئرم، سئزدن بئری، منئمله سوفره باشیندا اوتورانلاردان بئری، منه خیانت ادهجک.» 19شاگئردلر پرت اولدولار و بئر-بئر اوندان سوروشدولار: «یقئن کی، من دیئلم؟»
20عئسا اونلارا ددی: «او آدام اونائکئلردن بئریدئر، او کی، اَلئنی منئمله اوزادیب، چؤرهیئنی کاسایا باتیریر. 21چونکی ائنسان اوغلو اؤزو حاقّیندا یازیلمیش اولدوغو کئمی گدئر، لاکئن وای او آدامین حالینا کی، ائنسان اوغلو اونون الیائله تسلئم اولونور! او آدام آنادان اولماسایدی، اونا داها یاخشی اولاردی!»
22یمک یئینده عئسا چؤرهیی گؤتوروب شوکور اتدی و بؤلوب شاگئردلره وردی و اونلارا ددی: «آلین، بو، منئم بدنئمدئر.»
23و بئر پئیالا گؤتوردو و شوکور ادئب اونلارا وردی و هامی اوندان ائچدی. 24عئسا اونلارا ددی: «بو منئم قانیمدیر، عهدئن قانی کی، چوخ آداملار یولوندا تؤکولهجک. 25دوغروسونو سئزه دیئرم، اوزوم محصولوندانآرتیق ائچمیهجهیم، او گونه قدر کئمی کی، تارینین پادشاهلیغیندا تزهسئنی ائچئم.»
26و اونلار بئر ماهنی اوخویاندان سونرا زیتون داغینا گتدئلر.
27عئسا اونلارا ددی: «هامینیز بودرهیئب دوشهجکسئنئز. چونکی یازیلیب؛
”چوبانی ووراجاغام
و قویونلار داغیلاجاقلار.“#14:27 زِکَرئیّا ۱۳:۷
28آمّا من، دئرئلندن سونرا سئزدن قاباق جلئله گدهجهیم.»
29لاکئن پطروس اونا ددی: «هامی بودرهیئب دوشسه ده، من دوشمهیهجهیم.»
30عئسا پطروسا ددی: «دوغروسونو دیئرم؛ بو گون، اله بو گجه خوروز ائکی دفه بانلامامیش، سن منی اوچ دفه ائنکار ادهجکسن.»
31آمّا پطروس داها آرتیق تأکئد ادئب ددی: «اگر سنئنله بئرلئکده اؤلمک منه لازیم گلسه بله، سنی اصلا ائنکار اتمهرم.» آیری شاگئردلر ده اله ددئلر.
جِتسئمانی باغیندا
(متّا 26:36-46، لوقا 22:39-46)
32اونلار جِتسئمانی آدیندا بئر یره گلدئلر. عئسا شاگئردلرئنه ددی: «سئز بورادا اوتورون اله کی، من دوعا ادئم.» 33و پطروس، یعقوب، و یوحنّانی اؤزو ائله گؤتوردو. درئن سیخینتی و اَلَم عئسانین جانینا دوشدو. 34اونلارا ددی: «جانیم اؤلوم درجهسئنده کدرلیدئر. بورادا قالین و اویاق اولون.» 35و اؤزو بئر آز ائرهلی گدئب یره دوشدو و دوعا ادئردی کی، اگر مومکوندور، او ساعات اوندان کچسئن. 36و دیئردی: «آبّا#14:36 «آبّا» اَرامی دئلئنده آتا معناسیندادیر- آتا، سنه هر شی مومکوندور. بو پئیالانی مندن اوزاقلاشدیر. لاکئن منئم ائستهدئیئم یوخ، سنئن ائستهدئیئن اولسون.»
37عئسا قاییدیب شاگئردلری یوخودا تاپدی و پطروسا ددی: «شمعون یاتیبسان؟ بئر ساعات اویاق قالا بئلمهدئن؟ 38اویاق قالیب دوعا ادئن کی، ائمتاحانا#14:38 و یا «وسوسه» دوشمهیهسئنئز. دوغرودان دا روح ائستهیئر، لاکئن بدن ضعئفدئر.» 39و گئنه گدئب دوعا اتدی و همن سؤزلری ددی. 40و گلئب گئنه ده اونلاری یوخولامیش تاپدی. چونکی گؤزلری آغیرلاشمیشدی و اونا نه جاواب ورهجکلرئنی بئلمئردئلر.
41عئسا اوچونجو دفه گلئب، اونلارا ددی: «حله ده یاتیبسینیز؟ حله ده ائستئراحت ادئرسئنئز؟ آرتیق بسدئر. واخت گلدی؛ باخ، ائنسان اوغلو گوناهکارلارین الئنه ورئلئر. 42دورون گدک. باخین، منه خیانت ادن یاخینلاشیر.»
عئسا توتولور
(متّا 26:47-56، لوقا 22:47-53، یوحنّا 18:3-12)
43عئسا، بو سؤزلری دئین زامان، اونائکئلردن بئری اولان یهودا و اونونلا بئرلئکده، باش کاهئنلر، دئن عالئملری و آغساقّاللار طرفئندن گؤندَرئلمئش بؤیوک بئر دسته گلدی. اونلار قیلینجلار و دینکلرله سئلاحلانمیشدیلار. 44عئسانی تسلئم ادن اونلارلا قرارلاشیب دمئشدی: «کئمی اؤپسم، عئسا اودور. اونو توتون و احتئیاطلا آپارین.» 45یهودا، گلدئیی آندا عئسایا یاخینلاشیب «اوستاد» دئیه-دئیه اونو اؤپدو. 46اونلار عئسانی یاخالاییب توتدولار. 47لاکئن یانیندا دورانلاردان بئری قیلینجی چکدی و باش کاهئنئن قولونون قولاغینی ووروب کسدی. 48عئسا اونلارا ددی: «منی توتماق اوچون اله قیلنجلار و دینکلرله گلئبسئنئز کی، اله بئل اوغرو توتورسونوز؟! 49من هر گون معبدده تعلئم ورنده یانینیزدا ائدئم، آمّا منی توتمادینیز. لاکئن قوی یازیلار یرئنه یتئشسئن.»
50شاگئردلرئن هامیسی عئسانی قویوب قاچدیلار. 51عئسانین دالینجا آنجاق چیلپاق بدنئنی کتان اؤرتویه سرئمئش بئر جاوان گدئردی. اونلار اونو دا توتدولار. 52لاکئن او، کتان اؤرتویو بوراخیب، چیلپاق قاچدی.
53عئسانی باش کاهئنئن یانینا آپاردیلار. بوتون باش کاهئنلر، آغساقّاللار، و دئن عالئملری اورایا ییغیلدیلار. 54پطروس باش کاهئنئن حیطئنئن ائچهرئسئنه قدر اوزاقدان عئسانین دالینجا گتدی و اورادا موحافئظلرله اود یانیندا اوتوروب اؤزونو قیزیشدیریردی.
55بو واخت، باش کاهئنلر و بوتون مجلئسده اولانلار عئسانی اؤلدورمک اوچون اونون ضئدّئنه شهادت آختاریردیلار، لاکئن تاپمیردیلار. 56گرچی بئر چوخلاری اونون ضئدّئنه یالاندان شهادت ورئردئلر، آمّا بو شهادتلر بئربئری ائله راست گلمئردی. 57بعضئلری قالخیب عئسانین ضئدّئنه یالاندان شهادت ورئب دیئردئلر: 58«بئز اشئتدئک کی، دیئردی: ”الله تئکئلمئش بو معبدی ییخیب، الله تئکئلمهمئش اؤزگه بئرئنی اوچ گونده بئنا ادهرم.“» 59لاکئن اونلارین شهادتلری بئربئری ائله راست گلمئردی.
60باش کاهئن اورتادا آیاغا قالخیب، عئسادان سوروشدو: «هچ جاواب ورمئرسن؟ بونلارین سنئن ضئدّئنه وردئکلری شهادت نهدئر؟»
61آمّا عئسا سوکوت ادئب، اونون سوآلینا جاواب ورمهدی. باش کاهئن گئنه اوندان سوروشوب ددی: «آیا سن موتبارک تارینین اوغلو مسئحسن؟»
62عئسا ددی: «منم. و سئز ائنسان اوغلونو گؤرهجکسئنئز کی، قادئر اولانین صاغیندا اوتوروب بولودلار آراسیندا گلئر.»
63باش کاهئن پالتارینی جیریب ددی: «داها شاهئدلره نه احتئیاجیمیز وار؟ 64کوفرونو اشئتدئنئز. سئز نه دیئرسئنئز؟»
اونلارین هامیسی عئسانی اؤلومه محکوم اتدئلر. 65و بعضئلری اونون اوستونه توپورمهیه باشلادیلار. عئسانین گؤزلرئنی باغلاییب اونا یوموروق وورا-وورا دیئردئلر: «نبئلئک ات!» و موحافئظلر اونو توتوب یاناقلارینا شئلّه ووروردولار.
66پطروس آشاغیدا، حیطده ائکن، باش کاهئنئن کنئزلرئندن بئری گلدی 67و پطروسو اود یانیندا قیزیشان حالدا گؤرنده، اونا دئقّتله باخیب ددی: «سن ده او ناصئرهلی عئسا ائله ائدئن.»
68لاکئن پطروس ائنکار ادئب ددی: «سنئن نه ددئیئنی بئلمئرم و آنلامیرام.» و چؤله، دالانا چیخدی. 69کنئز قیز اونو گئنه گؤروب، اورادا دورانلارا ددی: «بو آدام، اونلاردان بئریدئر.» 70آمّا پطروس گئنه ده ائنکار اتدی. بئر آز سونرا اورادا دورانلار پطروسا ددئلر: «جلئللی اولدوغون اوچون دوغرودان دا سن اونلاردان بئرئسن.»
71لاکئن پطروس اؤزونه لعنت ادئب، آند ائچمهیه باشلادی: «ددئیئنئز او آدامی تانیمیرام.» 72و او آندا خوروز ائکئنجی دفه بانلادی. پطروس عئسانین اونا ددئیی سؤزو خاطیرلادی کی، «خوروز ائکی دفه بانلامامیشدان، سن اوچ دفه منی ائنکار ادهجکسن.» و هؤنکور-هؤنکور آغلاماغا باشلادی.
Currently Selected:
مرقوس 14: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.