Maatiyu 22
22
Misaalu Dow Humto Teegal
(Luka 14.15‑24)
1Sey Yeesu fuɗɗiti metiraniɓe misaalu, wi'i, 2“Ɗum nandinay Laamu Allah e goɗɗo laamiiɗo ciryaniiɗo ɓiɗɗo muuɗum humto teegal. 3O lili maccuɓe maako noddoya kumpitaaɓe humto ngon, ammaa kumpitaaɓe ɓen nganyi ngara. 4Sey o fuɗɗiti o lili woɓɓe maccuɓe maako, o wi'i, ‘Njahee mbi'on kumpitaaɓe ɓen, “Raɗɗum mi siryake nyamndu, ɗum hirsii ga'i e nyalbi payɗi, koo ɗume siryaama. Ngaree humto teegal ngal!” ’ 5Ammaa kumpitaaɓe ɓen ngannaayi. Go'oto yahi ngesa muuɗum, go'oto yahi luumo muuɗum. 6Horiiɓe ɓen nangi maccuɓe ɓen torriɓe, mbariɓe. 7Sey laamiiɗo on ɓerni naa' seɗɗa, lili sooji'en muuɗum ɓe kalki ɓen ɗon gaɗuɓe warhoore ɓe nguli gariiri maɓɓe. 8Sey o wi'i maccuɓe maako, ‘Humto teegal ngon siryaama, ammaa kumpitaaɓe ɓen ɓe potaayi warki. 9Ngam non njahee dow ɗate mawɗe, kumpiton fuu mo ngiiɗon wara humto ngon.’ 10Sey maccuɓe ɓen njahi dow ɗate ɗen ɓe ɓoptoyi koo moye mo ɓe tawi, fuu kalluɓe e ɓe ngikku boɗɗum, haa wuro humto ngon heewi hoɓɓe.
11“Ammaa nde laamiiɗo on nattoyi ngam yi'a hoɓɓe ɓen, o yi'i goɗɗo nder maɓɓe mo ɓornaaki limce humto teegal. 12Sey o wi'imo, ‘Higo, no ɗum waɗi nattoyɗaa ɗo'o a ɓornaaki limce humto?’ Ammaa neɗɗo on dulli ko wi'ata. 13Sey laamiiɗo on wi'i kuwanooɓemo, ‘Kaɓɓee neɗɗo o'o juuɗe e koyɗe, paɗɗonmo nder nyiwre kallunde, to ɗum woyata ɗum nyerƴindira nyiiƴe.’ ”#Maat 8.12; 25.30; Luk 13.28.
14Yeesu ɓeydi wiiki, “Yimɓe ɗuɗɓe kumpitaa, ammaa seɗɗa cuɓaa.”
Yoɓuki Kaysar Ceede Leydi
(Markus 12.13‑17; Luka 20.20‑26)
15Sey Faarisanko'en njahi kawti ko'e, kaɓɓi dabare no ɓe nangirta Yeesu dow ko o wi'i. 16Sey ɓe liloyi tokkuɓeɓe e yimɓe Hirudus, ɓe mbi'i, “Moodibbo, e min andi ko mbi'ataa e ko ngaɗataa ɗum goonga, a ekkitina dow laawol Allah e goonga, a hulataa ko yimɓe mbi'ata dow maaɗa, a hollataa feerootirol hakkunde yimɓe. 17Too, wi'umin, e yiiki maaɗa e haani min njoɓa Kaysar ceede leydi koo ɗum haanaayi?”
18Ammaa Yeesu heɓti halleende maɓɓe, o wi'iɓe, “Ngam ɗume poondotonyam, onon munaafuki'en? 19Kolleeyam yamnde nde ɗum yoɓirta ceede leydi.”
Sey ɓe ngaddanimo yamnde go'o. 20Yeesu wi'iɓe, “Ɗowdi moye e inde moye woni dow mayre?”
21Ɓe nootii, ɓe mbi'i, “Ɗum Kaysar.”
Sey Yeesu wi'iɓe, “Too, ngam non kokkee Kaysar ko woni ɗum Kaysar, nden kokkon Allah ko woni ɗum Allah.”
22Nde ɓe nani non, ɓe kayɗini, ɓe alimo, ɓe ndilli.
Ƴamol Dow Ummaaki Mayɓe
(Markus 12.18‑27; Luka 20.27‑40)
23Saadusanko'en e mbi'a walaa ummaaki mayɓe. E nyalnde nden, sey woɓɓe maɓɓe ngari to Yeesu, ɓe ƴamimo, ɓe mbi'i,#KL 23.8. 24“Moodibbo, Annabi Muusa wi'ii to neɗɗo te'ii debbo maayii danyidaayi e maako, sakiraawo maako sey te'amo ngam heɓana sakiraawo muuɗum mayɗo ɓiɓɓe.#TA 25.5. 25Too, ndenno e woodi woɓɓe sakiraaɓe worɓe njoweeɗiɗo nder amin. Afo on te'i debbo, maayi. Nde o danyidaayi e debbo on, o alanimo sakiraawo maako. 26Non maa ɗiɗaɓo on e tataɓo on haa njoweeɗiɗaɓo on waɗii non. 27Gaɗa maajum debbo on maa maayi. 28Too, nyalnde nde mayɓe ummotoo debbo on wartay debbo moye nder maɓɓe? Ngam ɓe fuu ɓe te'iimo.”
29Sey Yeesu nootii, wi'iɓe, “On mboofii ngam on andaa ko aayaaje mbi'i, nden on andaa bawɗe Allah. 30To mayɓe ummake daga mayde, walaa te'ayɗo walaa te'eteeɗo, ammaa ɓe ngartay bo malaa'ika'en Allah. 31Nden dow ummaaki mayɓe daga mayde, on meeɗaayi janguki ko Allah wi'i'on? E ɗum windi wiiki, 32‘Min woni Allah mo Ibraahim, Allah mo Iciyaaku, Allah mo Yaakubu.’ Kanko naa' o Allah mayɓe, ammaa o Allah gooduɓe yonki.”#Wur 3.6.
33Nde hawrutuɓe ɗon nani non, ɓe kayɗini dow ekkitinol maako.
Dooka Ɓurɗum Mangu
(Markus 12.28‑34; Luka 10.25‑28)
34Ko Yeesu wi'i waɗi Saadusanko'en ndullii ko mbi'a. Nde Faarisanko'en nani non, sey ɓe kawriti. 35Go'oto nder maɓɓe, moodibbo Attawra, ƴami Yeesu ngam foondamo, wi'i, 36“Moodibbo, ɗume dooka ɓuri mangu fuu nder Attawra?”
37Yeesu wi'imo, “ ‘Yiɗu Joomiraawo Allah maaɗa e ɓernde maaɗa fuu, e yonki maaɗa fuu, e hakkiilo maaɗa fuu.’#TA 6.5. 38Ɗu'um woni dooka mawɗum arandejum. 39Ɗiɗaɓum maa e fottidi e arandejum ɗum. ‘Yiɗu bandiraawo maaɗa no ngiɗirɗaa hoore maaɗa.’#KLee 19.18. 40Dow ɗu'um dooka ɗiɗum Attawra e Defte Annabo'en ndarii.”#Luk 10.25‑28.
Ƴamol Dow Almasiihu
(Markus 12.35‑37; Luka 20.41‑44)
41Nde Faarisanko'en kawriti, Yeesu ƴamiɓe, 42wi'i, “Ɗume nyumoton dow Almasiihu? O ɓiɗɗo moye?”
Ɓe mbi'imo, “O ɓiɗɗo Dawda.”
43Sey Yeesu wi'iɓe, “Too, no ɗum waɗi Dawda nder bawɗe Ruuhu Allah noddi Almasiihu ‘Joomiraawo?’ O wi'i,
44‘Joomiraawo wi'ii Joomiraawo am,
“Jooɗa to jungo am nyaamo,
naa mi waɗii a yaaɓii wanywanyɓe maaɗa.” ’#Jab 110.1.
45Nde Dawda noddii Almasiihu ‘Joomiraawo,’ too, no ɗum waɗata o warta ɓiɗɗo Dawda?”
46Walaa bawɗo nootanaakimo. Daga nden ɗon nyalnde walaa gaɗuɗo sembe ɓernde ƴamimo wongol ƴamol.
Currently Selected:
Maatiyu 22: fuv
Highlight
Share
Copy
Want to have your highlights saved across all your devices? Sign up or sign in
© 2010, Bible League. All rights reserved.
