متّا 13
13
اکئنچی مثلی
(مرقوس 4:1-20، لوقا 8:4-15)
1او گون عئسا اِودن چیخدی و گدئب، گؤل قیراغیندا اوتوردو. 2یانینا اله چوخ آدام ییغیلدی کی، اؤزو بئر قاییغا مئنئب، اورادا اَیلَشدی و بوتون خالق ساحئلده دوردو. 3عئسا اونلارا مثللرله چوخ شی دانیشیب، دیئردی: «باخین، بئر اکئنچی توخوم سپمه‌یه چیخدی. 4سَپَن واخت توخوملاردان بعضئسی یول قیراغینا دوشدو و قوشلار گلئب اونلاری یدئلر. 5بعضئسی تورپاغی چوخ اولمایان داشلیق یرلره دوشدو. تورپاغین درئنلئیی اولمادیغینا گؤره، تز بئتدی. 6لاکئن گون چیخان واخت سولدو و کؤکو اولمادیغینا گؤره قورودو. 7توخوملاردان بعضئسی تئکانلار آراسینا دوشدو. تئکانلار بئتئب، اونلاری بوغدولار. 8آمّا قالانلاری یاخشی تورپاغا دوشدولر؛ بعضئسی بئره یوز، بعضئسی بئره آلتمیش، بعضئسی ده بئره اوتوز ثمره وردئلر. 9قولاغی اولان اشئتسئن.»
10شاگئردلر یاخینلاشیب، عئسایا ددئلر: «نه اوچون اونلارا مثللرله دانیشیرسان؟»
11عئسا جاوابیندا اونلارا ددی: «سئزه بو قابئلئیّت ورئلئب کی، گؤیلرئن پادشاهلیغینین سئرّلرئنی آنلاسینیز، لاکئن اونلارا ورئلمه‌یئب. 12چونکی کئمده وارسا، اونا داها چوخ ورئله‌جک و او بوللوق ائچئنده اولاجاقدیر؛ آمّا کئمده یوخسا، الئنده اولان دا اوندان آلیناجاق. 13اونلارا مثللرله دانیشدیغیمین سببی بودور؛ دوغرودان دا کی،
”گؤردوکلری حالدا گؤرمزلر،
اشئتدئکلری حالدا اشئتمزلر،
آنلامازلار دا.“
14اِشَعیا پیغمبرئن اونلارین حاقّیندا ددئیی سؤز یرئنه یتئشئر کی، دمئشدی:
”قولاغینیزلا اشئدرسئنئز، لاکئن باشا دوشمزسئنئز،
گؤزلرئنئزله باخارسینیز، آمّا گؤرمزسئنئز،
15چونکی بو خالقین اوره‌یی برک اولوب.
قولاقلاری ائله آغیر اشئدئرلر،
گؤزلرئنی یوموبلار کی،
گؤزلری ائله گؤرمه‌سئنلر،
قولاقلاری ائله اشئتمه‌سئنلر،
اورَکلری ائله آنلاییب منه دؤنمه‌سئنلر کی،
من اونلارا شفا ورئم.“#13:15 اِشَعیا ۶:۹ و ۱۰
16لاکئن سئزئن گؤزلرئنئزئن خوش حالینا، چونکی گؤرورلر؛ قولاقلارینیزین خوش حالینا، چونکی اشئدئرلر. 17دوغروسونو سئزه دیئرم: چوخ پیغمبرلر و صالح آداملار بو آرزودا اولدولار کی، سئزئن گؤردویونوز شیلری گؤرسونلر، آمّا گؤرمه‌دئلر؛ سئزئن اشئتدئیئنئز شیلری اشئتسئنلر، آمّا اشئتمه‌دئلر.
18ائندی سئز اکئنچی حاقّینداکی مثله قولاق آسین: 19کئم پادشاهلیق باره‌ده‌کی کلامی اشئدئب آنلاماسا، شرئر گلئب اوره‌یئنه سَپئلمئشی اوغورلایار. یول قیراغینا سپئلمئش بودور. 20داشلیق یرلره سپئلمئش اولان دا اودور کی، کلامی اشئدئر و آنَن اونو شادلیقلا قبول ادئر. 21لاکئن اؤز-اؤزونده کؤک سالمادیغینا گؤره، آز بئر مودّت قالیر و او زامان کی، بو کلامدان اؤتری دارلیق و اذئیّت باش ورئر، آنَن بودره‌یئر. 22تئکانلار آراسینا سپئلمئش اولان اودور کی، کلامی اشئدئر؛ آمّا دونیانین فئکئری و وارلیلیغین توولاتماسی کلامی بوغور و کلام ثمره‌سئز اولور. 23یاخشی تورپاغا سپئلمئش اولان دا اودور کی، کلامی اشئدئر، آنلاییر؛ بعضئسی بئره یوز، بعضئسی بئره آلتمیش، بعضئسی ده بئره اوتوز ثمره ورئر.»
آلاق اوت مثلی
24عئسا اونلارا آیری بئر مثل ده نقل ادئب ددی: «گؤیلرئن پادشاهلیغی او آداما دا بنزه‌ر کی، زمئسئنه یاخشی توخوم سپدی. 25آمّا آداملار یاتاندان سونرا، اونون دوشمنی گلدی و بوغدالارین آراسینا آلاق اوت سپئب، گتدی. 26بوغدا بؤیویوب ثمره وردئیی زامان، آلاقلار دا گؤروندو. 27زمی صاحئبئنئن قوللاری گلئب اونا ددئلر:
”آغا، مگر سن زمئیه یاخشی توخوم سپمه‌دئن، بس آلاق اوت هارادان عمله گلئب؟“
28آغا قوللارا ددی: ”بونو دوشمن ادئب.“
قوللار اونا ددئلر: ”اگر بله‌دئر، ائسته‌یئرسن گدئب اونلاری ییغاق؟“
29زمی صاحئبی ددی:
”خیر، مبادا آلاقلاری ییغان واخت، اونلارلا بوغدانی دا قوپارداسینیز. 30قویون بئچئنه قدر هر ائکئسی ده بؤیوسونلر. بئچئن واختی من بئچئنچئلره دئیه‌رم: اوّلجه آلاق اوتلاری ییغین و یاندیرماق اوچون اونلاری دسته-دسته باغلایین. آمّا بوغدانی آنبارلاریما ییغین.“»
خاردال توخومونون مثلی
(مرقوس 4:30-34، لوقا 13:18-21)
31عئسا اونلارا آیری بئر مثل ده نقل ادئب ددی: «گؤیلرئن پادشاهلیغی خاردال توخومونا بنزه‌ر کی، بئر آدام گؤتوروب، اونو زمئسئنده اکدی. 32خاردال، بوتون توخوملارین لاپ کئچئیی اولسا دا، بؤیوین واخت باغچادا بئتن بوتون بئتکئلردن بؤیوک اولار؛ لاپ آغاج بویدا اولار. اله کی، گؤیون قوشلاری گلئب، اونون بوداقلاریندا یووا تئکرلر.»
33عئسا اونلارا آیری بئر مثل ده ددی: «گؤیلرئن پادشاهلیغی خمئرمایاسینا بنزه‌ر کی، بئر آرواد اونو گؤتوروب، اوچ اؤلچو#13:33 اصل یونانی دئلئنده «اوچ ساتا» کی، تقرئبن ۲۲ لئتر اولار. اون ائچئنه قاتدی، اله کی، بوتون خمئر تورشولادی.»
34عئسا بوتون بو شیلری خالقا مثللرله دیئردی و اونلارا مثلسئز هچ بئر شی دمئردی کی، 35نبی‌لر واسئطه‌سئله دیئلن بو سؤز یرئنه یتئشسئن:
«آغزیمی مثللرله آچاجاغام،
او شیلری بیان اده‌جه‌یم کی، دونیا یاراناندان بری گئزلی‌دئر.»#13:35 مَزمور ۷۸:۲
آلاق اوت مثلئنئن آچیقلاماسی
36او زامان عئسا خالقی بوراخیب، اِوه گتدی. شاگئردلری اونا یاخینلاشیب ددئلر: «زمئده‌کی آلاق اوتون مثلئنی بئزه آچیقلا.»
37عئسا جاوابیندا اونلارا ددی: «یاخشی توخومو سپن ائنسان اوغلودور؛ 38زمی دونیادیر؛ یاخشی توخوم پادشاهلیغین اؤولادلاری‌دیر. آلاق اوتلاری دا شرئرئن اؤولادلاری‌دیرلار 39آلاق اوتو سَپَن دوشمن، ائبلئسدئر؛ بئچئن واختی بو عالمئن آخیری‌دیر و بئچئنچئلر ملکلردئلر. 40اونا گؤره نجه کی، آلاق اوتلار ییغیلیب، اوددا یاندیریلیر، بو عالمئن آخیریندا دا اله اولاجاق. 41ائنسان اوغلو ملکلرئنی گؤندَ‌ره‌جک و اونلار گوناها چکن بوتون شیلری و پئسلئک ادن هر آدامی اونون پادشاهلیغیندان ییغاجاقلار. 42و اونلاری اود تندئرئنه آتاجاقلار. اورادا آغلاشما و دئش قیجیرتماسی اولاجاقدیر. 43او واخت صالح آداملار آتالارینین پادشاهلیغیندا گون کئمی شاخاجاقلار. قولاقلاری اولان قوی اشئتسئن.
کئچئک مثل‌لر
44گؤیلرئن پادشاهلیغی زمئده گئزله‌دئلن بئر خزئنه‌یه بنزه‌ر کی، بئر آدام اونو تاپیب گئزلتدی. و شادلیقلا گدئب، بوتون وار-یوخونو ساتدی و او زمئنی آلدی.
45گئنه، گؤیلرئن پادشاهلیغی گؤزل مئرواری آختاران بئر تاجئره بنزه‌ر کی، 46چوخ قئیمتلی بئر مئرواری تاپیب، گتدی و بوتون وار-یوخونو ساتیب، اونو آلدی.
47گئنه، گؤیلرئن پادشاهلیغی دهنزه آتیلان بئر تورا بنزه‌ر کی، هر جور بالیق توتدو. 48دولدوغو زامان اونو ساحئله چکدئلر و اوتوروب، یاخشی‌لاری قابلارا ییغدیلار و پئسلری اِشئیه آتدیلار. 49بو عالمئن آخیریندا دا بله اولاجاق. ملکلر گلئب، پئسلری صالح آداملارین آراسیندان آییراجاقلار 50و اونلاری اود تندئرئنه آتاجاقلار. اورادا آغلاشما و دئش قیجیرتماسی اولاجاقدیر. 51آیا بوتون بو شیلری آنلادینیز؟»
اونلار عئسایا ددئلر: «بلی.»
52عئسا دا اونلارا ددی: «بونا گؤره، هر دئن عالئمی کی، گؤیلرئن پادشاهلیغینا گؤره تعلئم تاپیب، بئر اِو صاحئبئنه بنزه‌ر کی، خزئنه‌سئندن تزه و کؤهنه شیلر چیخاردیر.»
عئسا ردّ ادئلئر
(مرقوس 6:1-6، لوقا 4:16-30)
53عئسا بو مثل‌لری بئتئرندن سونرا اورادان آیریلدی. 54و اؤز دئیارینا گلئب، اوراداکی کنئسه‌لرده خالقا تعلئم ورئردی. اله کی، اونلار حیران قالیب دیئردئلر: «بو آدام بله حئکمتی، بله مؤجوزه‌لی قودرتی هارادان آلیب؟ 55مگر بو، دولگر اوغلو دیئل؟ مگر آناسینین آدی مریم دیئل؟ مگر قارداشلاری یعقوب، یوسئف، شمعون و یهودا دیئل‌لر؟ 56مگر بوتون باجیلاری آرامیزدا دیئل‌لر؟ بس بو آداما بوتون بو شیلر هارادان گلدی؟» 57و اوندان ناراحات اولدولار.
لاکئن عئسا اونلارا ددی: «هچ بئر پیغمبر هچ یرده حؤرمتسئز دیئل، مگر اؤز وطنئنده و اؤز اِوئنده.» 58و اونلارین ائمانسیزلیغی اوزوندن اورادا چوخ مؤجوزه اتمه‌دی.
Currently Selected:
متّا 13: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
