Slg 3

Mbanaftá sana mndu nda raghwa səla ni

1Ma sana fitik, ka sliʼaftá i *Piyer nda Yuhwana ka dzaʼa da həga Lazglafta da maga duʼa ta nzemndi hkən ta fitik hawu. 2Ndusa nda wa tgha tsa həga Lazglafta ta hgə lu ka « wa tgha ɗina » ya, mamu sana mndu nda raghwa daga yagata, ta nzaku hada. Inda fitik lu ta tsukwadaghata ka nzanata hada, ŋa gatá skwi da gwal ta lami da tsa həga Lazglafta ya. 3Ka nghaŋta tsi ta i Piyer nda Yuhwana ta lami da tsa həga ya. Ka gatə tsi ta skwi da həŋ. 4« Ngha ta aŋni! » Ka i Piyer nda Yuhwana pghafta iri tida. 5Ka nzatá tsi ka ngha həŋ, dzaʼa mutsay yu kasiʼi ta skwi da həŋ, kaʼa ma ghəŋa ni. 6Ka Piyer nda tsi mantsa: « Dər tsedi, dər dasu, haɗ da iʼi wa. Skwi ta nzakway da iʼi ná, tsaya dzaʼa vlaghata yu. Nda hga *Yesu *Kristi mnda la Nazaret, sliʼaf sliʼa gha, ka mbaɗa ka ta mbaɗa! » 7Kaʼa ka ksafta ta dzva zeghwi, ka sliʼanafta. Gi hada hada, mutsafta səla tsa mndu ya tsa ta mbraku. 8Gi vɗuk, sliʼafta ni tsa ka sladata. Ka mbaɗ tsi ta mbaɗa. Ka lam həŋ kawadaga da həga Lazglafta, ka dzaʼa tsatsi nda vavalaku, nda zləzlva Lazglafta. 9Inda mndu ná, nda ngha ta mbaɗay ni ta mbaɗa, ka dzaʼa nda zləzlva Lazglafta. 10Tsəmafta taŋ kazlay: Tsa mndu ta gɗata ta nzaku ka gatá skwi tawa tsa wa tgha həga Lazglafta ta nzakway ɗina yeya kəʼa, ka hluta zləŋ ta həŋ, ka ndərmim həŋ nda ndərmima ta skwi ta slata nda tsa mndu ya.

Piyer ta mna gwaɗa ma həga Lazglafta

11Tsaw tsa mndu mbanaf lu ya ná, lavaghu a tsatsi ta vata i *Piyer nda Yuhwana wa. Ka gazladaghata inda mnduha wanafta həŋ ma rmak, ta hgə lu ka « Rmaka Salumuŋ. » Ka ndərmim həŋ nda ndərmima demdem. 12Na nghay Piyer ta tsaya, kaʼa nda tsa mnduha ta tskadaghatá vgha ya mantsa: « Ariwa la Israʼila, kabgawu ta kəl kuni ka ndərmima mbatá na mndu na manda na na? Kabgawu ta kəl kuni ka vuʼa aŋni, manda skwi aŋni ta mbanaftá na mndu na nda mbrakwa ŋni? Ndiʼa ta vgha ŋni nda Lazglafta ta mbanaftá na mndu na ra? 13Tsaya a wa. Lazglafta i Abraham, nda Izak, nda Yakubu, nda dzidzíha mu ta maraŋta glakwa vuʼa ni *Yesu *Kristi, ya klaf kaghuni ka ghəŋa ghuni ka mblanaftá gwal dagala dagala yeya ma mnay Pilat kazlay: Zliŋwa na mndu na kəʼa ya. 14Kaghuni, vziŋ vza kuni ta mndu ya nda ghuɓa, mndu ya tɗukwa, ka laghu kuni ɗawaftá zlighunista mndu ya ta pslatá mnduha. 15Ka dzatá kuni ta mndu ya nda hafu da tsi. Tahula dzata ghuni, ka sliʼaganaptá Lazglafta mataba gwal nda rwa. Ma tsa sliʼagapta sliʼagap tsi ya ná, nda nza aŋni ka masləmtsəka ni. 16Ma fatá ghəŋa ŋni ta Yesu, kəl mbrakwa tsa Yesu ya ka sliʼanaftá na mndu ta nghə kuni snaŋ kuni ta sladu na. Mantsa, ma fatá ghəŋ ta Yesu kəl na mndu na ka mutsafta mbaku guzlindiliŋ, manda ya ta nghə kuni demdem ya.

17« Tsaw tama zwana ma, tsa skwi magana kaghuni ta Yesu kawadaga nda gwal dagala dagala ya ná, nda kwala ghuni kul snaŋta magata kuni. 18Mantsa ya dzanaghata Lazglafta ta ghəŋa skwi ya mna tsi manda ghalya nda ma wa inda la anabi kazlay: Dzaʼa ghuyay Kristi ta ɗaŋwa kəʼa. 19Mbəɗanafwa nzakwa ghuni, ka mbəɗavata kuni təv Lazglafta, ka plighunista tsi ta dmakwa ghuni. 20Mantsa ya dzaʼa kəl Lazglafta ka vlaghunatá fitika hlaptá hafu, ŋa ghunəgaghunatani ta Yesu, ta nzakway ka Kristi zbaghunap tsi daga manda ghalya ya. 21Ndanana karaku, nda ra nzaghuta Yesu Kristi ta luwa ka kəzla mbəɗavafta inda skwi manda ya ghada Lazglafta ta mnata daga manda ghalya nda ma wa la anabi nda ghuɓa. 22Ka Musa na: “Dzaʼa klagap kla Lazglafta ghuni ta anabi manda iʼi, mataba la ghuni, ŋa snay ghuni ta inda skwi dzaʼa tsi mnaghunata. 23Inda mndu dzaʼa kwal kul sna gwaɗa tsa anabi ya, dzaʼa ghəzlap ghəzla lu mataba mnduha Lazglafta, dzaʼa dza dza lu#3:23 Ngha ta Vrafta ta Zlahu 18:15, 18-19. guli,” kaʼa. 24Kahwathwata ná, mnaŋna mna inda la anabi, zlrafta ni ta Samuyel, ha ka sabi ta sanlaha ta zlagapta tahula tsatsi, ta gwaɗa ta na fitika amu gitana na. 25Ka ŋa ghuni taghunafta Lazglafta ta imi ta sləməŋ nda ma wa la anabi. Ka ŋa ghuni dzrafta Lazglafta ta wi nda dzidza mu Abraham kazlay: Dzaʼa tfanagha tfa yu ta wi ta inda mndəra mnduha nda ma zivira gha#3:25 Ngha ta Zlrafta 22:18, 26:4. kəʼa ya. 26Tsaya kəl Lazglafta ka maraghunaŋtá kaghuni ta kwalva ni karaku, ma ghunagaghata ni da kaghuni ŋa tfaghunaghata wi, ka mbəɗaghunafta ŋa zlaŋtá ghwaɗaka skwi ta mag kuni, » ka Piyer.

Currently Selected:

Slg 3: xed

Highlight

Copy