Mat 8
8
Mbanafta Yesu ta mndu nda rɗa mndu tida
Mak 10:40-45
1Manda saha *Yesu ta ghwá, ka sliʼaftá ndghata dəmga mista ni. 2Ka lagha sana mndu nda rɗa mndu tida zləmbata ma ghuva ni, kaʼa mantsa: « Mghama ɗa, ka ta kumay ka, laviŋ lava ka ta mbiɗifta, » kaʼa. 3Ka fadaptá Yesu ta dzva ni ka ksaŋta, kaʼa nda tsi mantsa: « Ta kumay yu, mbaf mba gha, » kaʼa. Gi hada hada ka mbaftá tsa mndu ya. 4Ka Yesu nda tsi mantsa: « Yaha yaha ka mnanaŋtá mndu! La ka dzaʼa ka da maranaŋtá vgha gha ta mnda dra skwi ŋa Lazglafta, ka plata ka ta ghəŋ nda skwi manda ya mna zlaha Musa, kada snaŋta mnduha nda mba#8:4 Ngha ta Zlahu 14:2-23. ka kəʼa, » kaʼa nda tsi.
Mbanafta Yesu ta kwalva mghama sludza la Ruma
Luk 7:1-10, Yuh 4:43-54
5Ta lam *Yesu da luwa Kafarnahum, ka lagha sana mghama sludza la Ruma ndəɓa dzvu da tsi. 6Kaʼa nda tsi mantsa: « Mghama ɗa, waʼa kwalva ɗa ta hani mintgha gəzəmblaʼ a ta ghuya ɗaŋwa katakata, » kaʼa. 7« Ta dzaʼa yu da mbanafta, » ka Yesu nda tsi. 8« Mghama ɗa! Ra a yu ka lagha gha da ini wa. Ka sab sa gwaɗa teʼ ma wa gha ná, dzaʼa mbaku kwalva ɗa. 9Iʼi guli ná, mista maliha nziŋta yu, mamu sludziha mista iʼi guli. “Ka la!” ka yu nda sani, gi sliʼa ni. Ka “sagha sa!” ka yu nda sani, gi sagha ni. Ka “maga ta ya!” ka yu nda kwalva ɗa, gi magay ni, » ka tsa mghama sludzi ya.
10Snanata Yesu ta tsa gwaɗa mghama sludzi ya, ka laghu tsi ndərmimay. Kaʼa nda tsa gwal mista ni ya mantsa: « Kahwathwata ká yu ta mnaghunata, dər mataba la Israʼila, ta slaf a yu ta mndərga zlghay nda ŋuɗufa mndu manda nana wa. 11Ka yu ta mnaghunata ná, nda ndgha gwal zlghay nda ŋuɗuf mndərga nana dzaʼa sliʼagaghata daga ma mndəra luwa nda ya mista luwa#8:11 Mndəra luwa: Tsaya tva safa fitik. Mista luwa: Tsaya tva dəɗakwa fitik., ka nzata ka za skwi kawadaga nda i Abraham nda Izak nda Yakubu ma ga mghama Lazglafta. 12Ama gwal má dzaʼa nzakway ka zwana za həga ga mghama Lazglafta ya, dzaʼa hlaf hla lu ta həŋ ka pghidiŋta da grum mabli, ma vli ŋa taw nda hpaɗa sliʼiŋ, » kaʼa.
13Ka Yesu nda tsa mghama sludzi ya mantsa: « La dzagha gha! Dzaʼa maga maga lu manda ya zlghaf ka, » kaʼa. Gi ma va tsa fitik ya ka mbaftá tsa kwalva ni ya.
Mbanafta Yesu ta midza Piyer
Mak 1:29-34, Luk 4:38-41
14Ka sliʼaftá *Yesu ka lagha da *Piyer, ka slanaghatá tsi ta midza Piyer ta hani ta ɓasa ŋuɗidar. 15Ka ksaŋtá tsi ta dzvu, ka mbaftá tsi da tsa ŋuɗidar ya. Ka sliʼaftá tsi ka maganatá skwa zay.
16Gahawani, ka hladaghatá lu ta ndghata gwal nda ksa da ghwaɗaka sulkumha. Ka ghazligiŋtá tsi ta tsa ghwaɗaka sulkumha ya nda gwaɗa ma wa ni. Ka mbambanaftá tsi ta inda gwal kul ɗughwanaku. 17Mantsa ya magata tsi ŋa dzanaghatá ghəŋa gwaɗa ya mna anabi Isaya kazlay:
« Tsatsi ka ghəŋa ni ta hlaghutá
ɗaŋwaha mu,
ka mbambamafta ma kwala mu
kul ɗughwanaku#8:17 Ngha ta Isaya 53:4. kəʼa ya. »
Mamay mnduha ta dzaʼa mista Yesu
Luk 9:57-62
18Nghanata *Yesu ta dəmga ta wanafta ná, « mbaɗma ta a ɓlu a, » kaʼa. 19Ka lagha sana mnda vinda zlahu slanaghata, kaʼa nda tsi mantsa: « Maləma ɗa! Ta dzaʼa mista gha yu dər dzaʼa diga ka, » kaʼa. 20Ka Yesu nda tsi mantsa: « Gərhaŋha ná, mamu ghurumha taŋ. Ɗyakha ta ndaraku ta luwa guli, mamu həgaha taŋ. Ama *Zwaŋa mndu ná, haɗ dər vli ŋa fadatani ta ghəŋa ni wu, » kaʼa.
21Ka sani mataba duhwalha ni mantsa: « Mghama ɗa! Zliha zla ka dzaʼa yu da paɗamtá da ɗa karaku, » kaʼa. 22Ka Yesu nda tsi mantsa: « Mbaɗa kagha mista ɗa! Zlaŋ zla ta gwal nda rwa ka paɗa həŋ ta mbliha taŋ, » kaʼa.
Lɓanata Yesu ta falak ta drəf
Mak 4:35-41, Luk 8:22-25
23Ka sliʼaftá *Yesu ka lami da kwambalu, ka laghu duhwalha ni mista ni. 24Tata ndəru həŋ ta drəf, ka sliʼavaftá mghama falak, ka kapatsaʼuwaku imi, ka sliʼi da kwambalu. Ma tsa fitik ya, ta hanutá hana ni Yesu. 25Ka sliʼaftá duhwalha ni ka lagha sliʼanafta. Ka həŋ nda tsi mantsa: « Mghama ɗa, katá ta amu, dzaʼa rwaku mu! » ka həŋ. 26Ka Yesu nda həŋ mantsa: « Nu ta kəl kuni ka zləŋ. Kay! Nda hta zlghay nda ŋuɗufa ghuni, » kaʼa. Ka sliʼaftá tsi ka davanaghatá falak nda drəf, ka nzatá vli tɓekw. 27Ka ndərmim tsa mnduha ya katakata. « Wa na mndu na ta snə#8:27 Ngha ta Zabura 65:8, 89:10, 107:23-32. dər falak nda drəf tani ta gwaɗa ni katək na? » ka həŋ.
Mbanafta Yesu ta sana mnduha his nda ghwaɗaka sulkum ma həŋ
Mak 5:1-10, Luk 8:26-39
28Ɓhadapta taŋ ta tsa sana ɓla drəf ta haɗika *Gadaraniya ya, ka sliʼagaptá sana mnduha his ma kulu kasu halaway, ka lagha həŋ da guyay. Ta zləŋay lu ta həŋ katakata, laviŋ a mndu ta walaŋta lab nda təv tsa wa. 29Ka gi dzə həŋ ta lawlaw. Ka həŋ mantsa: « Nya mataba mu nda kagha ní Zwaŋa Lazglafta? Sagha da ghuyaŋnaftá ka ta kul magaku fitika ni ra? » ka həŋ.
30Tsaw manda a nda həŋ, mamu sana bra ghuvazu#8:30 Ngha ta Markus 5:11. dagala ta nghə lu. 31Ka ndəɓu tsa halawayha ya ta dzvu da *Yesu. Ka həŋ mantsa: « Ka ta ghəzla aŋni ka ná, ghuna ta aŋni da a bra ghuvazuha a, » ka həŋ. 32Kaʼa nda həŋ mantsa: « Lawa la! » kaʼa. Ka sliʼagaptá həŋ ka sliʼamta da tsa ghuvazuha ya. Ka vazagatá tsa bra ghuvazuha ya ta vgha ta vata vli, ka rkaghata da drəf, ka zaɗamtá həŋ mida.
33Ka sliʼafta tsa gwal si ta ngha həŋ ya nda hwaya, ka laghu da luwa da mna inda skwi ta maguta, nda ya ta slanaghatá tsa mnduha kasu halaway ya. 34Ka sliʼagaptá mnduha ma luwa nekwnekw da guya Yesu. Na tsa gi nghaŋta taŋ ta Yesu ya, « kdəkkdək, sliʼap sliʼa ma haɗika ŋni, » ka həŋ nda tsi.
Currently Selected:
Mat 8: xed
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
