حوارئلر 5
5
حنانئیا و سفئره
1آمّا حنانئیا آدلی بئر کئشی آروادی سفئره ائله بئر مولک ساتدی 2و پولون بئر قئسمئنی آروادینین ریضاسی ائله اؤزو اوچون ساخلاییب، قالانینی گتئردی و حوارئلرئن آیاقلاری یانینا قویدو. 3لاکئن پطروس ددی: «حنانئیا، نه اوچون شیطان اوره‌یئنی دولدوروب کی، موقدّس روحا یالان دئیه‌سن و مولکون پولوندان بئر قئسمئنی ساخلایاسان؟ 4مگر ساتیلمامیشدان قاباق سنئن اؤزونون دیئلدی؟ ساتیلاندان سونرا دا مگر سئنئن اؤز ائختئیاریندا دیئلدی؟ نه اوچون بو عملی اوره‌یئنه سالدین؟ سن ائنسانلارا یوخ، تارییا یالان دیئبسن.»
5حنانئیا بو سؤزلری اشئدنده یره ییخیلیب، آخیر نفسئنی چکدی و بونون خبرئنی اشئدنلرئن هامیسینی بؤیوک بئر قورخو بورودو. 6و جاوانلار قالخیب، اونو کفنه بوکدولر و آپاریب باسدیردیلار. 7بو حادئثه‌دن تقرئبن اوچ ساعات سونرا، اونون آروادی دا ائچه‌ری گئردی، آمّا اولوب-کچنلردن بئخبر ائدی. 8پطروس اونا خئطاب اتدی: «منه ده گؤروم، مولکو بو قئیمت و باهایا ساتدینیز؟»
آرواد ددی: «بلی، بو قئیمته ائدی.»
9پطروس اونا ددی: «نه اوچون راضیلاشیبسینیز کی، ربّئن روحونو ائمتاحانا چکه‌سئنئز؟ باخ، ارئنی باسدیرانلارین آیاقلاری قاپیدادیر، و سنی ده اشئیه داشییاجاقلار.»
10بئردن او دا پطروسون آیاقلاری آلتینا ییخیلیب، آخیر نفسئنی چکدی و جاوانلار ائچه‌ری گئرئب اونو اؤلموش تاپدیلار و اشئیه داشی‌ییب، ارئنئن یانیندا باسدیردیلار. 11بوتون کئلئسایا و بو حادئثه‌لری اشئدنلرئن هامیسینا بؤیوک بئر قورخو دوشدو.
مؤجوزه‌لر و عجایئبلر
12و حوارئلرئن اَللری ائله خالق آراسیندا چوخ علامتلر و مؤجوزه‌لر باش ورئردی و هامیسی بئرلئکده سولیمانین ایوانیندا اولوردولار. 13لاکئن خالق اونلارا بؤیوک حؤرمت گؤرستدئیی حالدا، هچ کس جورعت اتمئردی کی، اونلارلا قاریشسین. 14و گتدئکجه ربّه ائمان گتئرن کئشئلر و آروادلار چوخالیب، اونلارا قوشولوردولار. 15بله کی، حتّا ناخوشلاری کوچه‌لره گتئرئب تختلر و دؤشه‌مه‌لر اوستونه قویوردولار کی، پطروس کچنده، هچ اولماسا کؤلگه‌سی اونلارین بئرئنئن اوستونه دوشسون. 16و اورشلئمئن اطرافیندا اولان شهرلردن ده خالق گلئب ناخوشلار و ناپاک روحلاردان عذاب چکنلری گتئرئردئلر و اونلارین هامیسی شفا تاپیردی.
زئندانا دوشمک
17لاکئن باش کاهئن و یانینداکی‌لارین هامیسی (یعنی صادوقئلر فئرقه‌سی) قالخدیلار و پاخیلّیقلا دولدولار 18و حوارئلری یاخالاییب، عومومی زئندانا سالدیلار. 19آمّا ربّئن بئر مله‌یی گجه ائکن زئندانین قاپیلارینی آچدی و اونلاری اشئیه چیخاردیب ددی: 20«گدئن و معبدده دوروب بو حیات باره‌سئنده‌کی بوتون سؤزلری خالقا دیئن.»
21اونلار دا بونو اشئدندن سونرا، گون دوغارکن، معبده گئرئب تعلئم ورمه‌یه باشلادیلار. باش کاهئن و اطرافینداکی‌لار، گلدئکلری واخت، سنهدرئن مجلئسئنی، حتّا ائسرایئل اوغوللارینین مجلئسئنی بئر یره چاغیردیلار و زئندانا آداملار گؤندَردئلر کی، حوارئلری گتئرسئنلر. 22لاکئن مأمورلار، گلدئکلری واخت، اونلاری زئنداندا تاپمادیلار و قاییدیب خبر آپاردیلار 23و ددئلر: «زئندانخانانی چوخ دئقّتله باغلی و کشئکچئلری قاپیلارین یانیندا دورموش تاپدیق. آمّا قاپیلاری آچدیقدا ائچه‌رئده هچ کئمی تاپمادیق.»
24بو زامان معبدئن کشئکچئلرئنئن ریئسی و باش کاهئنلر بو سؤزلری اشئدن زامان، اونلار حاقّیندا حیران قالدیلار کی، بوندان نه عمله گله‌جک. 25لاکئن بئر نفر گلئب اونلارا خبر وردی: «باخین، زئندانا سالدیغینیز آداملار معبدده دوروب خالقا تعلئم ورئرلر.»
26او واخت موحافئظلرئن ریئسی مأمورلارلا گدئب اونلاری گتئردی، آمّا زورلا یوخ. چونکی خالقدان قورخوردولار کی، مبادا اونلاری داشا باسسینلار. 27گتئرندن سونرا، اونلاری مجلئسئن ائچئنده دوردوردولار. باش کاهئن اونلاردان سوروشوب، 28ددی: «بئز سئزه جئدّی امر اتدئک کی، آرتیق بو آددا تعلئم ورمه‌یه‌سئنئز، و باخین، اورشلئمی تعلئمئنئز‌له دولدوروبسونوز و ائسته‌یئرسئنئز کی، بو آدامین قانینی بئزئم بوینوموزا قویاسینیز.»
29آمّا پطروس و حوارئلر جاواب ورئب ددئلر: «بئز گرک ائنسانلاردان یوخ، تاریدان ائطاعت ادک. 30سئزئن آغاجدان آسیب اؤلدوردویونوز عئسانی آتالاریمیزین تاریسی دئرئلتدی. 31بو اودور کی، تاری اونو ریئس و قورتاریجی آدیندا اؤز صاغینا اوجالتدی کی، ائسرایئله تؤوبه و گوناهلارین باغیشلانماسینی عطا اتسئن. 32و بئز بو شیلرئن شاهئدلرئیئک و موقدّس روح دا. او روح کی، تاری اونو، اوندان ائطاعت ادنلره ورئب.»
33اونلار بونو اشئدنده چوخ حئرصلندئلر و قصد اتدئلر کی، حوارئلری اؤلدورسونلر. 34لاکئن غمالایئل آدلی بئر فرئسی کی، شرئعت موعلّئمی ائدی و بوتون خالقین طرفئندن مؤحترم ساییلیردی، مجلئسده آیاغا قالخیب امر اتدی کی، او آداملاری قیسا بئر مودّت اوچون اشئیه چیخارتسینلار. 35و مجلئس اهلئنه ددی: «ای ائسرایئل‌لی‌لر! بو آداملارلا نه اتمک ائسته‌دئیئنئز باره‌ده احتئیاطلی اولون. 36چونکی بوندان بئر مودّت قاباق تِعوداس میدانا چیخدی کی، اؤزونو بؤیوک بئر شخصئیّت ساییردی. اونا تقرئبن دؤرد یوز نفر قوشولدو. اؤزو اؤلدورولدو و اونا پِیرَو اولانلارین هامیسی داغیلیب، یوخ اولدولار. 37اوندان سونرا سئیاهی‌یا آلینما گونلرئنده، جلئللی یهودا میدانا چیخدی و بئر چوخ آدامی اؤزو ائله آپاردی. او دا هلاک اولدو و اونا پِیرَو اولانلارین هامیسی داغیلدیلار. 38و ائندئکی وضعئیّت باره‌ده سئزه دیئرم؛ بو آداملاردان اَل چکئن و اونلاری بوراخین. چونکی اگر بو تشبّوث و بو حرکت ائنسانلاردان اولسا، پوزولاجاق. 39آمّا اگر تاریدان اولسا، اونو پوزماغا سئزئن گوجونوز چاتماز. و حتّا تاری ائله ساواشانلارین حالینا دا دوشه بئلرسئنئز.»
40اونلار اونون نصئحتئنه قولاق آسیب، حوارئلری ائچه‌ری چاغیردیلار. اونلاری دؤیدوروب، اونلارا امر اتدئلر کی، عئسانین آدیندا آرتیق دانیشماسینلار و سونراسی آزاد اتدئلر. 41بله‌جه اونلار مجلئسئن حوضوروندان چیخیب گتدئلر و سوئنئردئلر کی، عئسانین آدی اوچون تحقئر ادئلمه‌یه لایئق گؤرونموشدولر. 42و هر گون معبدده و اِودن اِوه تعلئم ورمکدن و عئسانین مسئح اولدوغونو موژده ورمکدن ساکئت اولموردولار.
Currently Selected:
حوارئلر 5: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
