متّا 21
21
عئسا اورشلئمه گئرئر
(مرقوس 11:1-11، لوقا 19:28-40، یوحنّا 12:12-19)
1اونلار اورشلئمه یاخینلاشیب زیتون داغینین یانیندا اولان بیت فاجی‌یا گلن زامان، عئسا ائکی شاگئردئنه بو سؤزلری دیئب اونلاری گؤندَ‌ردی: 2«قاباغینیزداکی کنده گدئن. گئردئکده باغلی بئر اششکله بئر سیپانی تاپاجاقسینیز. اونلاری آچیب منه گتئرئن. 3اگر کئمسه سئزه بئر شی دسه، دئیرسئنئز کی، ربّئن بونا احتئیاجی وار، آنَن گری گؤندَ‌ره‌جک.»
4بو، اونون اوچون باش وردی کی، پیغمبر واسئطه‌سئله دیئلن سؤز یرئنه یتئشسئن:
5«صحیون قیزینا دیئن،
باخ، پادشاهین سنئن یانینا گلئر؛
او حلئمدئر، اِششه‌یه مئنمئش،
سیپایا مئنمئش، اششه‌یئن بالاسینا مئنمئش.»#21:5 زِکَرئیّا ۹:۹. بورادا صحیون قیزیندان مقصد اورشلئم شهری‌دئر. (باخ. اِشَعیا ۶۲ خوصوصَن ده ۱۱ئنجی آیه)
6شاگئردلر گدئب عئسانین اونلارا ددئیی کئمی اتدئلر. 7اششکله سیپانی گتئردئلر، پالتارلارینی اونلارین اوستونه قویدولار و عئسا اونلارین اوستونه مئندی. 8جاماعاتین چوخلاری پالتارلارینی یولا دؤشه‌دئلر و اؤزگه‌لر ده آغاجلارین بوداقلارینی کسئب یولا سردئلر. 9عئسانین قاباغیندا گدن و دالینجا گلن جاماعات قیشقیریردیلار:
«هوسانّا#21:9 اَرامی بئر سؤز. معناسی: «یالواریریق نئجات وِر.» سورالار بو سؤزدن حمد-ثنا اوچون ائستئفاده اولونوردو.، داوودون اوغلونا!
ربّئن آدیندا گلن موبارک اولسون!#21:9 مزمور ۱۱۸:۲۶
لاپ اوجالاردا هوسانّا!»
10عئسانین اورشلئمه گئردئیی زامان، بوتون شهر جوشا گلئب سوروشدو: «بو کئمدئر؟» 11جاماعات دیئردی: «بو جلئلئن ناصئره شهرئندن اولان عئسا پیغمبردئر.»
عئسا آلیش-ورئش ادنلری معبددن قووور
(مرقوس 11:15-19، لوقا 19:45-48، یوحنّا 2:13-22)
12عئسا معبده گئردی و آلیش-ورئش ادنلرئن هامیسینی اشئیه قوودو؛ صرّافلارین مئزلرئنی و گؤیرچئن ساتانلارین کورسولرئنی چوئردی. 13و اونلارا ددی: «یازیلیب کی، ”منئم اِوئمه دوعا اِوی دیئله‌جک، آمّا سئز اونو اوغرولار یوواسینا دؤندَرئرسئنئز.“»#21:13 اِشَعیا ۵۶:۷#21:13 اِرِمیا ۷:۱۱
14معبدده کورلار و توپاللار اونون یانینا گلدئلر و عئسا اونلارا شفا وردی. 15لاکئن باش کاهئنلر و دئن عالئملری اونون عجایئب ائشلرئنی و معبدده «هوسانّا، داوودون اوغلونا» باغیران اوشاقلاری گؤرن واخت، قضبله‌نئب ددئلر: 16«بونلارین نه ددئکلرئنی اشئدئرسن؟»
عئسا ددی: «بلی، مگر هچ اوخوماییبسینیز کی،
”اوشاقلارین و سود اَمَنلرئن آغزیندان حمد تؤکدوردون؟!“»#21:16 مزمور ۸:۲
17و اونلاری قویوب شهردن کنارا، بیت عنیایا گتدی و گجه‌نی اورادا قالدی.
میوه‌سئز انجئر آغاجی
(مرقوس 11:12-14، 20-24)
18سحر ارکن عئسا شهره قاییداندا آجیقدی. 19یول قیراغیندا بئر انجئر آغاجی گؤروب اونا یاخینلاشدی، آمّا اوندا یارپاقدان باشقا هچ بئر شی تاپمادی. او زامان اونا ددی: «قوی بوندان سونرا سندن هچ میوه چیخماسین!» و انجئر آغاجی او آندا قورودو. 20شاگئردلری بونو گؤرن واخت، تعجّوب ادئب ددئلر: «انجئر آغاجی بئر آندا نجه قورودو؟!» 21عئسا اونلارا جاواب ورئب ددی: «دوغروسونو سئزه دیئرم: اگر ائمانینیز اولوب شوبهه اتمیه‌سئنئز، نه ائنکی انجئر آغاجینا ادئله‌نی اده بئلرسئنئز، بو داغا دئیه‌سئنئز ده کی، ”قالخ، دهنزه آتیل“، اولاجاقدیر. 22اگر ائمان اده‌سئنئز، دوعادا نه ائستیه‌سئنئز، آلاجاقسینیز.»
عئسانین ائقتئداری
(مرقوس 11:27-33، لوقا 20:1-8)
23عئسا معبده گئرئب اورادا تعلئم ورئردی کی، باش کاهئنلر و خالقین آغساقّاللاری اونون یانینا گلئب ددئلر: «بو ائشلری نه ائقتئدارلا ادئرسن؟ و سنه بو ائقتئداری کئم ورئب؟»
24عئسا اونلارا جاواب ورئب ددی: «من ده سئزدن بئر سوآل سوروشاجاغام. اگر منه جاواب وره‌سئنئز، او زامان من ده سئزه دئیه‌جه‌یم کی، بو ائشلری کئمئن ائقتئداری‌ائله گؤرورم. 25یحیانین تعمئدی هارادان ائدی؟ گؤیدن ائدی یوخسا ائنسانلاردان؟»
اونلار آرالاریندا مصلحتله‌شئب ددئلر: «اگر ”گؤیدن ائدی دِسَک“، دئیه‌جک: ”بس نه اوچون اونا ائمان گتئرمه‌دئنئز؟“ 26آمّا اگر ”ائنسانلاردان ائدی دِسَک“، جاماعاتدان قورخوروق، چونکی هامی یحیانی بئر پیغمبر ساییر.» 27اونا گؤره ده عئسایا بله جاواب وردئلر: «بئلمئرئک.»
عئسا دا اونلارا ددی: «من ده سئزه دمئرم کی، بو ائشلری نه ائقتئدارلا گؤرورم.
ائکی اوغول مثلی
28بونا نجه دوشونورسونوز؟ بئر آدامین ائکی اوغلو وار ائدی. بئرئنجئسئنئن یانینا گدئب ددی: ”اوغول، بو گون گت اوزوم باغیندا ائشله.“
29اوغول جاواب وردی: ”ائسته‌مئرم.“ لاکئن سونرا، پشمان اولوب گتدی. 30آدام ائکئنجئسئنئن یانینا دا گلئب همن سؤزو ددی. اوغول جاواب وردی: ”گده‌رم، آغا.“ آمّا گتمه‌دی. 31بو ائکئسئندن هانسی آتاسینین ائسته‌دئیئنی یرئنه یتئردی؟»
جاواب وردئلر: «بئرئنجئسی»
عئسا اونلارا ددی: «دوغروسونو سئزه دیئرم: باج ییغانلار و فاحئشه‌لر تارینین پادشاهلیغینا سئزدن قاباق گئررلر. 32چونکی یحیا سئزه صالحلئک یولوندا گلدی، سئز اونا ائنانمادینیز. لاکئن باج ییغانلار و فاحئشه‌لر ائناندیلار. بونو گؤرندن سونرا بله پشمان اولوب اونا ائنانمادینیز.
پئس باغبانلار مثلی
(مرقوس 12:1-12، لوقا 20:9-19)
33آیری بئر مثل اشئدئن: بئر مالئک وار ائدی کی، اوزوم باغی اکدی. باغین اطرافینا حاصار چکدی. اوزومو سیخماق اوچون ائچئنده بئر حوووض قازدی و بئر بورج تئکئب باغی باغبانلارا ائجاره‌یه وردی و سفره چیخدی. 34محصول زامانی یتئشن واخت، باغبانلارین یانینا نؤکرلرئنی گؤندَ‌ردی کی، محصولو آلسینلار. 35آمّا باغبانلار نؤکرلری توتوب بئرئنی دؤیدولر، بئرئنی اؤلدوردولر، بئرئنی ده داشا باسدیلار. 36باغ صاحئبی بو دفه اوّلکئندن داها چوخ نؤکر گؤندَ‌ردی. باغبانلار بونلارا دا اله اتدئلر. 37آخیردا باغ صاحئبی اونلارین یانینا اوغلونو گؤندَ‌ردی و دیئردی کی، اوغلوما حؤرمت اِدَرلر.
38لاکئن باغبانلار، اوغولو گؤرن واخت، آرالاریندا ددئلر: ”وارئث بودور؛ گلئن اونو اؤلدورک و مئراث بئزه قالسین.“
39و اوغولو توتدولار، باغدان اشئیه سالیب اؤلدوردولر. 40بله‌جه، باغین صاحئبی گلنده بو باغبانلارا نه اده‌جک؟»
41اونلار عئسایا ددئلر: «بو خائنلری قورخولو بئر اؤلومه محکوم اده‌جک، اوزوم باغینی دا اؤزگه باغبانلارا ائجاره‌یه وره‌جک کی، محصولو اونا اؤز واختیندا ورسئنلر.»
42عئسا اونلارا ددی: «مگر موقدّس یازیلاردا اوخوماییبسینیز کی:
”بنّالارین ردّ اتدئیی داش
کونجون باش داشی اولدو.
بو ربّئن ائشی‌دئر،
و گؤزوموزده حیرتلی گؤرونور.“#21:42 مزمور ۱۱۸:۲۲ و ۲۳
43بونا گؤره، سئزه دیئرم کی، تارینین پادشاهلیغی سئزدن آلینیب اله بئر خالقا ورئله‌جک کی، حاصئلی یتئشدئره بئلسئن. 44بو داشین اوستونه دوشَن تئکه-تئکه اولاجاق، آمّا داش کئمئن اوستونه دوشسه، اونو اَزه‌جکدئر.»
45باش کاهئنلر و فرئسئلر اونون مثل‌لرئنی اشئدن واخت، آنلادیلار کی، بو سؤزلری اونلارین حاقّیندا دیئر. 46اونو توتماغا قصد اتدئلر، لاکئن جاماعاتدان قورخدولار، چونکی اونلار عئسانی پیغمبر حساب ادئردئلر.
Currently Selected:
متّا 21: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
