Luka 9
9
Yeesu Lilii Tokkuɓemo Sappo e Ɗiɗo
(Maatiyu 10.5‑15; Markus 6.7‑13)
1Gaɗa Yeesu noddii tokkuɓemo sappo e ɗiɗo, o hokkiɓe bawɗe e laamu dow wurtinki ginni e yamɗinki nyawuuji. 2O liliɓe ɓe nga'ajina Laamu Allah, ɓe njamɗitina ɓe njamɗaa. 3O wi'iɓe, “To' on koccu koo ɗume ngam yaadu, koo sawru, koo jakaare, koo nyamndu, koo ceede, koo toggooje ɗiɗi. 4Wuro ngo artuɗon nattuki fuu, njooɗee ɗon naa on alii gariiri ndin. 5To yimɓe nder gariiri ndin njaɓɓaaki'on, alee gariiri ndin, piɗɗee sollaare koyɗe mooɗon. Kanjum hollata ɓe ngaɗii hakke.”#KL 13.51. #Luk 10.4‑11.
6Sey ɓe ndilli, ɓe njahi ngarihoy feere‑feere, e ɓe nga'ajina Habaru Belɗum, e ɓe njamɗitina yimɓe koo toye.
Hirudus Wannii
(Maatiyu 14.1‑12; Markus 6.14‑29)
7Nde Hirudus, laamiiɗo leydi Galiili, nani koo ɗume ko waɗata, o wannii ngam woɓɓe e mbi'a ɗum Yahaya Gaɗoowo Baptisma ummii daga mayde. 8Woɓɓe boo e mbi'a ɗum Annabi Iliya wangi, ammaa woɓɓe kadimaa e mbi'a ɗum go'oto nder annabo'en ndenno ummii.#Maat 16.14; Mar 8.28; Luk 9.19. 9Hirudus wi'i, “Mi ittanii Yahaya hoore. Ɗum moye kadin woni o'o, mo nanaymi fii ɗu'um dow muuɗum?” Nden o ɗaɓɓiti no o yi'irta Yeesu.
Yeesu Nyamnii Yimɓe 5,000
(Maatiyu 14.13‑21; Markus 6.30‑44; Yahaya 6.1‑14)
10Nde lilaaɓe ngarti, ɓe mbi'i Yeesu ko ɓe ngaɗi. Sey o hocciɓe kamɓe tan yaaki haade gariiri bi'eteendi Betasayda. 11Ammaa nde yimɓe ɗuɗɓe hawrutuɓe ngi'i non, ɓe tokkimo. O jaɓɓiiɓe, o metaniɓe dow Laamu Allah. O yamɗitini giɗɓe yamɗitineeki.
12Nde naange hiiri, tokkuɓemo sappo e ɗiɗo ngari to maako, mbi'i, “Wi'u hawrutuɓe ndilla ngarihoy e gure gonɗe haade ngam ɓe keɓa ko ɓe nyaamata e to ɓe mbaalata, ngam ɗo'o ɗum ladde.”
13Sey o wi'iɓe, “Onon kokkeeɓe ko ɓe nyaamata.”
Ammaa ɓe mbi'imo, “Buroodi jowi e liƴƴi ɗiɗi tan min ngoodi ɗo'o. Sey ni min njaha, min cooda nyamndu ngam yimɓe ɓe'e fuu.” 14Worɓe tan nder hawrutuɓe ɓen ɓadake 5,000.
Sey Yeesu wi'i tokkuɓemo, “Mbi'eeɓe ɓe njooɗo moɓde yimɓe 50 ‑ 50 koo toye.”
15Sey ɓe ngaɗi non, koo moye jooɗii. 16Yeesu hocci buroodi jowi ɗin e liƴƴi ɗiɗi ɗin, o raari dow, o yetti Allah, o sendiɗum, o hokki tokkuɓemo ngeedana hawrutuɓe. 17Ɓe fuu ɓe nyaami, ɓe kaari. Tokkuɓemo moɓti ko horii ko waɗi kondooje sappo e ɗiɗi.
Yeesu Woni Almasiihu
(Maatiyu 16.13‑19; Markus 8.27‑29)
18Wonde nyalnde Yeesu e waɗa do'aare, kanum tan, tokkuɓemo e haade maako. O ƴamiɓe, o wi'i, “Moye yimɓe mbi'atayam?”
19Ɓe nootii ɓe mbi'i, “Woɓɓe e mbi'a a Yahaya Gaɗoowo Baptisma. Woɓɓe boo e mbi'a a Annabi Iliya. Nden woɓɓe kadimaa e mbi'a go'oto nder annabo'en ndenno ummii.”#Maat 14.1,2; Mar 6.14,15; Luk 9.7,8.
20O wi'iɓe, “Ammaa onon, moye mbi'otonyam?”
Sey Biiturus nootii, wi'i, “An woni Almasiihu mo Allah!”#Yah 6.68,69.
Yeesu Wi'ii No Mayrata
(Maatiyu 16.20‑28; Markus 8.30—9.1)
21Ammaa Yeesu haɗiɓe to' ɓe mbi'aka koo moye. 22Nden o wi'i, “Doole Ɓii Neɗɗo yara bone ɗuɗɗum. Mawɓe yimɓe e mawɓe ardiiɓe diina e moodiɓɓe Attawra nganyamo, nden o waree. Nder nyalnde tatawre boo ɗum umminaymo.”
23Sey o wi'iɓe ɓe fuu, “Fuu giɗɗo warta tokkuɗoyam, to' waɗa ko hoore muuɗum yiɗi waɗuki tan, ammaa doole hocca gaafaangal muuɗum koo ndeye tokkayam.#Maat 10.38; Luk 14.27. 24Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am o hisnayki.#Maat 10.39; Luk 17.33; Yah 12.25. 25Ko ɗum nafanta neɗɗo, to o heɓii duuniyaaru fuu, ammaa o majjinii hoore maako koo o halki? 26Koo moye ganyuɗoyam, min Ɓii Neɗɗo e boliiɗe am, mi wanyaymo to mi wartoyii nder teddungal am, e nder teddungal Nyaako am Mo Dow, e malaa'ika'en maako ceniiɓe. 27E mi wi'a'on goonga, e woodi woɓɓe dariiɓe ɗo'o ɓe maayataa naa ɓe ngi'ii Laamu Allah.”
Yeesu Wangii Nder Mangu Muuɗum
(Maatiyu 17.1‑8; Markus 9.2‑8)
28Balɗe joweetati gaɗa Yeesu wi'iɓe boliiɗe ɗen, o ƴeeŋi dow hocceere ngam o waɗa do'aare. Biiturus, e Yahaya, e Yaakubu e wondi e maako. 29E mo nder do'aare sey yeeso maako e kolte maako ngarti daneeje tar. 30Ɗon e ɗon sey raa, annabo'en ɗiɗo, Muusa e Iliya, wangi 31nder teddungal, e ɓe medda e maako. Ɓe meddi dow mayde maako nde tabbitay naa' ko neeɓi nder Urucaliima. 32Biiturus e gonduɓe e muuɗum ɗaanake, carel ko ɓe kuylii, ɓe ngi'i teddungal maako e yimɓe ɗiɗo darodiiɓe e maako. 33Carel ko annabo'en ɓen alata Yeesu, Biiturus wi'imo, “Moodibbo, wonki amin ɗo'o e wooɗi. Al min nyiɓa cuuɗi tati, wo'oyru ndu maaɗa, wo'oyru ndu Muusa, nden wo'oyru ndu Iliya.” Ammaa Biiturus andaa ko wi'ata.
34E mo nder metuki, sey nduula wangi, suddiɓe, ɓe kultori. 35Ɓe nani hononde Allah daga nder nduula ngan wi'i, “O'o woni Ɓiɗɗo am mo cuɓumi. Nanee ko o wi'ata'on.”#Ica 42.1; Maat 3.17; 12.18; Mar 1.11; Luk 3.22. #2Biit 1.17,18.
36Nde hononde nden de''iti, ɓe ngi'i Yeesu kanum tan. Tokkuɓemo aliɗum hakkunde maɓɓe, nder nyalɗe ɗen ɓe mbi'aayi goɗɗo ko ɓe ngi'i.
Yeesu Yamɗitinii Ɓiɗɗo Gooduɗo Ginnol
(Maatiyu 17.14‑18; Markus 9.14‑27)
37Nde weeti, ɓe njippoyii daga dow hocceere nden, kawrutuɓe ɗuɗɓe tawimo. 38Nder kawrutuɓe ɓen goɗɗo gorko noddi e sembe, wi'i, “Moodibbo, e mi toromaa, raaru ɓiɗɗo am gorko ngam kanko tan ngoodumi. 39Ginnol neeɓii e nangamo. To ngol nangiimo, o fuɗɗa wulluki, o waɗa ka diwnuki, nguufo ngaɗa ka wurtoyaaki nder honduko maako, ngol alataamo naa ngol nawniimo. 40Mi torake tokkuɓema mburtinangol, ammaa ɓe mbaawaayi.”
41Yeesu nootii, wi'i, “Onon yimɓe jaamanu ɗu'um kalluɗum on koolaakiyam, haa ndeye njooɗodotoomi e mooɗon e mi munyida e mooɗon? Waddu ɓiɗɗo maaɗa ɗo'o.”
42Ɓiɗɗo on e waroya, sey ginnol ngol do''imo, e mo diwna. Ammaa Yeesu haɓani ginnol ngol, yamɗitini suka on, hokkitimo nyaako maako. 43Wonɓe ɗon fuu kayɗini e mangu Allah.
Yeesu Fuɗɗiti Wi'i Ɓadake Maayuki
(Maatiyu 17.22,23; Markus 9.30‑32)
Ammaa e ɓe nder hayɗinki dow ko o waɗi, Yeesu wi'i tokkuɓemo, 44“Paamee boɗɗum nanon ko mbi'aymi'on! Ɗum hokkitiray Ɓii Neɗɗo nder juuɗe yimɓe.” 45Ammaa ɓe paamaayi ko o wi'iɓe. Ɗum suuɗanakeɓe ngam to' ɓe paamaɗum, nden e ɓe kula ƴamukimo dow maajum.
Moye Ɓuri Mangu?
(Maatiyu 18.1‑5; Markus 9.33‑37)
46Nden geddi ummii hakkunde tokkuɓemo dow ɗum moye ɓuri mangu nder maɓɓe.#Luk 22.24. 47Ammaa Yeesu heɓti ko woni nder ɓerɗe maɓɓe, sey o hocci sukayel pamarel, o darningel haade maako. 48Nden o wi'iɓe, “Koo moye jaɓuɗo sukayel pamarel bo nge'el nder inde am jaɓiiyam. Nden koo moye jaɓuɗoyam jaɓii liloyɗoyam. Ngam lestinɗo hoore muuɗum fuu nder mooɗon, kanum woni mawɗo.”#Maat 10.40; Luk 10.16; Yah 13.20.
Mo Wanyaayi'on Fuu e Wondi e Mooɗon
(Markus 9.38‑40)
49Yahaya nootii, wi'i, “Moodibbo, min ngi'ii goɗɗo e wurtina ginni nder inde maaɗa, min kaɗimo ngam kanko naa' o tokkuɗo'en.”
50Ammaa Yeesu wi'imo, “To' on kaɗumo, ngam fuu mo wanyaayi'on e wondi e mooɗon.”
Yimɓe Gariiri Samaariya Nganyii Yeesu
51Nde carel ɓadii ngam ɗum hoccamo yaaki dow, Yeesu e hoore muuɗum suɓi yahuki Urucaliima. 52Sey o lili lilaaɓe yeeso maako, ɓe njaha nder gariyel Samaariyanko'en ngam ɓe ciryoo koo ɗume ngam garol maako. 53Ammaa yimɓe gariyel ngel njaɓaayimo ngam ɓe keɓtii Urucaliima o fa'i. 54Nde tokkuɓemo Yaakubu e Yahaya ngi'i non, ɓe mbi'i, “Moodibbo, a yiɗi min nodda hiite daga dow wara halkaɓe?”#2Laam 1.9‑16.
55Ammaa Yeesu waylitii haɓaniɓe, 56sey ɓe njahi wongel gariyel.
Tokkuki Yeesu
(Maatiyu 8.19‑22)
57E ɓe nder yaadu dow ɗatal, sey goɗɗo wi'imo, “Mi tokkete to njahataa fuu.”
58Yeesu wi'imo, “Dilaaji e ngoodi gayɗe, colli e ngoodi caɓɓe, ammaa Ɓii Neɗɗo walaa to fukkotoo.”
59O wi'i goɗɗo neɗɗo, “Tokkam.”
Ammaa neɗɗo on wi'imo, “Moodibbo, al mi yaha, mi uwoya nyaako am taw.”
60Ammaa Yeesu wi'imo, “Alu mayɓe uwa mayɓe mu''en, ammaa an, yahu, nga'ajinaa Laamu Allah.”
61Goɗɗo kadimaa wi'i, “Mi tokkete, moodibbo, ammaa al mi yaha mi ƴama ɓe wuro am taw.”#1Laam 19.20.
62Ammaa Yeesu wi'imo, “Koo moye jogiiɗo remergo fuɗɗi remuki e yeeƴoo gaɗa, walaa ko nafi nder kuugal Allah.”
Currently Selected:
Luka 9: fuv
Highlight
Share
Copy
Want to have your highlights saved across all your devices? Sign up or sign in
© 2010, Bible League. All rights reserved.
