Slg 23

Pwal ta kəma ŋumna Festus

1Ka vazlanamtá Pwal ta iri ta gwal tsa guma. Kaʼa mantsa: « Zwana ma ɗa, haɗ sana skwi dəmanaf yu ta Lazglafta ha gita wa. Haɗ sana skwi guli ŋa tsaɗivata wu, » kaʼa. 2« Dzuŋwa dza ta wubisim, » ka mali ta ghəŋa gwal dra skwi ŋa Lazglafta ta nzakway ka Hananiya ya, nda gwal ndusa nda Pwal. 3« Dzaʼa dzay Lazglafta ta kagha ghwaɗaka vata həga ɓap lu nda ɓa#23:3 Ngha ta Mata 23:27. na. Nza ŋa tsa guma ta ghəŋa iʼi manda ya ta mnə zlahu kagha, ama ka zluŋtá ka ta zlahu, ka laghu da mnay kazlay: Dzuŋwa dza kəʼa, » ka Pwal nda tsi. 4« Waká ka ta raza mali ta ghəŋa gwal dra skwi ta nzakway ka mnda Lazglafta na? » ka tsa gwal ndusa nda tsi ya. 5« Sna a yu kazlay: Mali ta ghəŋa gwal dra skwi ŋa Lazglafta ya kəʼa zwana ma wu, kabga nda vinda guli kazlay: Haɗ ka dzaʼa raza mgham ta ghəŋa mnduha gha wu#23:5 Ngha ta Sabi 22:27. kəʼa, » ka Pwal.

6Tsaw nda sna kazlay: Nana gwal tsa guma na ná, laɓata ni nda la *Sadukiya, nda la *Farisa ya kəʼa, kəl tsi ka gwaɗata nda lwi dagala dagala. Kaʼa mantsa: « Zwana ma ɗa, iʼi ná, mnda la Farisa iʼi, zwaŋa mnda la Farisa yu guli. Ta ghəŋa fafta ɗa ta ghəŋa ɗa, nda ya ta ghəŋa sliʼagapta dzaʼa sliʼagapta gwal nda rwa ma mtaku, ta kəl lu ka tsa guma ta ghəŋ iʼi, » ka Pwal. 7Na tsa mnata ni ta tsaya, ka zlraftá zlərɗutawi mataba la Farisa nda la Sadukiya. Ka dgavaptá tsa tskata vgha ya his. 8Haɗ gwal nda rwa dzaʼa walaŋta sliʼagapta wu, haɗ duhwalha Lazglafta wu, haɗ Sulkum guli wu, ka la Sadukiya nda ŋa taŋ. Mamu tsaha ya demdem, ka la Farisa nda ŋa taŋ. 9Ka sliʼaftá inda mnduha nda gugɗaku. Ka sliʼavata sanlaha mataba gwal ta tagha zlahu ŋa mnduha ta nzakway mataba la Farisa gwaɗata nda lwi dagala dagala: « Mutsaf a aŋni ta sana ghwaɗaka skwi maga na mndu na wa. Ka sana Sulkum tsi, ka sana duhwala Lazglafta tsi, ka ki tsi ta gwaɗganata, » ka həŋ. 10Ka sgavaghata zlərɗuta wi katakata. Duŋwa həŋ da ɗatsanaptá Pwal na! ka mghama sludzi zləŋaftá zləŋ kəl tsi ka ghunaftá la sludzi ŋa klaptá Pwal mataba taŋ, ka klaghata da həga la sludzi. 11Girviɗikani, ka Mgham *Yesu maravata da Pwal mantsa: « Tatá us ta iri! Manda va tsa ga masləmtsək gə ka ta ghəŋa iʼi ma luwa Ursalima ya ná, manda va tsaya guli dzaʼa ga ka ta tsa masləmtsək ya ma luwa Ruma, » kaʼa nda tsi.

Dzra wi ta ghəŋa Pwal

12Ga mahtsima ni, ka dzraftá sanlaha ma la *Yahuda ta wi ŋa dzaʼa dzatá Pwal. Ka waɗatá həŋ ka mnay kazlay: Haɗ mu dzaʼa zaŋtá skwi nda za, nda saŋtá skwi nda sa, ka ta dza a mu ta Pwal wu, ka həŋ. 13Ta malay gwal ta dzraftá tsa wi ya ta fwaɗ mbsak. 14Ka sliʼaftá həŋ ka laghu da slanaghatá la mali ta ghəŋa gwal dra skwi ŋa Lazglafta, nda la galata mndu. Ka həŋ mantsa: « Waɗa waɗa ŋni kahwathwata ta kəma Lazglafta kazlay: Haɗ ŋni dzaʼa walaŋta zaŋtá skwi nda za, ka ta dza a ŋni ta Pwal wu. 15Ndanana tama, gwafwagwa kaghuni ta wi nda gwal ta tsa guma. Ta kumay ŋni ta ɗagapta hya ma na gwaɗa na kahwathwata, ka kuni dazlay nda mghama sludzi ya ná, ŋa klaghunakta lu ta Pwal ta kəma ghuni. Ta sagha tsi ya, nda paya vgha aŋni ŋa gi dzata, » ka həŋ.

16Snaŋta zwaŋa makuma ni ma Pwal ta tsa pghanatá buɗukwa dzaʼa pghanata lu ta Pwal ya, ka sliʼaftá tsi ka laghu mnanatá Pwal ma həga la sludzi. 17Ka hgaftá Pwal ta sana mali ma la sludzi. « Kla ta na duhwal na da mghama la sludzi, ya mamu gwaɗa dzaʼa mnanata tsi, » kaʼa nda tsi.

18Ka klaftá tsa mali ta ghəŋa la sludzi ya ta tsa duhwal ya, ka klaghata da tsa mghama la sludzi ya. Kaʼa mantsa: « Tsa Pwal tsam lu ma gamak ya ta hgaftá iʼi. Kdəkkdək, kla ta na duhwal na da tsi, mamu gwaɗa dzaʼa tsi mnanata, kaʼa nda iʼi, kəl yu ka klakta, » kaʼa nda tsi. 19Ka ksaftá tsa mghama sludzi ya ta tsa duhwal ya ta dzvu, ka laghwi ta slərpa vli. « Nu ta kum ka ta mnihata na? » kaʼa nda tsi. 20Kaʼa nda tsi mantsa: « Dzraf dzra sanlaha ma la Yahuda ta sagha da ndəɓaghatá dzvu, ŋa kladaghatá Pwal ta kəma gwal ta tsa guma mahtsim. Ta kumay ŋni ta ɗagapta hya ma tsa gwaɗa ya kahwathwata ka həŋ dzaʼazlay nda kagha. Tsaw mantsa ya nzakwa ni wa. 21Yaha ka da snanatá həŋ. Ya mamu gwal ta malay ta fwaɗ mbsak dzaʼa pghatá buɗukwa. Waɗa nda waɗa həŋ kazlay: Haɗ ŋni dzaʼa walaŋta zaŋtá skwi nda za, haɗ ŋni dzaʼa saŋtá skwi nda sa, ka ta dza a ŋni ta Pwal wu kəʼa. Ndanana, nda paya vgha taŋ, ya gwaɗa da kagha kweŋkweŋ ta kzlə həŋ, » kaʼa nda tsi. 22Ka tsa mghama sludzi ya mantsa: « Nana gwaɗa mniɗiŋ ka na ná, yaha ka walaŋta mnanaŋta sana mndu, » kaʼa, ka ghuniŋtá tsa duhwal ya.

Ghunaftá Pwal da ŋumna Feliks

23Tahula tsa, ka hagaftá mghama la sludzi ta maliha his ta ghəŋa sludziha. Kaʼa nda həŋ mantsa: « Hbawa vgha, dzaʼa nda sliʼa kuni da luwa Sezare ta nzemndi təmbay girviɗik, kawadaga nda sludziha his dərmək, nda sludziha ndəfáŋ mbsak ta ŋla plis, nda sludziha his dərmək nda huzla vulu da həŋ. 24Mutsaf kuni guli ta plis ŋa kla Pwal, ŋa ɓhadanaghata ɗughwana da ŋumna ta nzakway ka Feliks, » kaʼa. 25Wya ka tsa mghama sludzi ya vindanaftá ɗelewer guli:

26« Iʼi Klawdi Lisiyas, ta ga zgu ŋa mghama ni ŋumna ta nzakway ka Feliks. 27Ya mndu ta ghunədaghapta yu ya ná, la *Yahuda ta ksafta ka dzaʼa dzata. Ka lagha yu nda la sludza ɗa ka zluʼagapta ma dzva taŋ snaŋər yu kazlay: Mnda la Ruma ya kəʼa. 28Ŋa zba snaŋtá ghəŋa skwi ya kəl həŋ ka razay ná, ka kladaghatá yu ta kəma gwal ta tsanatá guma ta həŋ. 29Ka slanaghatá yu ná, ta razu ta ghəŋ skwi ta ksaŋtá zlaha taŋ həŋ. Ama haɗ skwi ga tsi prək ka dzata, dər prək ka hbamta ma gamak wa. 30Ka sagha lu snaɗimta kazlay: Ta pgha buɗukwa həŋ ŋa ni kəʼa, kəl yu ka ghunədaghapta tsa mndu ya ŋa lagha hahəŋ ka ghəŋa taŋ da mna dmakuha ya maga tsa mndu ya ta kəma gha. Ləŋləŋ ká ka nzata mghama ɗa, » kaʼa.

31Ka klaftá tsa la sludzi ya ta Pwal girviɗik manda va ya mnanaf lu ta həŋ, ka klaghata da luwa Aŋtipatris. 32Ga mahtsima ni, ka vragaghutá hamata la sludzi da vla nzakwa taŋ, ka kəɗ gwal nda plis nda plis ta kla Pwal da luwa Kaysariya. 33Ɓhadaghata tsa la sludziha ta plis ya da luwa Sezare, ka klaftá həŋ ta tsa ɗelewer ya ka vlaŋtá ŋumna, zlanaŋha həŋ guli ta Pwal ma dzva ni. 34Tahula dzaŋaftá ŋumna ta tsa ɗelewer ya, kaʼa mantsa: « Ta wati haɗik kagha na? » kaʼa ɗawaŋta da Pwal. Snaŋta ni kazlay: Mnda haɗika Silisi ya kəʼa, 35« ŋa sna yu ta gwaɗa gha saghər tsa mnduha ta raza kagha ya, » kaʼa nda tsi. Klaghawa kla, ka dzaʼa kuni da nghay ma tsa həga baf Hiridus ya, ka tsa ŋumna ya nda mnduha.

Currently Selected:

Slg 23: xed

Highlight

Copy