Maatiyu 24

Yeesu Metii Dow No Ɗum Sankitirta Wuro Ceniingo

(Markus 13.1,2; Luka 21.5,6)

1Yeesu e wurtoyoo Wuro Ceniingo e mo yaha, sey tokkuɓemo ngari mbi'imo o raara cuuɗi maago. 2Sey o nootii, o wi'iɓe, “On ngi'ii fuu cuuɗi ɗi'i? E mi wi'a'on goonga, walaa wonde hayre aleteende dow wonde. Ɗe fuu ɗum sankitayɗe.”

Torraaji e Caɗeele

(Markus 13.3‑13; Luka 21.7‑19)

3Yeesu e jooɗii dow Hocceere Nde Leɗɗe Jaytun sey tokkuɓemo ngari to maako kamɓe tan, ɓe mbi'i, “Wi'umin, ndeye fii ɗu'um waɗata? Ɗume woni ko hollata wartoyki maaɗa e re'uki duuniyaaru?”

4Sey Yeesu wi'iɓe, “Paamee to' goɗɗo majjina'on. 5Yimɓe ɗuɗɓe ngaroyay ɓe mbi'a kamɓe ngoni min, ɓe mbi'a, ‘Min woni Almasiihu,’ ɓe majjina yimɓe ɗuɗɓe. 6On nanay habaru konuuji gaɗeteeɗi haade mooɗon, e habaru konuuji gaɗeteeɗi ɓadaaki. To' on kulu, ngam doole ɗu'um waɗa, ammaa re'uki duuniyaaru e horii taw. 7Lenyol ummanto lenyol, laamu ummanto laamu. Ɗum waɗay weelo kallungo e dimbol leydi to bigeeje feere‑feere. 8Ammaa ɗu'um fuu ɗum fuɗɗoode torraaji garayɗi.

9“Nden ɓe ngaɗay'on nder juuɗe yimɓe torrayɓe'on, ɗum wara'on. Fuu lenyi duuniyaaru nganyay'on ngam on tokkuɓeyam.#Maat 10.22. 10E carel ngel yimɓe ɗuɗɓe alay hoolaakiyam, e ɓe ngullootira, e ɓe nganyindira. 11Annabo'en fewre ɗuɗɓe ummoyto, ɓe majjina yimɓe ɗuɗɓe. 12Halleende ɓeydoto haa yidde ɗuɗɓe ustoo. 13Ammaa munyuɗo haa re'irde o hisay.#Maat 10.22. 14Nden ɗum wa'ajinay Habaru Belɗum dow Laamu Allah koo toye nder duuniyaaru, ngam ɗum warta ceyda to leƴƴi fuu, nden re'uki duuniyaaru kin wara.

Torra Kalluka

(Markus 13.14‑23; Luka 21.20‑24)

15“Carel e wara ngel ngi'oton ‘Nefniiɗum’ gartiroojum Wuro Ceniingo ngo laaɓaa e darii to Wigeere Ceniinde ɗum Annabi Daaniyel wi'i. Fuu jangoowo faama ma'ana maajum.#Daan 9.27; 11.31; 12.11. 16E carel ngel wonɓe nder leydi Yahuudiya ndogga nattoya kocceeje. 17Gonɗo dow suudu fuu to' jippoyo ngam hoccuki ko woni nder suudu.#Luk 17.31. 18Gonɗo to ngesa to' so''o ngam hoccuki cuddaari muuɗum.

19“Rewɓe gooduɓe deeɗi e musinteeɓe ɓe torroto naa' seɗɗa nder ɗen ɗon balɗe! 20Ngaɗee do'aare to' doggudu ndun warana'on nder ndungu koo Nyalnde Siwtaare. 21Ngam nder ɗen ɗon balɗe ɗum waɗay torra kalluka mawka iri ka ɗum meeɗaayi waɗuki daga carel ngel Allah tagi duuniyaaru haa jooni. Ɗum boo fuɗɗitataa ɗum waɗa iri kan ɗon torra.#Daan 12.1; WY 7.14. 22Daa Allah ustaayi ɗen ɗon balɗe, daa walaa goɗɗo kisayɗo. Ammaa ngam ɓen ɗon cuɓaaɓe maako, o ustay balɗe ɗen.

23“E ngel ɗon carel to goɗɗo wi'ii'on, ‘Raa Almasiihu ɗo'o!’ koo boo, ‘Rammo ɗaa'e!’ to' on njaɓu. 24Ngam Almasiihu'en fewre e annabo'en fewre mburtoyto, ɓe ngaɗa alaamaaji mawɗi e kuuɗe kayɗiniiɗe ngam ɓe majjina yimɓe, haa e cuɓaaɓe ɓen to ɗum waɗoto. 25Raɗɗum, mi wi'ii'on koo ɗume ko carel ngel wara.

26“Ngam non, to ɓe mbi'ii'on, ‘Rammo ɗaa'e nder ladde,’ to' on njahu. Koo to ɓe mbi'ii'on, ‘Rammo ɗo'o e mo suuɗii nder cuuɗi,’ to' on njaɓu. 27Non no maƴƴere maƴƴirta daga fuuna nde yi'e haa hirna, non wartuki Ɓii Neɗɗo wa'ata.#Luk 17.23,24.

28“Fuu to baatuɗum woni, ɗon jigaaje kawritata.#Luk 17.37.

Wartoyki Ɓii Neɗɗo

(Markus 13.24‑27; Luka 21.25‑28)

29“Gaɗa torra kalluka kan, ɗon e ɗon ɗum ɓalwinay naange, lewru boo hokkataa jayngol mayru. Koode njanoyay daga dow, nden ko woni dow fuu dimboto.#Ica 13.10; Yow 2.10,31; 3.15; WY 6.12; Ica 13.10; Ijik 32.7; Yow 2.10; 3.15; Ica 34.4; WY 6.13. 30E carel ngel ɗum yi'ay alaama Ɓii Neɗɗo wangii ton dow, nden fuu lenyi duuniyaaru mboyay bojji nawɗi. Sey ɓe ngi'a Ɓii Neɗɗo e wara nder duule e bawɗe e teddungal mangal.#Daan 7.13; Jak 12.10‑14; WY 1.7. 31O waɗay ɗum duuda luwal sembee duuduki liluki malaa'ika'en maako, ɓe kawrita ɓe o suɓi daga koo toye nder duuniyaaru, daga ngo'ol keerol duuniyaaru yaaki ngol ton keerol duuniyaaru.

Misaalu Dow Ibbi

(Markus 13.28‑31; Luka 21.29‑33)

32“Too, ekkitee ekkitinol ngo'ol daga to ibbi. To lice maaki puɗɗi wilutuki, on andi ndungu ɓadake won ɗon. 33Non maa to on ngi'ii fuu fii ɗu'um e waɗa, too, on anday Ɓii Neɗɗo ɓadake wartoya, e mo haade dammugal. 34E mi wi'a'on goonga, jaamanu ɗu'um ɗum re'ataa naa fuu fii ɗu'um waɗii. 35Dow e ley ƴaɓɓoto, ammaa boliiɗe am ƴaɓɓataako haa abadaa.

Allah Tan Andi Nyalnde Wartoyki Almasiihu

(Markus 13.32‑37; Luka 17.26‑30,34‑36)

36“Walaa anduɗo nden ɗon nyalnde koo ngel ɗon carel ngel fii ɗum ɗon waɗata. Koo malaa'ika'en wonɓe dow andaa, koo Ɓiɗɗo on maa andaa, sey Nyaako Mo Dow tan andi. 37Non no ɗum waɗi e jaamanu Annabi Nuhu, non maa wartoyki Ɓii Neɗɗo wa'ata.#Fuɗ 6.5‑8. 38Nder balɗe ko ndiyam tufaana waɗa, yimɓe e nyaama, e njara, e te'a, e te'ee, haa carel ko Annabi Nuhu natti komiwal. 39Ɓe paamaayi haa ndiyam tufaana wari halkiɓe ɓe fuu. Non maa wartoyki Ɓii Neɗɗo wa'ata.#Fuɗ 7.6‑24. 40E carel ngel, worɓe ɗiɗo e kuwa e ngesa, ɗum hocca go'oto ɗum ala go'oto. 41Rewɓe ɗiɗo e namida, ɗum hocca go'oto ɗum ala go'oto. 42Njooɗee on ciryii, ngam on andaa carel ko Joomiraawo mooɗon warata. 43Ammaa andee ɗu'um, daa joomu wuro e andi carel ngel gujjo warantamo jemma, daa o jooɗoto e mo siryii o alataa o nattanamo wuro. 44Ngam non, onon maa doole njooɗooɗon on ciryii ngam e carel ngel on andaa Ɓii Neɗɗo warata.#Luk 12.39,40.

Maccuɗo Gaɗoowo Goonga

(Luka 12.41‑48)

45“Moye woni maccuɗo mo goonga mo faamu, mo joomu wuro muuɗum yowi dow maccuɓe muuɗum, ngam o hokkaɓe nyamndu nder carel? 46O barkiɗinaaɗo maccuɗo mo joomu wuro muuɗum warti tawi e mo waɗa non. 47E mi wi'a'on goonga, joomu wuro on yowaymo dow jawdi muuɗum fuu. 48Ammaa to maccuɗo on o kalluɗo o wi'ay hoore maako, ‘Joomu wuro am wartataa jooni,’ 49sey o fuɗɗi fiyuki maccuɓe ɓe o huudata, e mo nyaama, e mo yarda njaru e yarooɓe. 50Joomu wuro on wartay e nyalnde nde maccuɗo on kammaaki e carel ngel o andaa, 51o fiyaymo boɗɗum o waɗamo nder munaafuki'en. Ɗon ɗum woyata ɗum nyerƴindira nyiiƴe.

Currently Selected:

Maatiyu 24: fuv

Highlight

Copy