Luka 17

Bone Waɗuki Hakke

(Maatiyu 18.6,7,21,22; Markus 9.42)

1Sey Yeesu wi'i tokkuɓemo, “Doole ko waɗata yimɓe ngaɗa hakke wara, ammaa gaɗuɗo goɗɗo waɗi hakke yaray bone. 2Ɗum ɓuranay neɗɗo on haɓɓanee kaaƴa namol manga e daande o faɗɗee nder ndiyam mbeela, dow o waɗa go'oto nder sukaaɓe pamarɓe ɓe'e kooliiɓeyam waɗa hakke. 3Paamanee ko'e mooɗon.

“To bandiraawo maaɗa waɗaniima ko wooɗaa, metanmo. To o tuubii, yaafanamo.#Maat 18.15. 4To o waɗaniima ko wooɗaa nde joweeɗiɗi e nyalnde go'o, nden nde joweeɗiɗi e mo wara to maaɗa e mo wi'a, ‘Mi tuubii,’ doole njaafanoɗaamo.”

Hoolaaki Allah Bo Gabbel Mastat

5Lilaaɓe Yeesu mbi'imo, “Ɓeydanmin hoolaaki Allah!”

6Yeesu nootii wi'iɓe, “Daa on ngoodi hoolaaki famɗirki bo gabbel mastat, on mbaaway mbi'on lekki ki'i, ‘Ɗoofa tiggoyoɗaa nder ndiyam,’ sey ki waɗa bo ko mbiiɗon.

Kuugal Maccuɗo

7“Moye nder mooɗon gooduɗo maccuɗo demayɗo koo durayɗo baali, to maccuɗo on wartoyii daga ngesa o wi'amo, ‘Woroy, jooɗa nyaamaa nyamndu?’ 8Sam walaa bi'oowo non, sey ni o wi'amo, ‘Ɓorna limcere defuki, ndefanaayam hiraande, ngaddanaayam, mi nyaama mi yara taw, nden nyaamaa njaraa.’ 9On kammoo o yettay maccuɗo on ngam o waɗii ko o wi'i? 10Aa'a. Non onon maa, to on kuwii ko ɗum wi'i'on, on mbi'ay, ‘Min maccuɓe ɓe ngalaa bote. Min ngaɗii ko haani min ngaɗa tan.’ ”

Yeesu Yamɗitinii Yimɓe Sappo

11Yeesu e yaha Urucaliima, o tokki keerol leydi Samaariya e leydi Galiili. 12E mo natta wongel gariyel, sey yimɓe sappo gooduɓe nyawu nyaamoojum laral kawri e maako, ɓe ndarii to woɗɗi. 13Ɓe noddi e sembe, ɓe mbi'i, “Yeesu! Mawɗo! Yurminanmin!”

14Nde Yeesu yi'iɓe, o wi'iɓe, “Njahee ardiiɓe diina ngi'a'on.”

E ɓe nder yaadu, sey ɓe njamɗiti.#KLee 14.1‑32. 15Nde go'oto maɓɓe yi'i yamɗitii, o so''ii e mo manta Allah e sembe. 16O diccii yeeso Yeesu, o yettimo. Kanko boo o Samaariyankeejo. 17Yeesu wi'imo, “Naa' onon sappo njamɗiti? To njoweenayo ɓen ngoni? 18Walaa mo ɗum heɓi so''oyii yetti Allah sey koɗo o'o tan?” 19Sey o wi'i Samaariyankeejo on, “Umma ndillaa. A yamɗitii ngam a hoolakeyam.”

Garol Laamu Allah

(Maatiyu 24.23‑28,37‑41)

20Woɓɓe Faarisanko'en ƴami Yeesu ɓe mbi'i, “Ndeye Laamu Allah waroyta?” O wi'iɓe, “Ɗum yi'ataa Laamu Allah e gite. 21Walaa bi'oowo, ‘Raa Laamu Allah ɗo'o,’ koo ‘Raa Laamu Allah ton nii,’ ngam Laamu Allah e nder mooɗon.”

22Sey o wi'i tokkuɓemo, “Balɗe e ngara ko kaaɓoton yi'uki nyalnde wo'oyre nder nyalɗe Ɓii Neɗɗo, ammaa on ngi'ataa. 23E carel ngel yimɓe mbi'ay'on, ‘Rammo ɗaa'e!’ koo boo, ‘Rammo ɗo'o!’ To' on njahu. To' on tokkuɓe. 24No maƴƴere maƴƴirta yi'ee koo toye, non gartol Ɓii Neɗɗo wa'ata. 25Ammaa arande doole o yara torra kalluka, yimɓe jaamanu ɗu'um nganyamo. 26Ko waɗuno nder jaamanu Annabi Nuhu, non waɗetee nder balɗe ko Ɓii Neɗɗo wartoyta.#Fuɗ 6.5‑8. 27Yimɓe e nyaama, e njara, e te'a, e te'ee haa carel ko Annabi Nuhu natti komiwal mangal, ndiyam wari halkiɓe ɓe fuu.#Fuɗ 7.6‑24. 28Non maa no ɗum waɗuno nder jaamanu Luutu. Yimɓe e nyaama, e njara, e cooda, e coora, e ndema, e maha. 29Ammaa nyalnde nde Luutu wurtii daga nder gariiri Sodom, ɗum yoofoyi hiite e kaaƴe nyaamooje hiite daga dow, nge halkiɓe ɓe fuu.#Fuɗ 18.20—19.25. 30Non waɗetee nyalnde nde Ɓii Neɗɗo wangata.

31“E nyalnde nden gonɗo dow suudu fuu to' jippoyoo ngam hoccuki jawdi maako nder suudu. Gonɗo to ngesa boo to' so''oo wuro.#Maat 24.17,18; Mar 13.15,16. 32Ciftoree debbo Luutu!#Fuɗ 19.26. 33Koo moye ɗaɓɓutuɗo hisna yonki muuɗum dullayki, ammaa koo moye dulli yonki muuɗum ngam am hisnayki.#Maat 10.39; 16.25; Mar 8.35; Luk 9.24; Yah 12.25. 34E mi wi'a'on, e jemmaare nden yimɓe ɗiɗo pukkodoto dow leeso go'o ɗum hocca go'oto, ɗum ala go'oto. 35Rewɓe ɗiɗo e namida, ɗum hocca go'oto, ɗum ala go'oto. 36[Yimɓe ɗiɗo e kuwa nder ngesa, ɗum hocca go'oto, ɗum ala go'oto.]”

37Tokkuɓemo mbi'imo, “Moodibbo, toye fii ɗu'um waɗata?”

O wi'iɓe, “To baatuɗum woni, ɗon jigaaje kawritata.”

Currently Selected:

Luka 17: fuv

Highlight

Copy