Dan 12

Sliʼagapta ma mtaku

1« Ma tsa fitik ya, dzaʼa zlagapta Mikaʼel mali dagala ta katá mnduha gha. Dzaʼa nzakway tsa fitik ya ka mghama fitika sa duni. Daga ka yawu nzakwa mndəra mndu ha ka lagha ta tsa fitik ya, haɗ skwi ta kəɗ maguta manda tsaya wa. Ama ma tsa fitik ya dzaʼa ndapta mnduha gha nda vinda hga taŋ ma ɗelewer. 2Nda ndəgha gwal ta hani ma gəninika haɗik dzaʼa sliʼagapta, ŋa nzakway nda hafu ŋa kɗekedzeŋ ŋa sanlaha, ŋa nzakway ma hula, nda zləmnda ŋa kɗekedzeŋ ŋa sanlaha guli. 3Gwal nda mahizl ma ghəŋa taŋ ya, dzaʼa wuɗaku hahəŋ manda wuɗakwa ghuvaŋata luwa. Gwal ta taghanaftá nzaku tɗukwa ta ndəghata mnduha ya guli, dzaʼa wuɗaku hahəŋ manda tekwatsa ŋa kɗekedzeŋ, haɗ kɗavakta ni wa.

4Kagha Danyel, ka ŋamta ka ta na gwaɗa na ma ghəŋa gha, ka ŋərzlanata ka ta na ɗelewer na ha ka sagha tsa kɗavakta fitik ya. Dzaʼa nda ndəgha gwal dzaʼa hwahwayaku lab nda ya, lab nda ya, ka zba sgavaghata ma snaŋtá skwi#Gha 8:12., » kaʼa.

5Iʼi Danyel, tata nghay nghay yu, gi ka zlagaptá sana mnduha his ta sladu ta wa zala, pal təv ya pal təv ya. 6Ka sani ma həŋ nda tsa mndu ta suɗavatá lguta liŋ ta sladu nda ta ghəŋa zala ya mantsa: « Yawu dzaʼa kɗavakta na mandərmimiha na na? » kaʼa. 7Ka kapaftá tsa mndu ta suɗavatá lguta liŋ ta sladu nda ta ghəŋa zala ya ta dzvuha ni nda ta luwa, ka snaŋta yu ta mnata ni: « Ta waɗa waɗa yu nda hga Lazglafta ta nzakw ŋa kɗekedzeŋ. Tsa skwiha dzaʼa magaku ya ná, dzaʼa nzəɗava nzəɗa ka vaku hkən nda maŋəzlawats. Inda tsa skwiha ya ná, baɗ kɗatá mbrakwa mnduha nda ghuɓa ɗekɗek, dzaʼa hɗamta həŋ, » kaʼa.

8Iʼi Danyel, nda sna yu ta tsa gwaɗa ya mndani, ama sna a yu ta klatá ghəŋa ni wa. Ka yu mantsa: « Rvera ɗa, kinawu kɗavakta nana skwiha na? » ka yu. 9Kaʼa nda iʼi mantsa: « La, kabga dzaʼa nda ɗifa na gwaɗa na, nda ŋərzla ha ka sagha kɗavakta tsa fitik ya. 10Nda ndəgha mnduha dzaʼa ghuɓiŋta nzakwa taŋ, ka ɓanafta, ka sluwapta, ama dzaʼa gɗava gɗa ghwaɗaka mnduha ma maga ghwaɗaka skwiha taŋ. Haɗ ghwaɗaka mndu dər turtuk dzaʼa laviŋta snaŋtá tsa skwiha ya wu, ama dzaʼa nda sna gwal nda mahizl ma ghəŋa taŋ.

11Daga ta tsa fitik dzaʼa kwal mnduha pləgəltá ghəŋ inda fitik ŋa Lazglafta, ka fatá ghwaɗaka manzakɗaway ta ga mbiɗa ya ná, dzaʼa lula fitik dəmbuʼ nda his dərmək nda təmbay mbsak (1.290). 12Rfu da gwal dzaʼa ŋavata ka ɓhadapta ha ta tsa fitik dəmbuʼ nda hkən dərmək nda hkən mbsak hutaf mida (1.335) ya. 13Kagha Danyel, ŋava ŋa ha ka sagha kɗavakta ŋa gha. Dzaʼa mutsay ka ta mbiʼa vgha. Dzaʼa sliʼagap sliʼa ka da tsuʼa nisəla gha ma kɗavakta fitik, » kaʼa.

Currently Selected:

Dan 12: xed

Highlight

Copy