Slg 18

Pwal ma luwa la Kwareŋt

1Tahula tsa, ka sliʼaftá Pwal ma luwa Atina, ka laghu da luwa Kwareŋt. 2Hada, ka guyatá tsi nda sana mnda la *Yahuda ta hgu lu ka Akilas, ya lu ta haɗika Puŋ. Sliʼafta ni yeya ta haɗika Italiya kawadaga nda markwa taŋ Priskila, kabga ka sliʼap sliʼa inda la Yahuda ta haɗika Ruma ka mgham Klawdi mnata. Ka guyaftá Pwal ta vgha nda həŋ. 3Ka skwa turtuk slna ta mag həŋ. *Həga tumpul ta ɗaɗah həŋ. Tsaya kəl Pwal ka gwaftá vgha nda həŋ. 4Inda fitika *Sabat Pwal ta zlərɗa gwaɗa ma həga tagha skwa la Yahuda, nda la Yahuda nda ya nda la *Grek, kabga ta kumay ta tɗaktá həŋ ŋa zlghaftá gwaɗa Lazglafta.

5Manda zlaŋta i Silas nda Timute ta haɗika Mekaduniya, ka lagha slanaghatá Pwal, ka vzatá Pwal ta ghəŋa ni ka mna gwaɗa. Ka paslə tsi ŋa la Yahuda kazlay: *Yesu ná, *Kristi ya kəʼa. 6Ka gruŋtá la Yahuda ka rarazay. Mbaɗa Pwal ka tukwanatá rgitika lguta ni ta həŋ. Kaʼa nda həŋ mantsa: « Ta ghəŋa ghuni ka skwa ghuni, daga ndana nda sliʼa yu təv gwal kul nzakway ka la Yahuda, » kaʼa. 7Ka sliʼaftá tsi hada ka lagha da sana mndu, Tirtiyus Yustus hga ni. Ta zləŋay tsa mndu ya ta Lazglafta. Ta vata həga tagha skwa la Yahuda həga taŋ. 8Ka zlghaftá Krispus ta nzakway ka mgham ta ghəŋa həga tagha skwa la Yahuda ta Mgham Yesu, mantsa ya la ga taŋ guli. Nda ndəgha gwal ma Kwareŋt guli ta snaŋtá gwaɗa Pwal, ka zlghaftá həŋ, ka maganaftá lu ta batem ta həŋ.

9Ta sana rviɗik, ka gwaɗganatá Lazglafta ta Pwal nda ma suni. Kaʼa mantsa: « Yaha zləŋ da ksaftá kagha da haftá ka ta wi Pwal, kɗaŋ gwaɗay. 10Kawadaga yu nda kagha, haɗ mndu dzaʼa walaŋta faftá dzvu ta kagha ŋa ghuya ɗaŋwa ŋa gha wa. Nda ndəgha mnduha ɗa ta ma na luwa na, » kaʼa. 11Ka zata pwal ta vaku nda tili mkuʼ ma tsa luwa ya, ta taghanaftá mnduha ta gwaɗa Lazglafta.

12Ma fitika nzakwa Galiyuna ka ŋumna ta haɗika Akaya tama, ka gwaftá la Yahuda ta wi ka gruŋtá Pwal. Ka kladaptá həŋ da vla tsa guma. 13Ka həŋ mantsa: « Nana mndu na ta bara mnduha ŋa tsəlɓu ta kəma Lazglafta, ka zluŋtá skwi mna zlahu, » ka həŋ. 14Ta dzaʼa dzaʼa Pwal da gwaɗa mantsa, ama ka gi tsuʼaftá Galiyuna ta gwaɗa nda la Yahuda. Kaʼa mantsa: « Ka haɗ mndu dza lu wu katsi, haɗ sana dmaku ta bluta wu katsi, haɗ yu ta snaghunata, a la Yahuda wa. 15Ka si ta ghəŋa zwana gwaɗaha, nda ya ta ghəŋa hgu, nda ya ta ghəŋa zlaha ghuni ta zlərɗa kuni ya, dzik nda kaghuni tsa. Va a yu ta tsa guma ta ghəŋa tsa skwiha ya wu, » kaʼa. 16Ka ghəzlaftá tsi ta həŋ ma vla tsa guma. 17Ka gwaftá həŋ ta wi ta Sustene, ta nzakway ka mgham ta ghəŋa tsa həga tagha skwa la Yahuda ya, ka ksafta, ka ɗgapta ta wa tsa vla tsa guma ya, gvalaŋ a Galiyuna wa.

Vraghata Pwal da luwa Aŋtakiya

18Ka nzɗəglavatá Pwal tsəɓakw fitik ma Kwareŋt. Tahula tsa, ka sliʼaftá tsi kawadaga nda i Priskila nda Akilas, ka zlaŋtá zwana ma, ka lami da kwambalu, ka laghwi ta haɗika Siri. Makəɗ tsi ka lami da kwambalu, ka htsatá tsi ta ghəŋa ni ma luwa Saŋkre, si waɗana tsi ta Lazglafta. 19Ka ɓhadaghatá həŋ da luwa Afisus, ka zlanatá Pwal ta i Priskila nda Akilas. Ka sliʼaftá tsi ka lami da həga tagha skwa la *Yahuda, ka ghwa yiva nda la Yahuda hada. 20Ka ndəɓ həŋ ta dzvu da tsi, má ŋa nzɗavatani da həŋ, ama ɗvaf a Pwal wa. 21« Ta dzaʼa vragagha vra yu ka ta ɗvay Lazglafta, » kaʼa nda həŋ.

Ka ŋlaftá tsi ta kwambalu ma Afisus ka laghu. 22Ka ɓhadaghatá tsi da luwa Sezare. Ka sliʼaftá tsi hada guli ka laghu da luwa Ursalima da ganaghatá zgu ta *Igliz karaku, ma kɗaku tsi ka laghu da luwa Aŋtakiya. 23Tahula nzɗavatani gerger ma luwa Aŋtakiya ta haɗika Siri, ka sliʼaftá tsi ka laghu da ranaftá haɗika Galat, nda haɗika Frizi, ka vla mbraku ŋa inda gwal zlghay nda ŋuɗuf.

Apwalus ma luwa Afisus nda ya ma Kwareŋt

24Mamu sana mnda la *Yahuda, Apwalus hga ni, ma luwa Alegzandri yata lu. Ka lagha tsi da luwa Afisus. Mnda gwaɗa ya, nda sna ta vindata skwiha ma defteri. 25Taghaf tagha ta skwi ta tva Mgham *Yesu. Ká ka nda warakatani. Ta taghay ta skwi ta ghəŋa Yesu nda tva ni ŋa mnduha. Aŋ mndani, maga batema Yuhwana yeya snaŋ tsi. 26Ka mnə tsi ta gwaɗa nda tsafaratá vgha ma həga tagha skwa la Yahuda. Snay i Priskila nda Akilas ta skwi ta mnə tsi, ka hgaghatá həŋ ŋa sganaghata taghanaftá skwi nda tva ni ta ghəŋa gwaɗa Lazglafta. 27Tahula tsa, ka kumaftá Apwalus ta dzaʼa ta haɗika Akaya#18:27 Ngha ta Slna gwal ghunay 18:12.. Ka sganaghatá zwana ma ta mbraku, ka vindanaftá həŋ ta ɗelewer ta gwal ta tsa haɗik ya ŋa tsuʼafta taŋ nda rfu. Ɓhadaghata ni da hada, ka kataŋtá tsi nda zɗaku ya vlaŋ Lazglafta ta gwal ta ghadatá zlghafta. 28Ka gwaɗ tsi ta gwaɗa baŋluwa nda la Yahuda, ka traptá həŋ ta skwi ŋa ŋrapta. Ka maranaŋtá tsi ta həŋ ta skwi nda vinda ma defteri kazlay: Yesu ná, *Kristi ya kəʼa.

Currently Selected:

Slg 18: xed

Highlight

Copy