حوارئلر 15
15
اورشلئم شوراسی
1یهودئیه‌دن بعضی آداملار گلئب قارداشلارا تعلئم ورئردئلر کی، «اگر موسادان قالان عادته گؤره ختنه اولمایاسینیز، نئجات تاپا بئلمزسئنئز.» 2پولوس و بارنابا اونلارلا چوخ چکئشئب موباحئثه ادندن سونرا، بو قرار ورئلدی کی، پولوس و بارنابا و بئر نچه آیری آدام، بو مسله اوچون اورشلئمه، حوارئلرئن و آغساقّاللارین یانینا گتسئنلر. 3بله‌جه، کئلئسا طرفئندن گؤندَ‌رئلئب، فئنئقئیه و سامئره‌دن کچنده قیری‌‌‌یهودئلرئن ائمانا گلمکلرئنی نقل اتدئلر و قارداشلارا بؤیوک شادلیق گتئردئلر. 4اورشلئمه چاتدیقلاری زامان کئلئسا، حوارئلر و آغساقّاللار طرفئندن قبول اولوندولار و تارینین اونلارین واسئطه‌سی‌ائله اتدئیی بوتون شیلری خبر وردئلر. 5آمّا فرئسئلر فئرقه‌سئندن اولان بعضی ائمانلی‌لار قالخیب ددئلر: «بو اونلارا لازیمدیر کی، ختنه اولسونلار و تاپشیریلسینلار کی، موسانین شرئعتئنی رئعایت اتسئنلر.»
6حوارئلر و آغساقّاللار بئر یره ییغیلدیلار کی، بو مسله‌یه بئر تدبئر قازانسینلار. 7و چوخ موباحئثه‌دن سونرا، پطروس آیاغا قالخیب اونلارا ددی: «قارداشلار! سئز بئلئرسئنئز کی، تاری، اوّلکی گونلردن بونو سچدی کی، قیرییهودئلر ائنجئلئن خوش خبرئنی منئم آغزیمدان اشئدئب ائمان گتئرسئنلر. 8و اورَکلری بئلن تاری، بئزه وردئیی کئمی، اونلارا دا موقدّس روحو ورمکله گؤرستدی کی، اونلاری قبول ادئب. 9و بئزئمله اونلارین آراسیندا هچ بئر فرق قویماییب، اونلارین اورَکلرئنی ده ائمان واسئطه‌سی‌ائله تمئزله‌دی. 10ائندی نئیه تارینی ائمتاحانا چکئب، او یوغو شاگئردلرئن بوینونا قویورسونوز کی، نه آتالاریمیز، نه ده اؤزوموز اونو داشییا بئلئردئک؟! 11لاکئن بئز ده اونلار کئمی بونا ائنانیریق کی، رب عئسانین فیضی ائله نئجات تاپیریق.»
12بوتون جاماعات ساکئت اولدولار و بارنابا و پولوسا قولاق آسیردیلار و اونلار نقل ادئردئلر کی، تاری اونلارین واسئطه‌سی‌ائله قیرییهودئلر آراسیندا نه علامتلر و عجایئبلر ادئب.
13اونلار دانیشماقدان دایاناندان سونرا، یعقوب جاواب ورئب ددی:
«قارداشلار! منه قولاق آسین. 14شمعون #15:14 همان پطروس (آیه ۷) نقل اتدی کی، نجه تاری اوّلده قیری‌‌یهودئلره یاخینلاشدی کی، اونلارین آراسیندان اؤز آدی اوچون بئر خالق تشکئل ورسئن. 15و پیغمبرلرئن سؤزلری بونو تصدئق ادئر، نجه کی، یازیلیب:
16”بو شیلردن سونرا دؤنه‌جه‌یم،
و داوودون ییخیلمیش چادیرینی تزه‌دن قوراجاغام.
وئرانه‌لرئنی تزه‌دن بئنا اده‌جه‌یم
و اونو تکرار قوراجاغام کی،
17قالان ائنسانلار ربّی آختارسینلار،
حتّا بوتون او قیرییهودئلر ده کی،
منئم آدیم اونلارین اوستونده‌دئر.
18بونلاری رب دیئر،
او کی، بو شیلری ازلدن بئلدئرئر.“#15:18 عاموس ۹:۱۱ و ۱۲
19بونا گؤره، من بله مصلحت گؤرورَم کی، قیری‌‌یهودئلردن تارییا دؤنَنلره زحمت آچمایاق. 20لاکئن اونلارا یازاق کی، اؤزلرئنی بوتلره تقدئم ادئلئب نجئس اولموش شیلردن، جئنسی عئفّتسئزلئکدن، بوغولموش حیوانلارین اَتئندن و قاندان اوزاق ساخلاسینلار. 21چونکی قدئم نسئللردن بری موسانین هر شهرده آداملاری وار کی، اونون باره‌سئنده وعظ ادئرلر و هر سبّت گونو موسا کنئسه‌لرده اوخونور.»
22او زامان حوارئلره، آغساقّاللارا و بوتون کئلئسایا یاخشی بو گؤروندو کی، اؤز آرالاریندان آداملار سچئب، اونلاری پولوس و بارنابا ائله انطاکئیه‌یه گؤندَ‌رسئنلر. بارساباس چاغیریلان یهودا و سئلاس، قارداشلار آراسیندا رهبرلئک ادئردئلر. 23و اونلارین اَلی ائله بو مکتوبو گؤندَردئلر:
«حوارئلر و قارداشلار اولان آغساقّاللاردان، انطاکئیه، سورئیه و قئلئقئیه‌ده اولان قیری‌‌‌یهودی قارداشلارا. سالام.
24اِشئتمئشئک کی، بئزئم آرامیزدان بعضئلر چیخیب اؤز سؤزلری ائله سئزی پرئشان ادئب، جانلارینیزی دا ائضطئرابا سالیبلار. حال بو کی، بئز اونلارا بله بئر شی تعلئم ورمه‌مئشئق. 25اونا گؤره موتّفئق فئکئرله بئزه یاخشی بو گؤروندو کی، آداملار سچئب، سودئیئمئز پولوس و بارنابا ائله برابر سئزئن یانینیزا گؤندَ‌رَک 26کی، اؤز جانلارینی ربّئمئز عئسا مسئحئن آدی یولوندا قویموش آداملاردیرلار. 27بله‌جه، بئز یهودا و سئلاسی گؤندَ‌ردئک کی، اونلار اؤزلری همن بو شیلری شئفاهی سئزه بیان اده‌جکلر. 28چونکی موقدّس روحا و بئزه یاخشی او گؤروندو کی، واجئب اولان بو قایدالاردان باشقا، سئزئن اوستونوزه آرتیق یوک قویمایاق. 29بو کی، اؤزونوزو بوتلره تقدئم ادئلمئشلردن، قاندان، بوغولموش شیلردن و جئنسی عئفّتسئزلئکدن اوزاق ساخلایاسینیز. اگر بو زادلاردان اؤزونوزو اوزاق ساخلایاسینیز، یاخشی اِدَرسئنئز. سالامات اولون.»
30بله‌جه اونلار یولا سالیناندان سونرا، انطاکئیه‌یه گتدئلر و جاماعاتی بئر یره ییغیب مکتوبو تقدئم اتدئلر. 31و اونلار بونو اوخویاندان سونرا، اوندا اولان تشوئقدن سوئندئلر. 32یهودا و سئلاس اؤزلری ده پیغمبر اولدوقلاریندان، چوخ سؤزلرله قارداشلاری تشوئق ادئب قووّتلَندئردئلر. 33و اورادا بئر مودّت قالاندان سونرا، قارداشلار سالاماتلا اونلاری، اونلاری گؤندَ‌رَنلرئن یانینا گری گؤندَردئلر. 34(لاکئن سئلاسا یاخشی او گؤروندو کی، اورادا قالسین.) 35آمّا پولوس و بارنابا انطاکئیه‌ده قالیب، اؤزگه بئر چوخلاری ائله برابر ربّئن کلامینی تعلئم ورئب وعظ ادئردئلر.
پولوس و بارنابا آراسیندا اولان موباحئثه
36بئر نچه گون سونرا، پولوس بارنابایا ددی: «گل دؤنوب، ربّئن کلامینی اعلان اتدئیئمئز هر شهرده قارداشلارین گؤروشویونه گدک و گؤرک نجه‌دئرلر.» 37بارنابا چوخ ائسته‌یئردی کی، یوحنّا چاغیریلان مرقوسو دا اؤزلری ائله گؤتورسونلر. 38آمّا پولوس مصلحت گؤرموردو کی، پامفئلئیه‌ده اونلاردان آیریلان و اونلارلا ائشه گتمه‌ین بئر آدامی اؤزلری ائله گؤتورسونلر.#15:38 باخ ۱۳:۵ و ۱۳ 39و آرالاریندا اله ائتی بئر موباحئثه دوشدو کی، بئربئرلرئندن آیریلدیلار و بارنابا مرقوسو اؤزو ائله گؤتوروب گمی ائله قئبرئسه گتدی. 40لاکئن پولوس سئلاسی سچدی و قارداشلار طرفئندن ربّئن فیضئنه تاپشیریلیب یولا دوشدو. 41و سورئیه و قئلئقئیه ائچئندن سفر ادئب، کئلئسالاری قووّتلَندئرئردی.
Currently Selected:
حوارئلر 15: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
