حوارئلر 9
9
شاعولون ائمان گتئرمه‌سی
1بو آرادا شاعول#9:1 کئتابین اصل دئلی یونانی‌ده «سولوس» گلئب کی، شاعول بو آدین آرامی فورمودور. لوقا سولوس آدینی شاعولون ائمان گتئرمه‌دئیئندن اوّل، اونون اوچون ائستئفاده اِدئردی. لاکئن اونون ائمان گتئرمه‌سئندن سونرا اونا پولوس آدیندا خئطاب اِدئر. بورادا عئسا شاعولو آرامی آدی ائله چاغیریر و لوقا دا اِله نقل اِدئر. کی، حله ده ربّئن شاگئردلرئنئن ضئدّئنه تهدئد و اؤلوم یاغدیریردی، باش کاهئنئن یانینا گدئب، 2دَمَشقده اولان کنئسه‌لر اوچون اوندان بئر مکتوب ائسته‌دی کی، بله‌جه طرئقته#9:2 مسئحه ائنانانلار بو آدلا تانینیردیلار. عایید اولان هر کسی تاپسا، ائستر کئشی اولسون ائستر آرواد، توتوب باغلاسین و اورشلئمه گتئرسئن. 3یولدا گدنده، دمشقه یاخینلاشدیغی زامان، قفلتن گؤیدن بئر ائشیق اونون اطرافینا ساچدی. 4شاعول یره ییخیلیب بئر سس اشئتدی کی، اونا دیئردی: «شاعول! شاعول! نه اوچون منه عذاب ورئرسن؟»
5شاعول ددی: «سن کئمسن، یارب؟»
او دا ددی: «من سنئن عذاب وردئیئن عئسایام. 6ائندی دور و شهره گت و نه اده‌جه‌یئن سنه دیئله‌جک.»
7اونونلا سفره چیخان آداملار دونوب قالمیشدیلار؛ سسی اشئدئردئلر، آمّا هچ کئمی گؤرموردولر. 8شاعول یردن دوردو و گرچی گؤزلری آچیق ائدی، لاکئن هچ بئر شی گؤره بئلمئردی. بونا گؤره اَلئندن توتوب اونو دَمَشقه گتئردئلر. 9اوچ گون گؤزلری گؤرموردو؛ نه بئر شی یدی، نه ده ائچدی.
10دمشقده حنانئیا آدلی بئر شاگئرد وار ائدی. رب اونا رؤیادا ددی:
«حنانئیا!»
او دا ددی: «بلی، یارب!»
11رب اونا ددی: «دور، دوز دیئلن کوچه‌یه گت و یهودانین اِوئنده طرسوسلو شاعول آدلانان بئر کئشئنی آختار. او ائندی دوعا ادئر. 12و رؤیادا حنانئیا آدلی بئر کئشئنی گؤروب کی، ائچه‌ری گئرئب اونون اوستونه اَل قویدو اِله کی، گؤزلری گؤرسون.»
13لاکئن حنانئیا جاواب وردی: «یارب، بو آدامین حاقّیندا چوخلاردان اشئتمئشم کی، اورشلئمده سنئن موقدّسلرئنه نه قدر یامانلیق ادئب. 14و بورادا باش کاهئنلردن ائقتئداری وار کی، بوتون سنئن آدینی ذئکر ادنلری توتوب باغلاسین.»
15آمّا رب اونا ددی: «گت، او منئم سچدئیئم قابدیر کی، آدیمی قیری‌یهودئلر، پادشاهلار و ائسرایئل اوغوللارینین یانینا آپارسین. 16اونا گؤرسده‌جه‌یم کی، منئم آدیمین خاطئرئنه نه قدر عذاب گرک چکسئن.»
17حنانئیا گدئب او اِوه گئردی و اللرئنی اونون اوستونه قویوب ددی: «قارداش شاعول! گلدئیئن یولدا سنه گؤرونن رب عئسا منی گؤندَ‌رئب کی، گؤزلرئن گئنه گؤرسون و موقدّس روحلا دولاسان.»
18او آندا شاعولون گؤزلرئندن پولجوق کئمی بئر شی دوشدو و گؤزلری گؤرمه‌یه باشلادی و قالخیب تعمئد آلدی. 19و یمک ییئب قووّتلندی. بئر نچه گون ده دمشقده اولان شاگئردلرله قالدی.
شاعول وعظ اتمه‌یه باشلاییر
20شاعول فورَن کنئسه‌لرده عئسا حاقّیندا وعظ اتمه‌یه باشلاییب دیئردی؛ «عئسا تارینین اوغلودور.» 21اشئدنلرئن هامیسی حیران قالیب دیئردئلر: «مگر بو آدام او دیئل کی، اورشلئمده بو آدی ذئکر اِدَنلری محو ادئردی و بورایا دا اونون اوچون گلئب کی، اونلاری قولوباغلی باش کاهئنلرئن یانینا آپارسین؟!»
22لاکئن شاعول داها دا قووّتله‌نئب، عئسانین مسئح اولدوغونو ثوبوت اِتمَکله دَمَشقده یاشایان یهودئلری مات قویوردو. 23چوخ گونلر کچندن سونرا، یهودئلر بئربئرلری ائله اونو اؤلدورمک قصدئنه دوشدولر. 24آمّا اونلارین قصدی شاعولا معلوم اولدو. اونلار گجه-گوندوز شهرئن دروازالارینی گودوردولر کی، اونو اؤلدورسونلر. 25لاکئن شاگئردلری گجه‌ائکن اونو گؤتوروب بئر سبدده، شهر دووارینین باجاسیندان ساللاییب، آشاغی اندئردئلر.
26شاعول، اورشلئمه گلدئیی واخت، چالیشیردی کی، شاگئردلره قوشولسون؛ لاکئن هامی اوندان قورخوردو و شاگئرد اولدوغونا ائنانمیردی. 27آمّا بارنابا اونو گؤتوروب، حوارئلرئن یانینا گتئردی و اونلارا نقل اتدی کی، نجه شاعول یولدا ربّی گؤروب و رب اونونلا دانیشیب و نجه دَمَشقده عئسانین آدیندا جسارتله وعظ ادئب.
28بله‌جه شاعول اونلارلا قالدی و اورشلئمده، باش چکدئکلری هر یرده اونلارلا ائدی و ربّئن آدیندا جسارتله دانیشیردی. 29یونانی دانیشان یهودئلر‌له ده دانیشیب موباحئثه ادئردی. آمّا اونلار جهد ادئردئلر کی، اونو اؤلدورسونلر. 30لاکئن قارداشلار بوندان خبردار اولدولار و اونو گؤتوروب قیصرئیّه‌یه گتئردئلر و اورادان طرسوسا گؤندَردئلر.
31بله‌جه کئلئسا، بوتون یهودئیه‌ده، جلئلده و سامئره‌ده آراملیق تاپیب قووّتله‌نئردی؛ ربّئن قورخوسوندا، موقدّس روحون تشوئقئنده یاشاییب چوخالیردی.
پطروسون خئدمتی
32پطروس هر طرفی گزن واخت، لئدّه‌ده یاشایان موقدّسلرئن ده یانینا گلدی. 33اورادا اِنئیاس آدلی بئر نفرله راستلاشدی کی، ائفلئج اولدوغونا گؤره، سکّئز ائلدن بری یاتاقدا یاتیردی. 34پطروس اونا ددی: «انئیاس، عئسا مسئح سنه شفا ورئر. قالخ و یاتاغینی ییغیشدیر.» او دا او آندا قالخدی. 35لئدّه و شارون دا یاشایانلارین هامیسی اونو گؤردولر و ربّئن طرفئنه دؤندولر.
36یافادا یاشایان طابئتا#9:36 کئتابین اصل دئلی یونانی‌ده «دورکاس» گلئب کی، آرامی دئلئنده «طابئتا» اولور. هر ائکئسئنئن ده معناسی «جیراندیر.» آدلی بئر شاگئرد وار ائدی (ترجومه‌سی جیراندیر)؛ بو آرواد دائم یاخشیلیق ادئب فاغیرلارا کؤمک ادئردی. 37بو آرواد او گونلرده ناخوشلاییب اؤلدو و جسدئنی یویاندان سونرا، بالاخانایا قویدولار. 38لئدّه یافایا یاخین ائدی. بله‌جه شاگئردلر پطروسون اورادا اولدوغونو اشئدنده، اونون یانینا ائکی نفری گؤندَ‌رئب یالواردیلار کی، «یوبانمادان یانیمیزا گل!» 39پطروس قالخیب اونلارلا گتدی. گلدئیی واخت، اونو بالاخانایا آپاردیلار. بوتون دول آروادلار پطروسون یانیندا دوروب آغلاییردیلار و بوتون او کؤینکلر و پالتارلاری گؤرسدئردئلر کی، جیران دئرئلئیئنده اونلار اوچون تئکمئشدی. 40آمّا پطروس اونلارین هامیسینی اشئیه گؤندَ‌ردی و دئز چؤکوب دوعا اتدی و جسده دؤنوب ددی: «طابئتا، قالخ!» آرواد گؤزلرئنی آچدی و پطروسو گؤرن واخت، قالخیب اوتوردو. 41پطروس آروادین الئندن توتوب قالدیردی و موقدّسلری و دول آروادلاری چاغیریب، اونو دئری اونلارین حوضورونا چیخارتدی. 42بو، بوتون یافادا بئلئندی و بئر چوخلاری ربّه ائمان گتئردئلر. 43و پطروس چوخ گونلر یافادا شمعون آدلی بئر دابّاغین اِوئنده قالدی.
Currently Selected:
حوارئلر 9: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
