حوارئلر 1
1
1ای تِعوفئلوس، اوّلئنجی کئتابی بوتون او شیلر حاقّیندا یازدیم کی، عئسا اونلارین ادئب اؤیرتمه‌سئنه باشلادی. 2تا او گونه کئمی کی، سچدئیی حوارئلره موقدّس روحون واسئطه‌سئله امرلر ورئب، یوخاری آپاریلدی. 3کی، عذابلارینی چکندن سونرا دا اؤزونو اونلارا بئر چوخ ائناندیران دلئل‌لرله دئری گؤرستدی و قیرخ گون عرضئنده اونلارا گؤرونوب، تارینین پادشاهلیغی باره‌ده دانیشدی. 4و اونلاری بئر یره ییغیب اونلارا امر اتدی کی، اورشلئمدن آیریلماسینلار، لاکئن ددی: «آتانین او وعده‌سئنی کی، مندن اِشئدئبسئنئز، گؤزله‌یئن. 5چونکی یحیا سو ائله تعمئد وردی، آمّا سئز بئر نچه گونه قدر موقدّس روحلا تعمئد اولوناجاقسینیز.»
6و بله‌جه اونلار، بئر یره ییغیلدیقلاری زامان، اوندان سوروشدولار: «یارب، آیا پادشاهلیغی ائسرایئله بو زامان قایتاراجاقسان؟»
7عئسا اونلارا ددی: «سئزئن ائشئنئز دیئل کی، آتانین اؤز ائقتئداری ائله موعیّن اتدئیی زامان و یا واختلاری بئله‌سئنئز. 8لاکئن موقدّس روح اوستونوزه گلندن سونرا قووّت آلاجاقسینیز و اورشلئمده، بوتون یهودئیه و سامئره‌ده، حتّا دونیانین لاپ اوزاق یرلرئنه قدر منئم شاهئدئم اولاجاقسینیز.»
9و بو سؤزلری دئیندن سونرا، عئسا اونلارین گؤزلری قاباغیندا یوخاری قالدیریلدی و بئر بولود اونو اونلارین نظرئندن آییردی. 10عئسانین گؤیه قالخدیغی واخت کی، اونلار گؤزلرئنی دئقّتله گؤیه دئکمئشدئلر، قفلتن آغ پالتار گیمئش ائکی کئشی اونلارین یانیندا دوردو. 11اونلارا ددئلر: «ای جلئللی‌لر! نه اوچون دوروب گؤیه باخیرسینیز؟ بو عئسا کی، سئزدن آلینیب گؤیه آپاریلدی، اله ده قاییداجاق؛ نجه کی، اونون گؤیه گتدئیئنی گؤردونوز.»
بالاخانادا
12او زامان اونلار زیتون دیئلن داغدان اورشلئمه دؤندولر؛ او داغ اورشلئمدن بئر سبّت گونونون یولو قدر#1:12 او مسافه‌یه ائشاره ادئر کی، یهودئلره سبّت گونونده یول گتمه‌یه ائجازه ورئلمئشدی. بو مسافه تقرئبن بئر کئلومتردئر. اوزاقدیر. 13اِوه گئردئکلری زامان، قالدیقلاری بالاخانایا چیخدیلار، یعنی پطروس و یوحنّا و یعقوب و آندریاس، فئلئپوس و توما، بارتولمای و متّا، آلفاعوس اوغلو یعقوب، و وطنپرست شمعون، و یعقوب اوغلو یهودا. 14بونلارین هامیسی بئرلئک ائچئنده آروادلارلا، عئسانین آناسی مریم و اونون قارداشلاری ائله دائم دوعادا داوام ادئردئلر.
15بو گونلرده پطروس یوز ائیئرمی نفره قدر بئر ییغیناقدا قارداشلارین آراسیندا دوروب ددی: 16«قارداشلار! موقدّس یازینین سؤزو یهودا حاقّیندا کی، عئسانی توتانلارا یول گؤرستدی، یرئنه یتئشمه‌لی ائدی؛ او یازی کی، موقدّس روح داوودون آغزی ائله ائره‌لئدن ددی. 17چونکی او، بئزئمله ساییلیب بو خئدمتده پایینی آلدی. 18بو آدام پئسلئیئنئن اوجرتی‌ائله بئر زمی ساتین آلدی؛ کلّه‌سی اوسته دوشوب، قارنی اورتادان ییرتیلدی و بوتون باغیرساقلاری اشئیه تؤکولدو. 19و بو، اورشلئمده یاشایانلارین هامیسینا بئلئندی؛ بونا گؤره ده، او زمئیه اؤز دئللرئنده ”حَقَل-دِما“ دیئلئر، یعنی قان زمئسی. 20چونکی مزمورلار کئتابیندا بله یازیلیب:
”قوی اونون مسکنی بوش اولسون
و اورادا یاشایان اولماسین.“ #1:20 مزمور ۶۹:۲۵
و
”منصبئنی اؤزگه بئری آلسین.“#1:20 مزمور ۱۰۹:۸
21بله‌جه، ائندی او آداملاردان کی، رب عئسانین آرامیزا گئرئب چیخدیغی واختین هامسیندا بئزئمله اولوبلار، 22یعنی یحیانین تعمئد وردئیی زاماندان عئسانین آرامیزدان گؤیه آلیندیغی گونه قدره کئمی، اونلاردان بئری گرک بئزئمله اونون دئرئلمه‌سئنه شاهئد اولسون.»
23ائکی نفری قاباغا قویدولار؛ بارسابا چاغیریلان یوسئفی کی، یوستوس دا چاغیریلیردی و ماتئیاسی. 24و دوعا ادئب ددئلر: «سن یارب، ای هامینین اورَکلرئنی بئلن، بو ائکی نفردن هانسینی سچدئیئنی گؤرسد کی، 25بو خئدمت و حوارئلئیی آلسین. یهودا اونو بوراخدی کی، اؤز یرئنه گتسئن.»
26و اونلارین آراسیندا پوشک آتدیلار؛ پوشک ماتئیاسا دوشدو و او، «اون بئر» حوارئیه علاوه اولوندو.
Currently Selected:
حوارئلر 1: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
