Zlr 27

Zluʼaghuta Yakubu ta tfa wa Ghesav

1Ka hwaluta Izak ka razlutá ira ni nghəgla a ta vli wa. Ka hgaftá tsi ta Ghesav, zumala ni, kaʼa nda tsi mantsa: « Zwaŋa ɗa! » kaʼa. « Wana yu! » kaʼa. 2Kaʼa guli mantsa: « Nda ngha kagha ta halata iʼi, ma dzva ɗa a hafa ɗa guli wu. 3Mantsa tama, wya dzvu, hlaf huzla gha, ghwadza gha, nda lgheɗa gha, ka dzaʼa ka da rayiɗiktá nimtak. 4Ka dihata ka zɗa hwenzeɓesl mnda ya ta kum yu, ka zuta yu, ka tfaghaghata yu ta wi, ma kɗaku yu mtuta, » kaʼa nda tsi.

5Ta gwaɗ Izak ta tsa gwaɗa ya nda tsa zwaŋa ni Ghesav ya ná, ta snay snay Rebeka. Ka sliʼaftá Ghesav ka laghu da mtak da raya, ŋa ksaktá nimtak. 6Ka Rebeka nda zwaŋa ni Yakubu mantsa: « Wya skwi snaŋ yu ta mnə da gha ŋa zwaŋama gha Ghesav, kaʼa nda tsi na: 7“La ksaɗiktá nimtak ka dihata ka zɗa hwenzeɓesl, ka zuta yu, ka tfaghaghata yu ta wi ta kəma Yawe, ma kɗaku yu mtuta,” kaʼa. 8Ndanana sagəŋ, fiha fa ta sləməŋ, ka maga ka ta skwi ta mnaghata yu. 9La ta bra, ka kasiɗikta ka ta slaɓalakwa guha gudeɓesl his, ka danata yu zɗa hwenzeɓesl ta da gha manda ya ta zɗəganata. 10Ka klədanamta gha ta da gha, ŋa zuta ni, ŋa tfaghaghata ni ta wi ma kɗaku tsi ka mtuta, » kaʼa nda tsi.

11Ka Yakubu nda ma ni Rebeka mantsa: « Zɗa tsa, tsaw zwaŋama ɗa Ghesav ná, sumtuk vgha tsatsi ka swidi, haɗ swidi ta iʼi wu. 12Kawayaka skwi tap tap tap ka da ɗa dzaʼa tapihata. Ka tsatsaf tsatsa tsi, dzaʼa klaf kla ta iʼi ka mnda tsa səla mndu. Dzaʼa tɗanak tɗa yu ta ksiʼi ta ghəŋa ɗa, tfaɗighata a ta wi wu, » kaʼa. 13Ka ma ni mantsa: « Ta ghəŋa ɗa ka tsa ksiʼi ya sagəŋ. Fiha fa ta sləməŋ, la kagha da hliɗiktá həŋ, » kaʼa.

14Ka laghu Yakubu hlaktá tsa guha ya ka vlaŋtá ma ni. Ka datá ma ni zɗa hwenzeɓesl manda ya ta zɗəganatá da ni. 15Tahula tsa, ka klaftá Rebeka ta lguta Ghesav, zumala ni. Ka zbaptá tsi ta ya ɗinuta da tsi, ka suɗanavatá Yakubu zwaŋa ni ka sagəŋ. 16Ka mbaghwanaftá tsi nda huta tsa guha ya ta dzvuha ni nda ŋurzluŋa ni kuraghwa vliha kul haɗ swidi. 17Ka klaftá tsi ta tsa skwi da tsi zɗa hunzeɓesl ya, nda buradi da tsi guli, ka vlaŋtá Yakubu. 18Ka lam tsi slanaghatá da ni kaʼa nda tsi mantsa: « Da ɗa, » kaʼa. « Wana yu sagəŋ, wa kagha na? » kaʼa. 19Ka Yakubu mantsa: « Iʼi Ghesav zumala gha ya, wana magata yu ta skwi ɗawiha ka kay, sliʼaf sliʼa ka nzata ka, ka za ka ta sluʼa nimtak ksaghak yu kay, ka tfaɗighata ka ta wi, » kaʼa. 20Ka Izak nda zwaŋa ni mantsa: « Heee! waká ka magay kəl ka ka gi mutsaftá nimtak tewtew na? » kaʼa. Kaʼa mantsa: « Yawe, Lazglafta gha ta dɗiɗifta ta ghuva, » kaʼa.

21Ka Izak nda Yakubu mantsa: « Gavagagha gava ta vata iʼi zwaŋa ɗa, ka ksaghata yu, ŋa grafta ɗa ɗina kazlay kagha zwaŋa ɗa Ghesav ya kəʼa, » kaʼa 22Ka gavadaghatá Yakubu ta vata da ni Izak, ka tatapaŋtá tsi, kaʼa mantsa: « Lwi ya ná, manda lwa Yakubu kəʼa, ama dzvuha ni ya ná, dzvuha Ghesav ya, » kaʼa. 23Tsatsaf a wu, kabga ka swidi dzvuha ni, manda ŋa zwaŋama ni Ghesav. Ama ma kɗaku tsi ka tfanaghatá wi, 24ka ɗawaŋtá tsi da tsi: « Vərɗa zwaŋa ɗa Ghesav kagha re? » kaʼa. « Aŋi! iʼi ya, » ka Yakubu.

25Ka Izak guli mantsa: « Vliha vla sagəŋ, ta sluʼa mtak ya mutsaf ka ka zuta yu, kada tfaghaghata yu ta wi, » kaʼa. Ka vlaŋtá Yakubu ka zutá tsi. Klədanamha ta ima inabi guli ka sutá tsi. 26Ka da ni Izak nda tsi mantsa: « Gavak gava da ghuva ɗa, ka brusata ka ta iʼi sagəŋ, » kaʼa. 27Ka lam Yakubu da ghuva da ni da brusay, ka snaŋtá Izak ta ziʼakwa lguta ni, ka tfanaghatá tsi ta wi, kaʼa mantsa: « Kahwathwata ná, ziʼakwa vgha zwaŋa ɗa ya ta nzakway manda ziʼakwa vwah tfanagha Yawe ta wi.

28Ka vləgagha vla Lazglafta ta wuninik daga ta luwa,

nda skwa gadghəl ta gənək,

alkama nda ima inabi tani ka haslay.

29Ka nza mndəra mnduha kavghakavgha ka kwalvaha gha.

Ka tsəlɓa mnduha ta haɗikha kavghakavgha ta tsəlɓu ta kəma gha.

Ka nza ka ka mgham ta ghəŋa zwana ma gha.

Ka tsəlɓa zwana ma gha ta tsəlɓu ta kəma gha.

Ka nza mndu ta ksiʼa kagha ka mndu nda ksiʼa,

ka nza mndu ta tfaghaghatá wi ka mndu nda tfa wi ta ghəŋa ni, » kaʼa.

30Manda kɗakwa Izak ta tfanaghatá wi ta Yakubu, ka saghu Yakubu da tsi. Nda fərtagapta ni da da ni, nda vrakta zwaŋama ni Ghesav ta raya. 31Ka datá tsi ta skwa zay zɗa ghwenzeɓesl, ka klədanamtá tsi ta da ni. Kaʼa nda da ni mantsa: « Sliʼaf sliʼa da, ka zaka ta sluʼa nimtak klaghak yu, ŋa tfaɗighata gha ta wi, » kaʼa. 32« Wa kagha na? » ka Izak. « Iʼi Ghesav, zumala gha ya, » kaʼa. 33Ka ghudzavaftá Izak katakata, kaʼa mantsa: « Wa tsa mndu ta rayaktá sluʼa nimtak, ka klaɗiktá tsi ya na? Ka za zaʼatá yu ta kul sagha kagha, ka tfanaghatá yu ta wi. Nda nza tsa tfa wi ya ta ghəŋa ni, » kaʼa.

34Na tsa snaŋta Ghesav ta tsa gwaɗa da ni ya, ka wahu tsi ta wahu katakata, wahu nda gurɗatá ŋuɗuf. Kaʼa nda da ni mantsa: « Tfaɗigha tfa ta wi ta iʼi guli da, » kaʼa. 35Ka Izak mantsa: « Sagha sa zwaŋama gha gataghutá tfa wa gha, » kaʼa. 36Ka Ghesav mantsa: « Tsa vəl tsanaftá hga ni ka Yakubu#27:36 Yakubu nda gwaɗa Hebru ná, tsaya nana mndu. ya rki kəl tsi, mahisa kləguduɗta ni ta skwa ɗa na na? Tiŋəl má mali mala ɗa klaghu tsi. Ndanana guli ná, ka kləguduɗta ni ta tfa wa ɗa! Ta haɗ pɗakwa tfa wi ŋa ɗa ra? » kaʼa. 37Ka Izak zlghanaftá Ghesav mantsa: « Wana ndanana ná, fa fa yu ka mgham ta ghəŋa gha, ka kwalvaha ni pghanata yu ta inda zwana ma ni. Vlaŋ vla yu ta alkama nda ima inabi. Nu dzaʼa lavəgliŋta yu ta magəgəlta ŋa gha tama sagəŋ? » kaʼa. 38Ka Ghesav ɗawuglaŋta da da ni mantsa: « Turtuktuk yeya tfa wi da kagha ri da? Tfaɗigha tfa ta wi ta iʼi guli da! » kaʼa, ka kapəglaŋtá tsi ta lwi ka taw. 39Ka da ni Izak nda tsi mantsa:

« Dzaʼa nzakway ka diʼiŋ nda gənək,

diʼiŋ guli nda wuninik daga ta luwa.

40Nda kafaya gha dzaʼa mutsaka ta skwi ŋa nzakwa gha nda hafu.

Dzaʼa nzakway ka ka kwalva zwaŋama gha.

Ama ma ray dzaʼa rə ka ta vliha,

dzaʼa ɓliŋ ɓla ka ta tsa zuk faghagha tsi ya, » kaʼa.

41Ka husaŋtá Yakubu ta Ghesav ta ghəŋa tsa vəl klaghuta ni ta tfa wi da da taŋ ya. Ka Ghesav ma ghəŋa ni mantsa: « Taghwaŋ a fitika mtakwa da ɗa wa. Tahula tsa, dzaʼa dza dza yu ta zwaŋama ɗa Yakubu, » kaʼa. 42Ka snanamtá lu ta Rebeka ta skwi ta gwaɗ Ghesav, zumala ni. Ka ghunaftá Rebeka ta mndu da hgaktá Yakubu zwaŋa ni ka sagəŋ. Kaʼa nda tsi mantsa: « Wya zwaŋama gha Ghesav ta kuma plaghamtá skwi ya maga ka, nda ndana dzatá kagha. 43Ndanana sagəŋ, sna ta skwi ta mnaghata yu. Sliʼaf sliʼa ka hwayaghata ka da Lavaŋ zwaŋama ɗa ma Haraŋ. 44Ka dzaʼa ka nzəɗavatá hada, ka lɓadata ŋuɗufa zwaŋama gha karaku. 45Lɓadata ŋuɗufa zwaŋama gha, zanap za ta skwi ya magana ka ya, zanap za ta skwi ya magana ka ya, dzaʼa ghunadap ghuna yu ta mndu da klaktá kagha hada. Va a yu ta zwaɗguduɗta ghuni his his ta fitika turtuk wa, » kaʼa.

46Ka Rebeka nda Izak mantsa: « Nda bagha yu da nzaku nda na kwagha la Het na. Ka lagha Yakubu ka kləglaftá makwa na haɗik na katsi ná, draŋ ya mtu yu, » kaʼa.

Currently Selected:

Zlr 27: xed

Highlight

Copy