Daa 26
26
Izaaki ń ki Abimɛlɛkio
1Imina kà busupiu, a sɛ̃ia pɔ kà Ablahaũ gɔɔ baasi, ɔ̃ Izaaki fɛ̀lɛ gɛ̀ Filitɛ̃ɔ ki Abimɛlɛki kĩi Gelaa. 2Ɔ̃ Dii bɔ̀ à mɔ̀wà à mɛ̀:
Nsu ta Egipio.
Zɔ̃lɛ gu pɔ má onɛu.
3Ǹyɔ̃ ku busuɛ beeu gĩ́a.
Máɔ kunnɔ, mí ɛfãaikɛnɛ.
Má busuɛ bee kpamaɛ pii ń n buiɔ,
mí lɛ́ pɔ má gbɛ̃̀ n maeɛ kɛnɛ.
4Má n bui kãfĩ lan saanaɔwa,
mí busuɛ bee kpama pii.
Bui pɔ ku tɔɔlɛɔ pii
aa ɛfãai e n bui sabai,
5kɛ́ Ablahaũ ma yãmà yãi.
À ma ɔtondɔkĩi gwà,
mɛ́ a yã pɔ má dìlɛɔ kũa
ń ma yãdilɛnɛɔ ń ma ikoyãɔ.
6Ɔ̃ Izaaki gɔ̃̀ Gelaa. 7Kɛ́ beleɔ lɛ́ aà la aà na yãi, à mɛ̀ a dãeɛ. Asa àlɛ vĩakɛ, àlɛ e tó à mɛ̀ a naɛ, wa a dɛ nɔpi yãiɛ, asa nɔpiá nɔanaɛ. 8Kɛ́ àlɛ gɔɔplakɛ we, Filitɛ̃ɔ ki Abimɛlɛki lɛ́ zĩlɛ gwa fenɛtiu, ɔ̃ a su è Izaaki lɛ́ bɔ̃nɔble ń a nao. 9Ɔ̃ à Izaaki sìsi a òɛ̀: Asi n naɛ fa! Bɔyãi n mɛ̀ n dãeɛi? A wèwà à mɛ̀: Malɛ e wa ma dɛ aà yãiɛ. 10Abimɛlɛki mɛ̀: Bɔ́ yã ń kɛ̀wɛ̃ɛ màai? Yɔɔnnɔ mɛ́ gɔ̃̀ kɛ́ wá gbɛ̃e wulɛ ń n napio, dɔ̃ yãa n wá dá taaeu. 11Ɔ̃ Abimɛlɛki lɛzà gbɛ̃piiwa à mɛ̀: Gbɛ̃́ pɔ ɔkã̀ gɔ̃ɛpiwa ń aà nao, wa ade dɛ.
12Izaaki pɔtɔ̃̀ busupiu, ɔ̃ à pɔ è wɛ̃ bee lɛɛ basɔo, kɛ́ Dii ɛfãaidàuɛ̀ yãi. 13À zɔ̃ɔkũ̀, mɛ́ aà aizɛɛ ìɔ kãfĩ e à kɛ̀ ɔde sa bilibili ũ. 14A sãɔ ń zuɔ ń zɔɔ vĩ dasidasi, ɔ̃ Filitɛ̃ɔ zàaagu. 15Ɔ̃ aa lɔ̀ɔ pɔ aà mae Ablahaũ zĩkɛnaɔ yɔ̃̀yɔ̃ Ablahaũpi gɔɔɔ kàka ń busuo pii. 16Ɔ̃ Abimɛlɛki ò Izaakiɛ: Gowála, asa n gbãa dɛwála maamaaɛ.
17Ɔ̃ Izaaki bɔ̀ we, à bookpà Gelaa guzulɛu, ɔ̃ à gɔɔplakɛ̀ we. 18Lɔ̀ɔ pɔ wa yɔ̃̀yɔ̃ aà mae Ablahaũ gɔɔ mɛ́ Filitɛ̃ɔ kàka aà gaa gbɛaɔ ɔ̃ à ɛ̀a a bɔ̀bɔbɔbɔ, à tɔ́ doũ pɔ a mae kpànɛ́ yãaɔ kpànɛ́ lɔ. 19Izaaki zĩkɛnaɔ lɔ̀ɔ pãle yɔ̃̀ guzulɛpiu, ɔ̃ aa bɔ̀ í maawa. 20Ɔ̃ Gelaa pɔdãnaɔ lɛkpaakɛ̀ ń Izaaki pɔdãnaɔ aa mɛ̀: Wá íɛ! Ɔ̃ à tɔkpà lɔ̀ɔpiɛ Sole, kɛ́ aa solekɛ̀aanɔ yãi. 21Aa lɔ̀ɔ pãle yɔ̃̀, ɔ̃ wà lɛkpaakɛ̀ lɔ̀ɔpi yãmusu lɔ, ɔ̃ à tɔkpàɛ̀ Ibɛlɛ. 22À gò we, ɔ̃ à lɔ̀ɔ pãle yɔ̃̀ lɔ, aai lɛkpaakɛ a yãmusu lɔo. Ɔ̃ à tɔkpàɛ̀ Dɛɛpoo, asa à mɛ̀: Dii wá gba dɛɛpookĩi, wá ɔta sa.
23Bee gbɛa à gɛ̀ Bɛɛsɛba. 24Dii bɔ̀ à mɔ̀wà gwãasĩna bee à mɛ̀:
Mamɛ má n mae Ablahaũ Lua ũ,
nsu vĩakɛo, asa má kunnɔ.
Má ɛfãaikɛnɛ, mí n bui kãfĩ
ma zɔblena Ablahaũ yãi.
25We à sa'okĩi bòu à Dii sìsiu. Ɔ̃ à bookpà we, aà zĩkɛnaɔ lɛ́ lɔ̀ɔ yɔ̃. 26Ɔ̃ Abimɛlɛki bɔ̀ Gelaa à mɔ̀ Izaaki kĩi ń a kwaasi Ahuzao ń a zĩgɔ̃ɔ gbɛ̃zɔ̃ɔ Pikɔlio.#Daa 21.22 27Izaaki ń lá à mɛ̀: Lá a zamagu a ma ya á bɛ, akɛa a mɔ ma kĩii? 28Aa wèwà aa mɛ̀: Wá è Dii kunnɔɛ, ɔ̃ wa mɛ̀ a maa wà lɛdoũkɛ, wí lɛgbɛ̃kɔ̃ɛ a yãmusu, 29kɛ́ nsu yãvãie kɛwɛ̃ɛo, asa wi ĩadamao. Yãmaa ɔ̃ wá kɛ̀nɛ, wa n gbaɛ aafiaɛ, ɔ̃ Dii ɛfãaikɛ̀nɛ. 30Ɔ̃ Izaaki ń yaaekɛ̀, aa pɔblè, aa imì. 31Kɛ́ aa fɛ̀lɛ kɔɔ, aa lɛgbɛ̃̀kɔ̃ɛ, ɔ̃ Izaaki zɛ̀nɛ́, aa bɔ̀ aà kĩi aafia. 32Gɔɔ doũpi zĩ Izaaki zĩkɛnaɔ mɔ̀, aa lɔ̀ɔ pɔ wa yɔ̃̀ yã'òɛ̀ aa mɛ̀: Wa bɔ íwa! 33Ɔ̃ à tɔkpàɛ̀ Sɛba. Ayãmɛto wì mɛ wɛ̃lɛpiɛ Bɛɛsɛba#26.33 Bee mɛ̀ lɛgbɛ̃lɔɔ e ń a gbão.
34Kɛ́ Esau kà wɛ̃̀ bla, à Iti buiɔ nɔ sɛ̀ gbɛ̃ɔn pla, Beeli nɛ Yudi ń Eloni nɛ Basɛmao. 35Izaaki ń Lɛbɛkao nɔ̀sɛ ìɔ ɔ̃ɔkpaa an yãiɛ.
Currently Selected:
Daa 26: Boo2024
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.
