Luk 19
19
Te Jisas dali, Sakius dali si po
1Te Jisas te be nani nogi Jerikoba sabolama, tama tomoba pai, te be nani ela pomainu yali. 2Te be nanide bidali bidi me agai nogi Sakius. Agai mone sabo sę te Rom gavman takis sabo sę yai. Tama aga te takis sabo bagego polalubo bidi dao, agai mone me doado bage me kisu delalubo. 3Tama te bidi Sakius te Jisas asobo po odama, agai homu Jisas eno sueibao. Tiali goli te bidi Sakius te pęwadage bidi yai elalubaso, Jisas te agai subeo. Magi basowe? Te we bidi hauwa ugwanu polasa dolalubaso, te sesela salio, tama Sakius agai Jisas subo usube. 4Tama tibaso, Sakius polo udalama, pelama, polo te ni me deliba pai. Agai homu, ena e ni holama, te Jisas e ni pąba asobaso, eno aga sueibao. 5Tama Jisas te ni pąba sabolama, ni sigiba ogwa tonali, Sakius suali. Jisasgo te po wali, “Sakius, nage polo dulao. Megi da si nago beba pinao, tede bidaibao,” wali. 6Tama te po baso, Sakius polo dulali. Dwagi yai homu mu eyu, te Jisas agai beba odasa peyu, geseyu yai.
7Te we bidi augwaligo te sulama, tama hagelabo po weyu, te po wali, “Jisas te dwai sę ebo bidigo beba nai tugi pali.” 8Tama Sakius doligulama, agai te Genuai Bidi Jisasbolo te po wai, “Genuai Bidi, suao. Eno masigi dabe, doado bage tigidali si bugwaibao. Si bugulama, nai meni yai we bidi dobawaibao. Tama bidi mebolo eno ili po olama, agai nai wi sali da, tama megi te nai eno me si me si elama, wei ponaibao,” wali.
9Te Jisasgo te bidi Sakiusgo wali po odama, tama Jisasgo te po wali, “Megi tama Godigo e bede bidibo we bidi tau mayu, ma sali. Magi baso meni. E bidi da te polobadu bidali nogi yai bidi Abrahamgo ogwa mu dao. Polobadu Abrahamgo Godigo wali po odama, agai mu koneani, tia sali. Megi me, eno wali po odama, nago mu konealualio, tia sali. 10Ena Godigo Bidi Mu da, tama Godigo ena tagala palobaso, ena asali. Te olo hagawai we bidi eno gegi asai, te eno augwali tau mayu, ma somainu ebao,” Jisasgo te po wai.
Nogo si sę ebo bidi dabebolo mone ge dobayali po digi po
(Mat 25:14-30)
11Te we bidi augwaligo Jisasgo wabo po odobadi, agai gasa po me augwalibolo pusali, te po digi po. Tama Jisas te be nani nogi Jerusalem pąba sabalobaso, tama augwaligo geda muyu, te homu yali, Jisas te Jerusalem be naniba sabalobo si, Godigo we bidi tonalubo sę tamadi tama gagalaibao, augwaligo te homu yali. 12Tama tibaso, Jisasgo augwalibolo e po digi po pusali, agai te po wai, “Te nogi yai bidi me deli digibulu gasa buluba osogo pai hagede. Tama tede bidibadi, te gavman genuai polalubo bidigo aga te aga bulu genuai gavman bidi nigilaibao. Tama nigilama, aga page buluba ma bidagasaibao. 13Tama te bidi aga pisąbadi, agai sę ebo bage nogo si i olama, augwali deli delibolo mone ni yabe nogo si mawai. Agai augwalibolo te po wai, ‘Te ena gasa digibulu bulude bidibadi, dagego te mone sabo sę yao, eno mawai masigigo tama tiao, tama nosali eno masigi hauwa ma saibao,’ te po wai. 14Tama te po olama, tama te digibulu gasa buluba pabo gagalali. Tiali goli, te genuai bidi dologode bidaibao wabo bagego bidi me badu tagala palu, te po wai, ‘Dagego te gavman genuai polalubo bidibolo te po wao, “E bidi dago buludu asai bidi, da tonalubo bidi nigibo hagelabo” wao,’ te po wali.”
15“Tiali goli, te bidi digibulu buluba sabolama, te genuai polalubo bidigo aga genuai gavman bidi nigali. Tama agai gavman sę ebo bomo selama, aga buluba ma pali. Teba sabolama, agai polobadu masigi menama sę yali bidi dabe i wali, augwaligo gasa masigi nisu naga sali te suai hagede. 16Te hasia asai bidi aga pageba asama, te po wai, ‘Genuai bidi, nago enabolo mani ni yabego te eno sę ma elama, te 200 kina ma ugwadu daganabo profet mone salio,’ te po wali. 17Tama te genuai bidigo agabolo te po wei ponani, ‘Nage dwagi yai sę ebo bidi dao. Nago te sę bugagia yalio. Eno nago nogode te dwasianu mone menama, tama nago te dwasianu naigo bugagia tonalubo sę ebo bidi mu dao, te eno koneanio. Tama tibaso, megi te be nani nogo si tonalubo bomo eno nagebolo mobao,’ te po wai. 18Tama i badu sę ebo bidi aselama, te po wai, ‘Genuai bidi, nago enabolo mani monego te sę ma elama, te eno mone te 100 kina sai dao,’ wali. 19Tama te genuai bidigo agabolo te po wai, ‘Nago me te be nani a naga te nago tonaluao.’”
20“Te nosali bidi asiyu, te po wai, ‘Genuai bidi, nago enabolo mani mone e dao. E masigi eno ugwade tomogolama, bugagia muani. Magi baso meni. 21Eno nagede wi yalio. Nage da, homu sesena pabo bidi dao. Te gasa bidi dabego munalubo nai, te nago sabo dao. Naga gide nai bulisąma, te gasa bidigo gide bulali nai sabo bidi dao,’ wali. 22Te genuai bidigo agabolo po wei ponoyu, te po wai, ‘Nage dwai sę ebo bidi, nago megi wali pogo eno nage aiyaba elaluaibao. Ena da homu sesena pabo bidi dao, nago koneani. Gide nai bulisąma, eno te tubo nai naga sabo bidi dao, te me nago koneani. Gide nai bulisąma, ena tubo nai sabo bidi dao, te me nago koneani. 23Nago koneani, ena te tiwai bidi yaibaso, te nago eno masigi te benkde magi baso mubewe? Nage eno masigi te benkde mugi sogo da, teda ena ma asali sogode ena gasa masigi me badu ma sigi da,’ wali.”
24“Tama te genuai bidigo tede dolalubo bagebolo te po wai, ‘Te ni yabe nogo si masigi selama, te u bidi mao, te masigi bidi sese a naga 200 kina sali bidibolo mao,’ wali 25Tama tede dolalubo bagego te po wai, ‘Genuai bidi, te bidi agai bidi sese nogo a naga 200 kina polo sai dao,’ wai. 26Te genuai bidigo te po wali, ‘Eno dagebolo obao, te nai elalubo bidi agai nai me saibao. Tiali goli, te dwasianu nai elalubo bidigo nai gasa bidigo saibao. 27Tama eno boi bidi odasa asao. Augwali ena dologode bidibo hagelabo wali. Tama te bage odasa asao, eno gabidide hwągo ela muao,’ te genuai bidigo te po wali,” Jisasgo te po wai dao.
Jisas te Jerusalem be nani tomoba pali
(Mat 21:1-11; Mak 11:1-11; Jon 12:12-19)
28Te Jisas agai po ola mena silama, tama agai te Jeriko be nani tagalali. Te aga te we bidi polasa peyu, Jerusalem moni taunba pabo ma gagalali, ogwaba. 29Tama pelama, tama te dwasianu be nani si pąba sabolali. Be nani me nogi Betfage, te be nani me nogi Betani, te si pąba sabolali. Tama sabolama, augwali te bulu du nogi Oliv te bulu duba sabolali. Teba sabolama, tama Jisasgo bidi si i wali, augwali si tagala palama pomainu yali. 30Augwali sibolo te po wali, “U be naniba pao. Tama te be nani tomoba pelama, tede dage sigo kibu donki wai sueibao, page bidigo haliga gebelalio. Te gesi donki wai te bidi munu me duasiąwai donki dao. Te donki wai gebelali haliga pisigina sąyao, ena pageba sesao. 31Bidi mego dage sibolo dage te donki wai magi baso bono pisigawaniwe te po obaso, agabolo te po wei ponao, ‘Te Genuai Bidigo te donki waide sę elalubo,’ te po wao,” Jisasgo te po wai.
32Tama tibaso, te tagala palai bidi si u be naniba pelama, Jisasgo wali po mu salio, augwali sigo te donki wai suali. 33Tama te bidi sigo aga gebelali haliga pisigabadi, te donki wai page bidi dabego hanalu wali, “Dage sigo te hos wai magi baso pisigabawe?” 34Tama augwali sigo te po wei ponani, “Te Genuai Bidigo te donkide sę elalubuo,” wali. 35Tama augwali sigo te kibu donki wai Jisas magasali. Augwa holobo ugwa dabe dilama, donki wai tudide pasugulali. Tama munama, augwaligo Jisas tau selama, te tudide dualai. 36Tama Jisas te tiwai pobadi, te we bidi aga soabo sunumi au iliyu, augwa holobo ugwa dabe te pabo gesabi badu tųde dodolama, muani. Magi basowe? Genuai bidi asobaso tama muani.
37Te Jisas te Jerusalem be nani pąba sabolali, te bulu du nogi Oliv a odogoba pabo gagalali. Tama teba pobadi, aga wali asobo we bidi hauwa mu tigidali augwali dwagi yai homu mu eyu, bomonama i weyu, Godigo nogi ugwaba siyu yali. Augwaligo Jisasgo polobadu yali bomai sę subaso, Godigo nogi ugwaba sali. 38Augwali e tobage po wali, “Dago te genuai bidigo nogi ugwaba mu sobao. Aga te Godigo nogide asali bidi dao. Dago homugo dagalude boi pibo sogo asomainao. Dago Godigo nogi ugwaba mu sinao,” augwaligo te tobage po wali.
39Te we bidi tomode te Farisi bidi dabe me badu bidali. Tama augwaligo Jisasbolo te po wali, “Po ola mabo bidi, te nage wali asobo bidi dabebolo ‘Te po tagalama, sagia sao’ wao,” wali. 40Jisasgo te po wei ponani, “Eno dagebolo obao, e we bidigo sagia sobaso, teda e masigi dabego te tobage po wabo gagalaibao, Godigo nogi ugwaba saibao,” wali.
41Te Jisas te Jerusalem moni be nani pąba asiyu, te be nani suyu, agai te be nanide bidibo we bidide homu dene eyu, gela wali. 42Agai te po wali, “Ena wali asobo we bidi dabe augwaligo te boi pibo sunumi konebao. Megi eno homugo boi pibo te page Jerusalem bage dagego megi koneaibao. Tiali goli, te page God agai geme dualali, dagego sube. 43Nosali te dwai bidibadi te asaibao. Boi bidi dabe augwaligo e be nani bobegelaibao, dage wi pidali weyu. Augwaligo te be nani moni obode te tǫ hauwa diganama, te tǫ hobolu badu dagana saibao. Tigidali badu bobegelaibao. 44Augwaligo dage Jerusalem dabe ela silaibao, te be dabe tigidali augwaligo mu hųgiaibao. Be nigali masigi me deli ugwadu me munalugobeo, tigidali pepedelama, aba sąwaibao, meba me tedali, tedali, besala paibao. Magi baso te sę yaibawe? Woo, te Godigo dage suagasu tau sabo sogo asali side te dagego konebeo,” Jisasgo te po wai.
Jisas te Moni Lotu Be tempelba pai
(Mat 21:12-17; Mak 11:15-19; Jon 2:13-22)
45Te Jerusalem be nani tomoba pelama, Jisas te Moni Lotu Be tempel teba pali. Teba sabolama, te lotu be tomoba peyu, te maket tiwai nai dabe te tempel be tomode muduali bidi dabe agai buluba ela gudulu sela sąbo gagalali. 46Agai te bidi dabe sela sąbadi, te po wali, “Te bukude te Godigo wali po tede noma muanio, te asęani po me deli e dao, ‘Eno be te we bidi enabolo gedu haluasa po wabo be elaluaibao,’ te po polobadu asęani. Tiali goli, dagego e be te nai wi sabo bagego geme dualubo ola be tiwai nigilalio,” Jisasgo te po wai. #Ais 56:7; Jer 7:11
47Te Jisas agai te sę yali. Te deli deli sogo agai te we bidi dabebolo ola mani po wali, te Moni Lotu Be tempel tomode. Tama te pris tuni bidi dabe me, te Godigo polobadu wali po koneani bage me, augwaligo Jisas elabo tų gegali. Te Juda dabe tuni bidi dabe me, augwaligo Jisas elabo tų gegebo gagalali. 48Tiali goli, te Jisas elabo tų augwaligo sube. Magi baso meni. Te we bidi tigidaligo bomo mu elama, Jisasgo wabo po odai hagede.
Currently Selected:
Luk 19: mps
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
