Zlr 47

Lagha Yakubu ta kəma Firʼawna

1Ka sliʼaftá Yusufu ka lagha da mnanatá Firʼawna, kaʼa mantsa: « Ɓhagagha ɓha i da ɗa nda zwana ma ɗa, nda rina fisika taŋ, nda slaha taŋ tani, nda inda huzla taŋ, daga ta haɗika Kanʼana. Wa a həŋ ndanana ta haɗika Guseŋ, » kaʼa. 2Mataba zwana ma ni, ka hlaʼatá tsi hutaf ta həŋ, ka lagha maraŋtá həŋ da Firʼawna. 3Ka Firʼawna nda tsa zwana ma ni ya mantsa: « Nahgani slna ghuni na? » kaʼa nda həŋ. Ka həŋ nda Firʼawna mantsa: « Kwalvaha gha ná, ngha rini slna ŋni manda ŋa ŋa dzidzíha ŋni guli, » ka həŋ. 4Ka həŋ nda Firʼawna mantsa: « Sagha sa ŋni ŋa nzata ta na haɗik na kabga haɗ vli ŋa ngha rina kwalvaha gha wu, dagala maya ta haɗika Kanʼana. Ndanana, ta ndəɓa dzvu kwalvaha gha da kagha, ka vlaŋnata ka ta tvi ka nzata ŋni ta haɗika Guseŋ, » ka həŋ nda Firʼawna.

5Ka Firʼawna nda Yusufu mantsa: « Ndanana wana sagha sa i da gha nda zwana ma gha da slaghaghata, 6ta kəma gha inda haɗika Masar, pgha pgha ta i da gha nda zwana ma gha ma ŋərma vli ta na haɗik na. Laviŋ lava həŋ ta nzata ta haɗika Guseŋ. Ka nda sna ka mamu gwal nda viɗa mataba taŋ katsi guli, zabap zaba ta həŋ ŋa nghapta vərɗa ŋa ɗa bra guli, » kaʼa.

7Ka kladamtá Yusufu ta da ni Yakubu maraŋta da Firʼawna. Ka tfanaghatá Yakubu ta wi ta Firʼawna. 8Ka Firʼawna nda Yakubu mantsa: « Kidaghi ima gha na? » kaʼa nda tsi. 9Ka Yakubu nda Firʼawna mantsa: « Má dərmək nda hkən mbsaka ima ɗa na ta ra vli. Kiʼa yeya ima ɗa mndani, nda ghuya ɗaŋwa ɗa katakata. Ta laf a ta mbsaka vakwa ɗa ta ŋa dzidzíha ɗa ma fitika ray taŋ ta vli wu, » kaʼa. 10Ka tfəglanaghatá Yakubu ta wi ta Firʼawna, ka saghu tsi ka zlanatá Firʼawna.

11Ka pghatá Yusufu ta i da ni nda zwana ma ni, ka vlaŋta ŋa ŋa taŋ ta ŋərma vli ta haɗika Masar ta haɗika Ramses, manda ya mna Firʼawna. 12Ka vlaŋtá Yusufu ta skwa zay ta i da ni nda zwana ma ni nda inda gwal ma həga ga da ni ta mbsaka mndu ma həga ga taŋ.

Nuta la Masar ka vuʼa Firʼawna

13Haɗ skwa zay ɗekɗek ta inda haɗik wu, kabga furtu furta maya. Nda ɓadza haɗika Masar nda haɗika Kanʼana da tsa maya ya. 14Ka tskaktá Yusufu ta inda tsedi si ta haɗika Masar nda haɗika Kanʼana ma vəl dzawanapta ni ta zimi ta həŋ. Ka tskanatá tsi ta tsa tsedi ya ma həga ga Firʼawna. 15Ka kɗutá tsedi da mnduha ta haɗika la Masar nda ya ta haɗika Kanʼana. Ka sliʼadaghatá inda la Masar da Yusufu. Ka həŋ mantsa: « Vlaŋna vla ta skwi ŋa zay, kabgawu dzaʼa kəl ŋni ka rwuta ta wa ira gha, dabga tseda ŋni kul haɗ na? » ka həŋ. 16Ka Yusufu mantsa: « Vlihawa vla ta rina ghuni, ka vlaghunata yu ta skwa zay tida, ka si haɗ tseda ghuni ya, » kaʼa. 17Ka hlanaktá həŋ ta rina taŋ ta Yusufu, ka vlaŋtá Yusufu ta skwi ŋa zay ta həŋ, ka mbəɗapta nda plisha taŋ, nda rina fisika taŋ, nda slaha taŋ, nda kəɗihha taŋ. Ta tsa vaku ya ka mbəɗ tsi ta skwa zay ŋa taŋ nda riniha ta vlata həŋ. 18Manda kɗuta tsa vaku ya, sagha sana vaku ka lagha həŋ da Yusufu, ka həŋ nda tsi mantsa: « Haɗ ŋni dzaʼa ɗifanatá mghama ŋni ta ŋwayatá tsedi wu, bra rina ŋni guli ná, ŋa mghama ŋni ya. Htsiŋa ŋni nda haɗika ŋni yeya pɗakwa ni ta kəma mghama ŋni. 19Kabgawu dzaʼa kəl ŋni ka rwuta ta wa ira gha tekeʼa htsiŋa ŋni, nda haɗika ŋni tani na? Skwa ta aŋni nda haɗika ŋni tani, ka vlaŋnata ka ta skwa zay. Ka nzakwa aŋni nda haɗika ŋni tani ka kwalva Firʼawna. Hlaŋnaf hla ta hulfa, kada nzakwa ŋni nda hafu yaha ŋni da rwutá, yaha vwah da nzaku ma madza, » ka həŋ.

20Ka dzawaghutá Yusufu ta inda haɗik ma Masar ka ŋa Firʼawna, ka dzawapta inda la Masar ta vwaha taŋ, kabga furtu furta maya. Ka nzakw haɗika taŋ ka ŋa Firʼawna. 21Ka niŋtá Yusufu ka vuʼa ta mnduha sliʼafta ni ta sana herher tsa haɗik ya dikw ta sana herhera ni. 22Haɗikha gwal dra skwi ŋa lazglaftaha yeya kul skwatá tsi, kabga mamu zlaha Firʼawna ta nghanaghatá tsa gwal ta dra skwi ŋa lazglaftaha ya. Tsa faway ta vlaŋta Firʼawna ta həŋ ya ta zə həŋ. Tsaya kwal hahəŋ dzawaptá tsa haɗikha ya. 23Ka Yusufu nda mnduha mantsa: « Wya dzawaghu dzawa yu gita ta kaghuni, nda haɗika ghuni tani, ŋa Firʼawna. Wana yu dzaʼa vlaghunatá hulfa ŋa dzaʼa ghuni sləgay ma vwah. 24Ama ma fitika tska skwi ta vwah ya, turtuk ma dgata ni hutaf, ta skwi dzaʼa tskata kuni dzaʼa vlaŋta kuni ta Firʼawna. Ya pɗakwa ni fwaɗ ma dgata ni hutaf ya ná, ŋa ghuni tsa, ŋa hulfa ŋa sləgay ma vwah nda ya ŋa zay ghuni nda inda gwal ma həga ghuni tani, nda ya ŋa skwa zaya zwana ghuni tani, » kaʼa. 25Ka həŋ mantsa: « Rvera ɗa, nzula ŋna nzula ka ta hafu. Tsəhala zɗaŋnaŋ zɗa mgham ta huɗi ya ná, tsuʼaf tsuʼa ŋni ta nzakwa ŋni ka vuʼa Firʼawna, » ka həŋ. 26Ka vindaftá Yusufu ta zlahu ta nzakway ha gitana ta haɗika Masar. Skwi maga lu ta haɗika Masar ná, turtuk ma dgata ni hutaf ya, ŋa Firʼawna. Haɗikha ta nzakway ka ŋa gwal dra skwi ŋa lazglaftaha yeya kul nzakway ka ŋa Firʼawna.

Dzatá ghəŋa ndana Yakubu

27Ka nzatá Israʼila ta haɗika Masar, ta haɗika Guseŋ. Ka mutsaftá həŋ ta vli ŋa ŋa taŋ hada. Ka yayatá həŋ ta zwani, ka yutá həŋ tusak. 28Ghwaŋpəɗ ndəfáŋ vakwa Yakubu ma haɗika Masar. Gwagwata ima Yakubu nda tsa ná, vaku dərmək nda fwaɗ mbsak ndəfáŋ mida (147) həŋ. 29Sunafta Israʼila ta dzaʼa ni mtaku, ka hgaftá tsi ta Yusufu zwaŋa ni, kaʼa nda tsi mantsa: « Ka ta zɗaɗiŋ zɗa ka ta huɗi ka katsi ná, kdəkkdək, fiŋ fa ta dzva gha mista rkufa#47:29 Fiŋ fa ta dzva gha mista rkufa ɗa, tsaya waɗu ŋa kwal kul ɓlanapta ta skwi mna lu. ɗa, mariɗiŋ mara ta ɗva gha nda nzakwa gha ka ŋərma mndu. Yaha ka da lamtá iʼi ma Masar, kdəkkdək. 30Ama ka laghu la yu da dzidzíha ɗa katsi ná, ka klafta ka ta iʼi ma Masar, ŋa dzaʼa lamtá iʼi ma kula taŋ, » kaʼa. « Aray! Dzaʼa magay yu manda ya mna ka, » Ka Yusufu. 31Ka Yakubu mantsa: « Waɗiha waɗa, » kaʼa. Ka waɗanatá Yusufu. Ka tsəlɓatá Israʼila ka dzatá ghəŋ ndusa nda ghəŋa ghəzləŋa ni.

Currently Selected:

Zlr 47: xed

Highlight

Copy