Daa 28

Yakɔbu baasi taa Labã kĩi

1Ɔ̃ Izaaki Yakɔbu sìsi, à samaa'òɛ̀, à yãdìlɛɛ̀ à mɛ̀: Nsu nɔsɛ Kanaa nɔɛɔ guuo. 2Fɛlɛ ǹ gɛ́ Mɛsɔpɔtami busuu n da mae Bɛtuɛ bɛ, ní nɔsɛ we n desɛ̃ Labã nɛɔ guu.

3Lua Gbãapiide baaadangu,

aà to ǹ nɛ'i maamaa, aaiɔ kãfĩ,

ní gɔ̃ buiɔ dezi ũ.

4Lua baaa pɔ a dà Ablahaũgu dangu ń n buiɔ pii,

kɛ́ busu pɔ ń kuu nibɔ ũ gɔ̃nɛ,

busu pɔ a kpà Ablahaũwaɛ bee.

5Ɔ̃ Izaaki Yakɔbu gbàɛ aà gɛ́ Labã kĩi Mɛsɔpɔtami busuu. Labãá Sili busu gbɛ̃́ Bɛtuɛ nɛɛ, Yakɔbu ń Esauo desɛ̃ɛ.

6Esau mà Izaaki samaa'ò Yakɔbuɛ, à aà gbàɛ Mɛsɔpɔtami, kɛ́ aà nɔsɛ we. Kɛ́ à sa maapi òɛ̀, à mɛ̀, asu nɔsɛ Kanaa nɔɛɔ guuo. 7A è Yakɔbu a mae ń a dao yãmà, à dà Mɛsɔpɔtami zɛ́u. 8Ɔ̃ a dɔ̃̀ sa kɛ́ Kanaa busu nɔɛɔ yã lí ká a maeguo. 9Ɔ̃ à gɛ̀ Ablahaũ nɛ Isimaɛla kĩi, à aà nɛ Maalata sɛ̀ a dà a nɔ sɛ̃iaɔ guu. Maalataá Nɛbaio dãeɛ.

Yakɔbu nana'oa Bɛtɛli

10Yakɔbu bɔ̀ Bɛɛsɛba, à dà Halana zɛ́u. 11Kɛ́ à kà guei, àlɛ i we kɛ́ ĩatɛ̃ gɛ̃̀ kpɛ́u yãi. Ɔ̃ à gbɛ sɛ̀ gupiu midibɔ ũ, à wùlɛ we. 12Ɔ̃ à nana'ò, a è dɔ̃gɛ̃gaa pɛlɛa tɔɔlɛ e à gɛ̀ zɔ̃̀ luawa, Lua malaikaɔ lɛ́ dɛdɛwà, aalɛ pilawà.#Zãa 1.51 13A è Dii zɛaala à mɛ̀:

Mamɛ má Dii n dezi Ablahaũ

ń n mae Izaakio Lua ũ.

Má tɔɔlɛ pɔ ń wulɛwàɛ bee kpamaɛ,

mpi ń n buiɔ.

14N buiɔ aaɔ dasi lan busu'ũfãawa,

aa ligua gukpɛ ń bɛ'aɛo

ń gugbãntooo ń gɛɔmidɔkĩio.

Dũnia bui pii a ɛfãai e

mpi ń n buio sabai.

15Máɔ kunnɔɛ,

máɔ n dɔ̃́a gu pɔ nlɛ gɛ́u pii,

mí ɛa mà sunnɔ busuɛ beeu,

asa má n to weo,

má yã pɔ má ònɛ kɛɛ.

16Kɛ́ Yakɔbu vù ń io à mɛ̀: Dii ku guɛuɛ, ɔ̃ mi dɔ̃o fa! 17Vĩa aà kũ̀ à mɛ̀: Guɛ beeá vĩaguɛ. Luakukĩiɛ, luabɛ zɛ́ɛ.

18Yakɔbu fɛ̀lɛ kɔɔ, à gbɛ pɔ a kɛ̀ midibɔ ũpi sɛ̀ a pɛ̀lɛ dɔngubɔ ũ, à nisikàwà, 19Ɔ̃ à tɔkpà gupiɛ Bɛtɛli,#28.19 Bee mɛ̀ Lua ua ãma wɛ̃lɛ pɔ wa kàlɛ we tɔ́ sɛ̃ian Luzu. 20Yakɔbu lɛkɛ̀ Diiwa à mɛ̀: Tó ń kumanɔ, mɛ́ nlɛ ma dɔ̃́a ma wɛ̃lɛɛ bee gɛa guu, mɛ́ nlɛ ma gba pɔblea ń pɔkasaɔ, 21e mà gɛ mà suò ma mae bɛ aafia, ńyɔ̃ɔ dɛ ma Lua ũɛ. 22Gbɛ pɔ má pɛ̀lɛ dɔngubɔ ũpi a gɔ̃ n gbagbakĩi ũɛ, mɛ́ pɔ pɔ n ma gba pii, má a kwide kpamaɛ.

Currently Selected:

Daa 28: Boo2024

Highlight

Copy