Zlr 34

Ksutá Dina makwa Yakubu

1Ma sana fitik, ka sab Dina, makwa Yakubu ta yata nda Leʼa ka laghu da ngha kwaghi ma tsa haɗik ya. 2Ka nghaŋtá Səkem zwaŋa Hamur la Hiv mghama tsa luwa ya. Ka ksutá tsi, ka hanata nda tsi ka mbraku. 3Ka laghu tsa Dina makwa Yakubu ya da ŋuɗufa ni, ka ɗvutá tsi ta tsa makwa ya, ka ɗvutá tsa makwa ya guli. 4Ka gwaɗganatá Səkem ta Hamur da ni, kaʼa mantsa: « Klaɗif kla ta tsa makwa ya ŋa markwa ɗa, » kaʼa.

5Ka snanaghatá tsi ta Yakubu kazlay ɓadziŋ ɓadza lu ta makwa ni Dina kəʼa. Ma tsa fitik ya ma vwah zwana zgwana ni ta ngha rini. Mantsa tama, ka nzatá tsi tsəriɗ ha ka sagha zwana ni. 6Ka sliʼaftá Hamur da ni ma Səkem ka lagha da Yakubu da gwaɗganata. 7Ka vraktá zwana Yakubu ma vwah. Manda snaŋta taŋ ta skwi ta maguta, tsaghutá mndu ri ki tsa na, ka həŋ. Ka kuzlanaftá tsi ta həŋ ta ŋuɗuf, kabga maga maga lu ta skwa hula ta wa ira la Israʼila, na tsa hnata nda makwa Yakubu ya. Skwi má dzaʼa kwal kul magavatá tsaya. 8Ka Hamur nda həŋ mantsa: « Ɗvu ɗva zwaŋa ɗa Səkem ta makwa ghuni ma ŋuɗufa ni, kdəkwa kdək zlanaŋwa zla ŋa markwa taŋ. 9Dzrafma dzra ta wi, ka zlaŋnaŋta kuni ta kwagha ghuni, ka kla kaghuni guli ta kwagha aŋni. 10Nzawa nza kawadaga nda aŋni, ŋa nzakwa na haɗik ŋa maga inda skwi kumaŋ kuni, nzawa nza mida, ka tsakala kuni ta tsakala ghuni, ka nzakwa na haɗik na ŋa ghuni, » kaʼa.

11Ka Səkem nda da ni nda ya nda zwana ma ni ma tsa makwa ya mantsa: « Zɗaɗiŋwa zɗa ta huɗi, dzaʼa vlay yu ta skwi dzaʼa kuni ɗawaŋta da iʼi. 12Mnihawa mna dər kidaghi skwa wumay, nda mbəhu tani, dzaʼa play yu. Vlihata kaghuni ŋa ghuni ta tsa makwa ya ŋa markwa ɗa, » kaʼa. 13Ka zlghanaftá zwana Yakubu ta wi ta i Səkem nda da ni Hamur nda hiɗakwa taŋ, kabga ɓadziŋ ɓadza Səkem ta makuma taŋ Dina. 14Ka həŋ mantsa: « Laviŋ a aŋni ta maga tsa ta mnə kagha ya wa. Ka klafta ŋni ta makuma ŋni ka vlaŋtá mndu kul tsaku fafaɗa ni ná, skwa hula tsaya da aŋni. 15Dzaʼa tsuʼaf tsuʼa ŋni, ba ka tsuʼaf tsuʼa kuni ta nzata manda aŋni kasiʼi. Ɗatsiŋta zgwana mataba ghuni karaku ta fafaɗa taŋ. 16Ka mantsa tsi katsi, dzaʼa vlaghuna vla aŋni ta kwagha ŋni, ka klay aŋni ta kwagha kaghuni, dzaʼa nza nza mu kawadaga nda kaghuni, dzaʼa nzakway mu ka mndəra mndu turtuk nda kaghuni. 17Ka tsuʼaf a kuni ta gwaɗa ŋni, ka ɗatsata ghuni ta fafaɗa ghuni wu katsi, dzaʼa klaghu kla ŋni ta makuma ŋni ka laghwa ŋni, » ka həŋ.

18Ka zɗəganatá tsa gwaɗa taŋ ya ta i Hamur nda Səkem zwaŋa Hamur. 19Gi ka magatá tsa duhwal ya ta tsa skwi ya, kabga ɗvu ɗva katakata ta makwa Yakubu. Ka ŋərma katakata klafta lu ma həga ga da ni. 20Ka sliʼaftá i Hamur nda Səkem ka lagha ta wa tgha luwa taŋ. Ka həŋ nda mnduha ma luwa taŋ mantsa: 21« Ta kumay tsa mnduha ya ta nzaku nda zɗaku nda amu. Ka nza həŋ ma haɗika mu, ka tsakala həŋ ta tsakala taŋ, ka maga həŋ ta skwi ya kumaŋ həŋ ma na haɗik na. Dzaʼa hlay mu ta kwagha taŋ ŋa miʼa mu, dzaʼa vlay amu ta kwagha mu ŋa taŋ guli. 22Ama dzaʼa tsuʼaf tsuʼa həŋ ta nzata kawadaga nda amu, ŋa nuta mu ka mndəra mndu turtuk ka tsuʼaf tsuʼa mu ta maga skwi turtuk kweŋkweŋ. Tsa skwi ya ná, ɗatsata inda zgun mataba mu ta fafaɗa taŋ manda ŋa taŋ ta ɗatsatá fafaɗ ya. 23Nzata a bra taŋ, nda inda skwa taŋ, nda rina taŋ ka ŋa mu wu ra? Zlghafta amu kweŋkweŋ ŋa amu ta tsa skwi mna həŋ ya, ka nzata həŋ mataba mu, » ka həŋ.

24Ka zlghaftá inda gwal ta lab ta tsa wa tgha luwa ni ya ta tsa gwaɗa i Hamur nda zwaŋa ni Səkem ya. Ka ɗatsatá lu ta fafaɗa inda zgwana, inda zgwana ta sab ta wi tgha tsa luwa ya.

Zuta zwana Yakubu ta avana luwa Səkem

25Baɗu mahkəna fitik tama ta ɓasay ɓasay tsa zgwanaha ya ta tsa ɗatá fafaɗ ya, ka hlaftá i Simghuŋ nda Levi zwana Yakubu, zwana ma ni ma Dina ta kafaya taŋ. Ka lam həŋ da luwa sna a mnduha kazlay mamu sana skwi dzaʼa maguta kəʼa wu, ka pslatá həŋ ta inda zgwana. 26Ka pslatá həŋ ta i Hamur nda zwaŋa ni Səkem guli nda kafay. Ka klagaptá həŋ ta makuma taŋ Dina ma həga ga Səkem, ka laghwa taŋ nda tsi.

27Ka lagha pɗakwa sanlaha ma zwana Yakubu da hlatá skwiha ta gwal nda rwa, ka hlaghatá inda skwi ma luwa, kabga ɓadziŋta lu ta makuma taŋ. 28Ka hlaghatá həŋ ta rina fisika taŋ, nda slaha taŋ, nda kəɗihha taŋ, nda skwiha ma luwa, nda skwiha ma vwah tani. 29Ka hlaghatá həŋ ta inda skwa gadghəla taŋ, nda inda zwana taŋ, nda miʼaha tani, ka zləɗaghatá həŋ nekwnekw ta inda skwi ma həga taŋ.

30Ka Yakubu nda i Simghuŋ nda Levi mantsa: « Magiha maga kuni ta ghwaɗaka skwi, ka niɗta ka ghwaɗaka mndu ta kəma na mnduha ta na haɗik na, i la Kanʼana, nda la Periz. Sira a mnduha ɗa wu, ŋa tskafta taŋ ta vgha ta iʼi, ka dzatá iʼi, ŋa zaɗihata taŋ nda la ga ini tani, » kaʼa.

31« Ka karwa dzaʼa laviŋta tsi ta klaftá makuma mu rki na? » ka həŋ.

Currently Selected:

Zlr 34: xed

Highlight

Copy