Sab 7

1Ka Yawe nda Musa mantsa: « Fa fa ta sləməŋ. Manda Lazglafta fata yu ta kagha ta kəma Firʼawna. Zwaŋama gha Haruna ya guli ná, manda anaba gha tsatsi. 2Kagha dzaʼa mna inda skwiha dzaʼa mnaghafta yu, ŋa vray zwaŋama gha Haruna ta tsa gwaɗa ya ŋa Firʼawna, ŋa mbəl zliŋta ni ta la Israʼila ma haɗika ni. 3Ama iʼi, dzaʼa təŋanaf təŋa yu ta ghəŋa Firʼawna. Dzaʼa yanaf ya yu ta mazəmzəmha ɗa nda mandərmimiha ɗa ma haɗika Masar. 4Haɗ Firʼawna dzaʼa snaghunata wu. Mantsa ya dzaʼa kəl yu ka faftá dzvu ta Masar. Dzaʼa hlagap hla yu ka ghuɓa gwal vulu ka ghuɓa gwal vulu ta mnduha ɗa la Israʼila ma haɗika Masar, nda glakwa slna guma ɗa. 5Dzaʼa snaŋ sna la Masar kazlay iʼi Yawe kəʼa, faf fər yu nda mbrakwa dzva ɗa ta la Masar, ka hlagaptá la Israʼila mataba taŋ, » kaʼa. 6Ka magatá i Musa nda Haruna ta skwi manda va ya mnanaf Yawe ta həŋ. Ka magatá həŋ manda va tsa. 7Tghas mbsak ima Musa, tghas mbsak hkən mida ŋa Haruna ta lagha həŋ da gwaɗganatá Firʼawna.

Kwalaghuta Firʼawna ta snatá gwaɗa i Musa nda Haruna

8Ka Yawe nda i Musa nda Haruna mantsa: 9« Ka ka Firʼawna nda kaghuni: “Marihawa mara ta mazəmzəm” kaʼa, ka ka dzaʼazlay nda Haruna na: “Klaf kla ta dafa gha ka vzadata ka ta haɗik ta kəma Firʼawna,” ka ka dzaʼazlay. Dzaʼa nuna tsa dafa ya ka nahaɗik, » kaʼa. 10Ka sliʼaftá i Musa nda Haruna ka lagha slanaghatá Firʼawna, ka magatá həŋ ta skwi manda va ya mnanaf Yawe ta həŋ. Ka vzadatá Haruna ta dafa ni ta kəma Firʼawna nda kwalvaha ni tani, ka nutá tsa dafa ya ka nahaɗik. 11Ka hagaktá Firʼawna ta gwal nda ɗifil ma ghəŋa taŋ nda ɗəghaha tani. Tsa ɗəghaha ma Masar ya, ka magatá hahəŋ guli ta ŋa taŋ manda va tsaya nda má ɗəgha ɗəgha taŋ. 12Inda taŋ ta vazadatá dafa taŋ ta haɗik, ka nanavaftá tsa dafaha ya ka nahaɗik, ama ka ndandutá tsa dafa Haruna ya ta tsa dafaha taŋ ya demdem. 13Kulam nda tsa, ta təŋ təŋa ni ghəŋa Firʼawna, ka kwalaghutá tsi ta snatá gwaɗa i Musa nda Haruna, manda ya mna Yawe.

Mbəɗanaftá imi ka us

14Ka Yawe nda Musa mantsa: « Təŋanaf təŋa Firʼawna ta ghəŋa ni, kwalglaghu kwala ta zliŋtá la Israʼila. 15La ka dzaʼa ka da slanaghatá Firʼawna ga sərɗək ta laha tsi ta wa ghwa, ka lagha ka da guyaku nda tsi hada. Ka klafta ka ta tsa dafa ta navafta ka nahaɗik ya kay ma dzvu. 16Ka ka dzaʼazlay nda tsi mantsa: “Yawe, Lazglafta la Hebru, ta ghunaktá iʼi da kagha. Kaʼa na: Zliŋ zla ta mnduha ɗa ka dzaʼa həŋ da tsəlɓu ŋa ɗa ma mtak,” kaʼa, ama ha gita ka kwalahutá ka ta snata. 17Ka Yawe na: “Dzaʼa nda sna ka kazlay iʼi Yawe kəʼa.” Wana yu dzaʼa dzuŋta nda na dafa ma dzva ɗa na ta imi ma ghwa na, ŋa navafta ni ka us. 18Dzaʼa rwu rwa klipi ma ghwa, ŋa ziʼuta imi ma ghwa, lavgliŋta a la Masar ta səgəltá imi ma tsa ghwa ya wa, » kaʼa.

19Ka Yawe nda Musa mantsa: « Mnana mna ta Haruna ka klafta tsi ta dafa ni, ka fadapta tsi ta dzva ni nda təvu inda imi ma Masar, ŋa nuta inda imiha taŋ ka us, nda zalaha tani, nda ghwaha tani, nda drəfha tani. Dzaʼa nzakway us ma inda vli ta haɗika Masar, kulam ma wudaha ka udzu, nda ya huhrap lu ma pala tani, » kaʼa. 20Ka magatá i Musa nda Haruna ta skwi ya mnanaf Yawe ta həŋ. Ka kapaftá tsi ta dafa ni ka dzuŋtá imi ma ghwa ta nghay i Firʼawna nda kwalvaha ni tani. Ka mbəɗavaftá inda imi ma ghwa, ka us. 21Ka rwutá klipiha ma ghwa, ka ziʼutá ghwa, lavgliŋ a la Masar ta sa imi ma ghwa wu. Ka us inda vli ta haɗika Masar. 22Ka magatá ɗəghaha la Masar ta ŋa taŋ manda va tsaya guli nda má ɗəgha ɗəgha taŋ. Nduk nda tsa, ta təŋ təŋa ni ghəŋa Firʼawna. Ka kwalaghutá tsi ta snatá gwaɗa i Musa nda Haruna, manda ya mna Yawe. 23Ka mbəɗavatá Firʼawna, ka laghu dzagha ni. Kulaf a ta tsa skwi ya wa. 24Ka lalə inda la Masar ta vli ta wa ghwa ŋa mutsa imi ŋa say, kabga laviŋ a həŋ ta sa tsa imi ma ghwa ya wa.

25Səɗ səɗ ndəfáŋ ka fitik luta manda dzuŋta Yawe ta tsa ghwa ya.

Yuta kləŋha ma Masar

26Tahula tsa ka Yawe nda Musa mantsa: « La slanaghatá Firʼawna, ka mnanata ka: “Ka Yawe na: Zliŋ zla ta mnduha ɗa ka dzaʼa həŋ da tsəlɓu ŋa ɗa#7:26 Ma sanlaha ma defteri ná, 7:26-29 tsaya sura 8:1-4.. 27Ka kwalaghu kwala ka ta zliŋtá həŋ katsi, dzaʼa ndaghanaf ndagha yu ta inda vli ta haɗika gha nda kləŋha. 28Dzaʼa ndəghaf ndəgha ghwa nda kləŋ. Dzaʼa sliʼagafta taŋ, ka sliʼamta da həga gha, nda ya da dzuguvi ma vla hana gha, nda ya ta ghəzləŋa gha. Dzaʼa sliʼam sliʼa həŋ da həga kwalvaha gha, nda həga mnduha gha, nduk da uvunha gha, nda sigaha ga ghuni tani. 29Dzaʼa vavaladafta tsa kləŋha ya ta vərɗa vgha gha, nduk ta mnduha gha, nda ya ta inda kwalvaha gha,” » kaʼa.

Currently Selected:

Sab 7: xed

Highlight

Copy