Markus 3

Neɗɗo Mo Jungo Yaraango

(Maatiyu 12.9‑14; Luka 6.6‑11)

1Wonde nyalnde Yeesu natti suudu do'aare, e woodi goɗɗo mo jungo jaraango nder mayru. 2Sey woɓɓe nder suudu do'aare ndun cutiimo koo o yamɗitinay neɗɗo on Nyalnde Siwtaare ngam ɓe keɓa ko ɓe ngulliroytoomo. 3Sey Yeesu wi'i mo jungo jaraango on, “Woroy ɗo'o.” 4Nden Yeesu ƴamiɓe wi'i, “Ko Attawra wi'i ɗum waɗa Nyalnde Siwtaare? Ɗum waɗa ko wooɗi, koo ɗum waɗa ko wooɗaa? Ɗum hisna yonki, koo ɗum waɗa warhoore?”

Ammaa ɓe fuu ɓe nde''iti. 5Yeesu raariɓe ɓernde muuɗum e metti, o wannii ngam ɓerɗe maɓɓe ɗe caatuɗe. Sey o wi'i mo jungo jaraango on, “Fortu jungo maaɗa.” O fortingo, sey ngo yamɗiti. 6Sey Faarisanko'en mburtii suudu do'aare ndun, ɓe puɗɗi medduki e yimɓe Hirudus dow no ɓe mbardata Yeesu.

Yimɓe Ɗuɗɓe Ngarii To Yeesu

7Sey Yeesu dillidi e tokkuɓemo yaaki haade Mbeela Galiili. Sey yimɓe ɗuɗɓe ƴiwoyiɓe Galiili tokkimo. 8Nde yimɓe ɗuɗɓe nani habaru fuu ko o waɗata, ɓe ngari to maako daga Yahuudiya, e Urucaliima, e Iduumiya, e fongo Caangol Urdun, e leydi haade gariije Taaya e Sidon. 9O wi'i tokkuɓemo ngaddanamo komiwal ngam yimɓe ɗuɗɓe kawritii to' ɓe ɓiɗɗamo. 10O waɗu non ngam o yamɗitinii yimɓe ɗuɗɓe haa nyawɓe ɗuɗɓe ngaɗi ka fiiduki ngam ɓe meemamo.#Mar 4.1; Luk 5.1‑3. 11Fuu carel ngel yimɓe gooduɓe ginni ngi'imo, sey ɓe njana yeeso maako e ɓe mbi'a e sembe, “An a Ɓiɗɗo Allah!”

12Ammaa o wagginiɓe to' ɓe mbi'aka koo moye kanko o moye.

Yeesu Suɓii Tokkuɓemo Sappo e Ɗiɗo

(Maatiyu 10.1‑4; Luka 6.12‑16)

13Yeesu ƴenti hocceere noddi ɓe o yiɗi. Ɓe njahi to maako. 14O suɓi yimɓe sappo e ɗiɗo ngam ɓe njooɗodoo e maako, nden o lilaɓe ɓe nga'ajinoya, o noddiɓe lilaaɓe, 15o hokkiɓe bawɗe wurtinki ginni.

16Raa inɗe yimɓe ɓe o suɓi ɓen: Siiman mo o hokki inde Biiturus, 17e Yaakubu ɓii Jabadi, e minyiraawo muuɗum Yahaya, o hokkiɓe inde Buwarnajis, waato Ɓiɓɓe Riggaango, 18e Andiraawus, e Filibus, e Batiloomi, e Maatiyu, e Tooma, e Yaakubu ɓii Halfa, e Taadiyus, e Siiman Kananiyankeejo, 19e Yahuuda Iskariyooti, gartuɗo kokkitirɗo Yeesu.

Yeesu e Ba'aljabul

(Maatiyu 12.22‑32; Luka 11.14‑23; 12.10)

20Nden Yeesu natti wuro to jooɗotoo, sey yimɓe ɗuɗɓe fuɗɗiti kawriti to maako haa kanko e tokkuɓemo ɓe mbaawaayi nyaamuki nyamndu. 21Nde bandiraaɓe maako nanii non, ɓe njahi ngam ɓe nangoyamo, ngam ɓe nanii yimɓe e mbi'a, “O haaŋake.”

22Moodiɓɓe Attawra garoyɓe daga Urucaliima mbi'i, “Ba'aljabul laamiiɗo ginni nangimo, nden e bawɗe maagol o wurtinirta ginni.”#Maat 9.34; 10.25.

23Sey Yeesu noddiɓe hokkiɓe misaalu wi'iɓe, “No waɗata Ceyɗan riiwa Ceyɗan? 24To laamu sendake e wanywanytira, ɗum waawataa ɗum daroo. 25Non maa to wuro sendake e wanywanytira, ngon ɗon wuro ngo waawataa ngo daroo. 26To laamu Ceyɗan sendake e wanywanytira, ɗum waawataa ɗum daroo, re'irde maajum warii won ɗon.

27“Walaa baawayɗo natta wuro cembiɗɗo teetanamo ko o woodi, sey ni arta haɓɓukimo, nden waawa hoccuki ko o woodi nder wuro ngon.

28“E mi wi'a'on goonga, ɗum waaway yaafanaaki yimɓe hakke e koo iri ɗiye haalaaji kalluɗi ɗi ɓe meti. 29Ammaa fuu bi'uɗo ko wooɗaa dow Ruuhu Allah, o yaafantaake haa abadaa. Haa abadaa hakke ɗum e dow maako.”#Luk 12.10. 30Yeesu wi'ii non ngam e ɓe mbi'a, “E mo woodi ginnol.”

Maduujo Yeesu e Minyiraaɓe Maako

(Maatiyu 12.46‑50; Luka 8.19‑21)

31Sey maduujo Yeesu e minyiraaɓe maako ngari ndarii yaasi, ɓe lili goɗɗo noddoya Yeesu. 32Yimɓe ɗuɗɓe e njooɗii e ɓe pilii Yeesu, ɓe mbi'imo, “Maduujo maaɗa e minyiraaɓe maaɗa e ɓe ton yaasi, e ɓe ɗaɓɓutumaa.”

33Yeesu ƴamiɓe wi'i, “Moye woni maduujo am, nden ɓeye ngoni minyiraaɓe am?” 34O raari jooɗiiɓe e piliimo o wi'i, “Raa maduujo am e minyiraaɓe am ɗo'o! 35Fuu gaɗuɗo ko Allah yiɗi, kanko woni minyiraawo am e maduujo am.”

Currently Selected:

Markus 3: fuv

Highlight

Copy