متّا 4
4
عئسا وسوسه اولونور
(مرقوس 1:12-13؛ لوقا 4:1-13)
1بوندان سونرا موقدّس روح عئسانی چؤله آپاردی کی، ائبلئس طرفئندن وسوسه اولونسون. 2عئسا قیرخ گون-قیرخ گجه اوروج توتاندان سونرا آجیقدی. 3اونو وسوسه ادن، اونون یانینا گلئب، ددی: «اگر تارینین اوغلوسان، امر ات کی، بو داشلار چؤره‌یه دؤنسون.»
4عئسا جاواب ورئب، ددی: «یازیلیب کی،
”ائنسان آنجاق چؤرکله یوخ،
تارینین آغزیندان چیخان هر بئر سؤز‌له یاشار.“»#4:4 تَثنئیه ۸:۳
5سونرا ائبلئس اونو موقدّس شهره گتئردی و معبدئن بورجو اوستونه آپاریب، 6ددی: «اگر تارینین اوغلوسان، اؤزونو آشاغی آت؛ چونکی یازیلیب کی،
”او سنئن حاقّیندا ملکلرئنه امر اده‌جک،
و اونلار سنی اللری اوستونده گؤتوره‌جکلر کی،
مبادا آیاغینی داشا ووراسان.“»#4:6 مَزمور ۹۱:۱۱ و ۱۲
7عئسا اونا جاواب ورئب ددی: «گئنه ده یازیلیب کی،
”رب تارینی ائمتاحانا چکمه.“»#4:7 تَثنئیه ۶:۱۶
8ائبلئس گئنه عئسانی چوخ اوجا بئر داغین اوستونه آپاردی و اونا دونیانین بوتون اؤلکه‌لرئنی و اونلارین بوتون شؤوکتلرئنی گؤرسه‌دئب، 9ددی: «اگر یره دوشوب، منه سجده اده‌سن، بونلارین هامیسینی سنه وره‌رم.»
10عئسا اونا ددی: «ردّ اول، شیطان! چونکی یازیلیب؛
”تارین ربّه سجده ات
و آنجاق اونا خئدمت اله.“»#4:10 تَثنئیه ۶:۱۳
11او زامان ائبلئس اونو بوراخدی و ملکلر گلئب، اونا خئدمت اتدئلر.
عئسا وعظ اتمه‌یه باشلاییر
(مرقوس 1:14-15؛ لوقا 4:14-15)
12عئسا یحیانین توتولماسینی اشئدن واخت جلئله قاییتدی. 13و ناصئره‌نی ترک ادئب، زِبولون و نفتالی بؤلگه‌سئنده گؤل قیراغیندا اولان کفرناحومدا ساکئن اولدو کی، 14اِشَعیا پیغمبرئن واسئطه‌سئله دیئلن سؤز یرئنه یتئشسئن:
15«زبولون دئیاری، نفتالی دئیاری،
دهنز قیراغی یولدا،
اوردون چایینین او تاییندا،
قیری‌یهودئلرئن جلئلئنده!
16قارانلیقدا یاشایان خالق بؤیوک بئر نور گؤردو،
اؤلومون کؤلگه سالدیغی دئیاردا یاشایانلارا ائشیق دوغدو.»
17او واختدان عئسا وعظ اتمه‌یه باشلاییب، ددی: «تؤوبه ادئن، چونکی گؤیون پادشاهلیغی یاخیندیر.»
ائلک شاگئردلر
(مرقوس 1:16-20؛ لوقا 5:1-11)
18عئسا جلئل گؤلونون قیراغیندا گزنده، ائکی قارداشی، پِطروس آدلانان شَمعونو و اونون قارداشی آندریاسی گؤردو کی، گؤله تور آتیردیلار. اونلار بالیق اووچوسو ائدئلر. 19عئسا اونلارا ددی: «منئم دالیمجا گلئن. من سئزی ائنسان اووچوسو اِده‌رم.» 20اونلار دا او آندا تورلارینی قویوب اونون دالینجا گتدئلر. 21اورادان ائره‌لی گدئب، داها ائکی قارداشی، زِبِدیئن اوغلو یعقوب و قارداشی یوحنّانی گؤردو کی، آتالاری زِبِدی‌‌له قاییقدا تورلارینی تعمئر ادئرلر. و اونلاری چاغیردی. 22اونلار دا او آندا قاییق و آتالارینی قویوب عئسانین دالینجا گتدئلر.
عئسا ناخوش آداملارا شفا ورئر
(لوقا 6:17-19)
23عئسا بوتون جلئلی دولانیب، اونلارین کنئسه‌لرئنده تعلئم ورئردی و گؤیون پادشاهلیغینین موژده‌سئنی وعظ ادئب، خالق آراسیندا هر جور مرض و ناخوشلوغو صاغالدیردی. 24اونون حاقّینداکی خبر بوتون سورئیه دئیارینا یاییلدی و جوربه‌جور ناخوشلوق و دردلره دوچار اولان ناخوشلاری، ناپاک روحلارا توتولانلاری، غشّئلری، و ائفلئجلری اونون یانینا گتئردئلر و اونلارا شفا وردی. 25جلئلدن، دکاپولئسدن#4:25 یعنی «اون شهر»، اورشلئمدن، یهودئیه‌دن، و اوردون چایینین اوتاییندان بؤیوک بئر جاماعات اونون دالینجا گدئردی.
Currently Selected:
متّا 4: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
