Daa 8

Í goa dũniaa

1Nɔee ń sɛ̃anɔbɔɔ ń pɔtuo pɔ kuaanɔ gó guuɔ pii yã dɔ̀ Luagu. Lua ĩana vù tɔɔlɛwa, ɔ̃ í nà baawa. 2Isi pɔ ku tɔɔlɛ ziɛ nibɔnaɔ ń loupɔɔfɔ̃ao tàta, ɔ̃ lou kɛ̃̀. 3Ípi lɛ́ ba busɛbusɛ, àlɛ lao e gɔɔ basoplakwi. 4Mɔ soplade gɔɔ gɛ̃omplaodezĩ ɔ̃ gópi dì gbɛsĩsĩ pɔ wì mɛ Alalatawa. 5Ípi lɛ́ lao e mɔ kwideu. Mɔ kwidepi gɔɔ sɛ̃iazĩ gbɛsĩsĩɔ misonaɔ bɔ̀.

6Gɔɔ bla gbɛa Nɔee gó fenɛti pɔ a bɔ̀ wɛ̃̀, 7ɔ̃ à gbagbaa gbàɛ. Àlɛ vua, ìɔ gɛ́ le, ìɔ su la, e í gɛ̀ bà tɔɔlɛwa. 8À felena gbàɛ lɔ, kɛ́ à e à dɔ̃ tó í lào tɔɔlɛwa. 9Kɛ́ felenapi i pɛkĩi eo, ɔ̃ à ɛ̀a sùwà gó guu, asa í daa dũniaa piiɛ. Nɔee ɔbɔ̀ a kũ̀, à gɛ̃̀ò gó guu. 10À kãmabò e gɔɔ sopla, ɔ̃ à ɛ̀a felenapi gbàɛ lɔ. 11Felenapi ɛ̀a sùwà oosi, à kùla kàso a kpaa a lɛzĩ. Ɔ̃ Nɔee dɔ̃̀ kɛ́ í lào tɔɔlɛwa. 12À kãmabò gɔɔ sopla lɔ, ɔ̃ à ɛ̀a felenapi gbàɛ, i ɛa sùwà lɔo. 13Nɔee wɛ̃̀ ɔaa aaɔ̃ ń mɛndoode, a mɔ sɛ̃ia gɔɔ sɛ̃iazĩ í bà tɔɔlɛwa, ɔ̃ à gópi musu gò. Kɛ́ à gugwà, a è í làa tɔɔlɛwa. 14A mɔ plaade gɔɔ baasɔomplaodezĩ tɔɔlɛ giigàga.

15Ɔ̃ Lua yã'ò Nɔeeɛ à mɛ̀: 16Bɔ gó guu ń n nao ń n nɛgɔ̃ɛɔ ń n nɛɔ naɔ. 17Pɔ wɛ̃nide pɔ kunnɔɔ bɔlɛ pii, bãɔ ń nɔbɔɔ ń pɔtaa'onkuawaɔ pii, aa fãaa tɔɔlɛ, aaiɔ nɛ'i, aaiɔ kãfĩ dũniau. 18Ɔ̃ Nɔee bɔ̀ ń a nɛɔ ń a nao ń a nɛɔ naɔ. 19Nɔbɔɔ pii ń pɔtaa'onkuawaɔ pii ń bãɔ pii ń pɔ pɔ ì taa'o tɔɔlɛwaɔ pii, aa bɔ̀lɛ gó guu bui ń buio.

20Ɔ̃ Nɔee Dii gbagbakĩi bò. À nɔbɔ ń bã pɔ wì sa'oòɔ kũ̀, ɔ̃ à sa pɔ wì a pɔ katɛu à tɛkũ òòwà. 21Kɛ́ Dii a gĩmà, à kɛ̀ɛ̀ na, ɔ̃ à laasookɛ̀ à mɛ̀: Má ɛa mà laaizĩ tɔɔlɛwa gbɛ̃nazĩna yãi lɔo, asa gbɛ̃nazĩna laasoo ìɔ vãi za aà ɛwaasogɔɔɛ. Má ɛa mà pɔ wɛ̃nideɔ kaalɛ lá má kɛ̀wa lɔo. 22E dũnia gɛ laaò pɔtɔ̃a ń pɔkɛkɛao, ĩana ń guwãao, buziɛ ń saɛo, fãanɛ ń gwãasĩnao, a kee a midɛo.

Currently Selected:

Daa 8: Boo2024

Highlight

Copy