Zãa 18

Yesu kũa

(Mat 26.47-56; Maa 14.43-50; Luk 22.47-53)

1Yesu yãpi oa gbɛa à bɔ̀ ń a iwaɔ, aa bùa Sedɔ̃ baale. Lu ku we, ɔ̃ à gɛ̃̀u ń a iwaɔ. 2Gbɛ̃kpamade Yudasi sɔ̃ a gupi dɔ̃, asa Yesu ń a iwaɔ aaìɔ kãaa we mɔɔmɔɔɛ. 3Ɔ̃ Yudasi gɛ̀ we ń sosa gãli doo ń dɔai pɔ sa'onkiaɔ ń Falisiɔ ń zĩ́ɔ. Aa filiaɔ kũkũa ń sɛ̃tɛɔ ń gɔ̃kɛbɔɔ. 4Yesu yã pɔ a a le dɔ̃ pii, ɔ̃à bɔ̀ dàńlɛ à ń lá à mɛ̀: Dé álɛ wɛɛlɛi? 5Aa wèwà aa mɛ̀: Yesu Nazalɛtiɛ. Ɔ̃ a ònɛ́: Mamɛ má aà ũ. Gbɛ̃kpamade Yudasipi kuńnɔ. 6Kɛ́ Yesu ònɛ́: Mamɛ má aà ũ, ɔ̃ aa ɛ̀a kpɛkpɛ aa bɔ̀ lɛ̀lɛ. 7Yesu ń lá lɔ: Dé álɛ wɛɛlɛi? Ɔ̃ aa mɛ̀: Yesu Nazalɛtiɛ. 8Yesu wèmá lɔ: Má òɛ́ mamɛ má aà ũ. Tó mamɛ álɛ ma wɛɛlɛ, à to gbɛ̃́ɛ beeɔ tá. 9À bee ò kɛ́ yã pɔ à dɔ̀aa a ò e papa yãiɛ à mɛ̀: Gbɛ̃́ pɔ ń kpàaɔ, an gbɛ̃e i vũaao. 10Simɔ Piɛɛ fɛ̃nda looa, ɔ̃ a wò à sa'onkia zĩkɛna lɛ̀ò, à aà ɔplaa swã gò. Zĩkɛnapi tɔ́n Malaku. 11Ɔ̃ Yesu ò Piɛɛɛ: Ǹ n fɛ̃nda sɔlɔ a kpɛ́u. Má kɛɛona pɔ ma Mae dìlɛmɛɛ imio le?

12Ɔ̃ sosaɔ ń ń gbɛ̃zɔ̃ɔo ń Yuda dɔaiɔ Yesu kũ̀ wa yè. 13Aa gɛ̀aanɔ Anasi kĩi gĩ́aɛ. Anasipi sɔ̃ Kaaifa pɔ dɛ sa'onkia ũ wɛ̃ bee ãnsueɛ. 14Kaaifapi mɛ́ lɛdà Yuda gbãadeɔwa yãa à mɛ̀: A maa gbɛ̃́ mɛndo ga gbɛ̃pii gbɛuɛ.#Zãa 11.49-50

Piɛɛ lelekpaa Yesuzi

(Mat 26.57-75; Maa 14.53-72; Luk 22.54-71)

15Simɔ Piɛɛ ń Yesu iwaɔ doo tɛ Yesupi kpɛ. Sa'onkia iwapi dɔ̃, ɔ̃ iwapi gɛ̃̀ Yesu kĩi sa'onkiapi bɛ'ua. 16Piɛɛ gɔ̃̀ zɛ bɔlɛu gãaɛ. Ɔ̃ iwa pɔ sa'onkia aà dɔ̃pi gɛ̀ yã'ò nɔɛ pɔ lɛ́ bɔlɛpi dɔ̃́aɛ, ɔ̃ à gɛ̃̀ ń Piɛɛo. 17Ɔ̃ nɔɛ bɔlɛdɔ̃anapi Piɛɛ là à mɛ̀: Gbɛ̃́pi iwaɔ don n ũo lò? Piɛɛ wèwà à mɛ̀: Mamɛo. 18Zĩkɛnaɔ ń dɔaiɔ tɛkà yãa, aalɛ kpakpa kɛ́ ĩana ku yãi. Piɛɛ ku we, àlɛ tɛkpakpańnɔ.

19Ɔ̃ sa'onkia lɛ́ yãlala Yesuwa aà iwaɔ ń aà yãdanɛo musu. 20Yesu wèwà à mɛ̀: Ma yã'ò gbɛ̃piiɛ gupuau. Ma yãdàdanɛ́ luasisikpɛɔ guu ń Lua uao, gu pɔ Yudaɔ ì kãaau mpii. Mi yãe o asii guuo. 21Bɔyãi nlɛ yãlalaai? Ma yãmanaɔ la, aa yã pɔ má ònɛ́ dɔ̃. 22Kɛ́ Yesu yãpi ò, dɔaiɔ do pɔ ku we aà sãnkɛ à mɛ̀: Wì yãzãsi sa'onkiawa màa yã? 23Yesu wèwà à mɛ̀: Tó yãvãi má ò, o wà ma. Tó yãmaa má ò sɔ̃, bɔyãi n ma lɛi? 24Ɔ̃ Anasi Yesu gbàɛ sa'onkia Kaaifawa yea.

25E tia Piɛɛ ku we, àlɛ tɛkpakpa. Ɔ̃ wà aà là wà mɛ̀: Aà iwaɔ don n ũo lò? Piɛɛ lelekpà à mɛ̀: Mamɛo. 26Sa'onkia zĩkɛnaɔ doá gbɛ̃́ pɔ Piɛɛ a swã gò daɛɛ, ɔ̃ à mɛ̀: Mi n eaanɔ lu guuo le? 27Ɔ̃ Piɛɛ lelekpà lɔ. Wegɔ̃ɔ ko lɛzù.

Pilati yãkpalɛkɛa ń Yesuo

(Mat 27.1-31; Maa 15.1-20; Luk 23.1-25)

28Ɔ̃ Yuda gbãadeɔ bɔ̀ ń Yesuo Kaaifa kĩi, aa gɛ̀aanɔ busu gbɛ̃zɔ̃ɔ bɛ. Gufɛ̃nɛɛ, aai gɛ̃ gbɛ̃zɔ̃ɔpi bɛo, kɛ́ aasu gbãlɛo yãi, asa aa ye wà Gɛ̃amusu dikpɛkɛɛ. 29A yãi tò Pilati bɔ̀, à mɔ̀ ń kĩi à mɛ̀: Yã kpele á vĩ ń gbɛ̃́pioi? 30Aa wèwà aa mɛ̀: Tó vãikɛna no, wá mɔ́ aà kpaimao. 31Ɔ̃ Pilati ònɛ́: À aà sɛ à gɛ́ yãkpalɛkɛiaanɔ ázĩa ikoyãwa. Ɔ̃ gbãadepiɔ òɛ̀: Wá gbɛ̃́dɛa zɛ́ vĩo. 32Bee kɛ̀ kɛ́ yã pɔ Yesu ò e papa yãiɛ, kɛ́ à dɔ̀aa à a ga taa ò.#Zãa 3.14, 12.32

33Ɔ̃ Pilati ɛ̀a gɛ̃̀ a bɛ. À Yesu sìsi, ɔ̃ à aà là à mɛ̀: Yudaɔ kian n ũa? 34Yesu wèwà à mɛ̀: Nlɛ bee o ń nzĩao yã̀, ge wà ma yã'ònɛɛ? 35Pilati mɛ̀: Yudan ma ũa? N buiɔ ń n sa'onkiaɔ mɛ́ n kpaa. Bɔ́ ń kɛ̀i? 36Yesu mɛ̀: Ma kpala i bɔ dũniaɛ bee guu no. Tó ma kpala bɔ̀ dũniaɛ bee guuɛ, dɔ̃ ma iwaɔ zĩkà, kɛ́ wasu wà ma kpa Yudaɔwao. Ma kpala i bɔ dũniau lao. 37Ɔ̃ Pilati òɛ̀ à mɛ̀: Àsi kian n ũóo? Yesu mɛ̀: Mmɛ nlɛ o kian ma ũ. Wà ma i, ɔ̃ ma mɔ dũniau sĩana seelade ũ. Gbɛ̃́ pɔ dɛ sĩana pɔ ũ ì ma yãma. 38Pilati mɛ̀: Bɔmɛ sĩana ũi?

Kɛ́ a ò màa, à ɛ̀a bɔ̀, à gɛ̀ Yudaɔ kĩi, a ònɛ́: Mi yãe e gbɛ̃́piwao. 39Á fɛlɛkaayã vĩ kɛ́ mi dakpɛuna mɛndoe kɛ̃ɛ́ Gɛ̃amusu dikpɛzĩ. Á ye mà Yudaɔ kia kɛ̃ɛ́ yã? 40Ɔ̃ aa wiilɛ̀ lɔ aa mɛ̀: Aapi no, Balabaɛ! Kási sɔ̃ Balabapiá kpãiwɛliwɛɛ.

Currently Selected:

Zãa 18: Boo2024

Highlight

Copy