Slg 16

Pghafta Timute ta i Pwal nda Silas

1Ka ɓhadaghatá Pwal da luwa Derba, nda ya da luwa Listra guli. Mamu sana mnda Zlghay nda ŋuɗuf hada, Timute hga ni. Makwa la *Yahuda ta nuta ka mnda zlghay nda ŋuɗuf ta yata. Mndəra la *Grek da ni. 2Ta ghubay tsa zwana ma ta nzakway ma luwa Listra nda ya ma luwa Ikwaniya ya ta Timute. 3Ka kumaftá Pwal ta klay ta səla ni, ka klə tsi. Ka tsanatá tsi ta fafaɗ, yaha gwaɗa da la Yahuda ta nzakway ma tsa vli ya, kabga nda sna həŋ demdem kazlay: Mndəra la Grek da ni kəʼa. 4Ma inda luwa ta ɓhadaghata həŋ, ta mnay həŋ ŋa inda gwal zlghay nda ŋuɗuf ta skwi ya tsiŋ gwal zlghay nda ŋuɗuf nda la galata mndu ta ghəŋa ni ma Ursalima. Tsaya skwi ŋa snata ghuni ka həŋ ta mnay ŋa taŋ. 5Ka mbrə *Igliz ta vgha ma zlghay nda ŋuɗuf, ka sgaku mbsaka taŋ inda fitik.

Fanaghata suni ta Pwal ma Truwas

6Ka pyaftá Sulkum nda ghuɓa ta i Pwal nda Silas, ka mna gwaɗa Lazglafta ta haɗika Asiya. Ka sliʼaftá həŋ ka laghu nda ta haɗika Frizi nda ya ta haɗika Galat. 7Ndusadaghata taŋ ta haɗika Misiya, ka kum həŋ ta dzaʼa ta haɗika Bitani, ama vlaŋ a Sulkuma *Yesu ta tvi ta həŋ wa. 8Ka kɗaŋtá həŋ ta dzaʼa nda ta haɗika Misiya, ka ɓhadaghatá həŋ da luwa Truwas. 9Hada, ka nghaŋtá Pwal ta sana mnda la Mekaduniya ta sladu ta kəma ni ma suni, ta mnay ŋa ni kazlay: « Sawi da Mekaduniya da kata aŋni kəʼa. » 10Tahula fanaghata tsa suni ya ta Pwal, ka gi psə ŋni ta tva dzaʼa da Mekaduniya, kabga graf gra ŋni kazlay: Ta hga aŋni Lazglafta ŋa kla *Lfiɗa Gwaɗa da hada kəʼa.

Zlghafta Lidiya ta Yesu ma luwa Filipiya

11Ka lam ŋni da kwambalu ma luwa Truwas, ka ksaftá ŋni ta tva dzaʼa da luwa Samutra ta tsavata ma drəf ya. Ga mahtsima ni, ka laghu ŋni da luwa Nyapulis. 12Ka sliʼaftá ŋni hada ka laghu ŋni da luwa Filipiya. Tsaya luwa dagala ta tsa haɗika Mekaduniya ta nzakway ma dzva la Ruma ya. Tsəɓakw fitika ŋni gerger ma tsa luwa ya. 13Baɗu fitika *Sabat, ka saghu ŋni ma huɗa luwa ka laghu tawa ghwa, dzaʼa slaf sla ŋni ta vla ndəɓa dzva la *Yahuda hada ka ŋni sizlay. Ka slaftá ŋni ta tskata miʼaha. Ka mnə ŋni ta gwaɗa ŋa taŋ. 14Lidiya hga sana marakw mataba taŋ, makwa luwa Tiyatir ya. Lguta dva ya nda bla nda bla dzva ni ta dzawə tsi. Ta zləŋay ta Lazglafta guli. Ka fatá tsi ta sləməŋ ka sna gwaɗa ŋni. Ka gunanaŋtá Lazglafta ta ŋuɗufa ni, ŋa tsuʼa tsa gwaɗa ta gwaɗ Pwal ya. 15Ka maganafta lu ta batem nduk nda la ga taŋ tani. « Ka graf gra kuni kazlay: Zlghaf zlgha yu ta Mgham *Yesu kəʼa, sawa da ini » kaʼa ka mbladaghatá aŋni da taŋ.

Nzaku ma gamak ma luwa Filip

16Ta dzaʼa ŋni da vla maga duʼa ma sana fitik, ka gəmatá ŋni nda sana makwa ka kwalva ksu ghwaɗaka sulkum ta vlaŋtá mna skwi dzaʼa magaku ta kəma. Dagala tsedi ta tsanakta tsi ta daŋahəga ni həga ni, nda tsa ma slayaŋslayaŋani ya. 17Ka gi mbaɗ tsi mista ŋni nda i Pwal. « Nana mnduha na ná, gwal ksanatá slna ta Lazglafta Dagala ya, tva mbaku ta mnaghunata həŋ! » kaʼa ta dzaʼa nda gugɗay. 18Nda za fitikha ni ta mna tsa gwaɗa ya tama, ka psanaghatá tsi ta Pwal. « Nda hga *Yesu *Kristi, sab sa ma na makwa na, » kaʼa nda tsa ghwaɗaka sulkum mida ya. Ka gi sab tsi mida hada hada. 19Nghay la daŋahəga ni həga ni ma tsa makwa ya ta kwala taŋ kul fəglaftá ghəŋ ta mutsa tsedi, ka hlaftá həŋ ta i Pwal nda Silas, ka hlaghatá ta dawadawa ta kəma gwal dagala dagala. 20Ka hladaghatá həŋ ta həŋ da mnda tsa guma la Ruma. Ka həŋ mantsa: « Gwaɗa ŋa kətsiɗa mnduha klamak nana mnduha la *Yahuda na. 21Ka taghamatá nzaku kul nghamata, kul ramata tsuʼay mu, kul ramata ksay mu ta slna nda tsi, na amu ta nzakway ka la Ruma na, » ka həŋ.

22Ka pghaftá dəmga ta vgha ta həŋ. Ka susuɗaghutá gwal guma ta lguta i Pwal nda Silas. « Sləvawa həŋ nda krupi, » ka həŋ. 23Tahula sləvaptá həŋ, ka hlaghatá lu ta həŋ da gamak. « Ka ngha ka ta həŋ ɗina, » ka lu nda mnda ngha gamak. 24Na mnanata lu ta tsa gwaɗa ya ta mnda ngha gamak, ka hlaghatá tsi ta həŋ da huɗa həga. Ka tsatsamtá tsi ta səlaha taŋ ma udzu. 25Ma takala tama, ka mag i Pwal nda Silas ta duʼa, ka fa laha nda zləzlva Lazglafta. Ta snay snay hamata la vuʼa. 26Gi ka ghudzavaftá haɗik, ka gigɗavaftá tughwa tsa gamak ya. Gi ka gwanutá inda wa tgha tida, ka pwalutá ziɗa ta inda la vuʼa. 27Ka sliʼavatá tsa mndu ta ngha həŋ ya. Kəʼa kəʼa ná, nda gwana tsa gamak ya. Ka tsəhagaptá tsi ta budgwani ŋa dzuvtá vgha ni, ba sliʼaghuslia inda la vuʼa kəʼa sizlay. 28« Ma dzuv ka ta vgha gha, wana ŋni demdem hadna, » ka Pwal gugɗata. 29« Pinifwa vu ya, » ka tsa mnda ngha vuʼa ya, ka ndadamtá tsi zləmbatá ta kəma i Pwal nda Silas, ta ghudzaku vgha ni da zləŋ. 30Tahula tsa ka hligiŋtá tsi ta həŋ. Kaʼa nda həŋ mantsa: « Mghamha ɗa, nu dzaʼa yu magata ka da mbafta yu na? » kaʼa. 31Ka Pwal nda Silas mantsa: « Zlghaf zlgha ta Mgham Yesu Kristi, ka mbafta ka, kagha nda la ga ghuni tani, » ka həŋ. 32Ka mnanatá həŋ ta gwaɗa Mgham Lazglafta, ŋa tsatsi nda la ga taŋ tani demdem. 33Ka hlaghatá tsi ta həŋ ta va tsa rviɗik ya ka laghu ghuɓinistá lkuha taŋ. Ka gi maganaftá lu ta batem ta tsa mndu ya nda la ga taŋ tani demdem. 34Ka klaghatá tsi ta i Pwal nda Silas da taŋ, ka zunustá skwi ta həŋ. Ka rfu tsa mndu ya nda la ga taŋ tani ta rfu, kabga zlghafta taŋ ta Lazglafta.

35Tsaɗakwa vli, ka ghunaftá gwal tsa guma ta mnduha da tsa mnda ngha vuʼa ya kazlay: Zliŋ zla ta həŋ kəʼa. 36Ka mnda ngha vuʼa lami mnanatá Pwal mantsa: « Zliŋ zla ta həŋ, ka gwal tsa guma tsghaɗiktá lwi, sabwa sa, ka dzaʼa kuni nda zɗaku, » kaʼa. 37Ka Pwal nda tsa gwal ghunadagha lu ya mantsa: « Tsaŋnagha a lu ta guma wu, ka gi slvaptá lu ta aŋni ta kəma mnduha, ka pghamtá aŋni ma gamak, ta aŋni ta nzakway ka mnduha la Ruma ná, gi ndanana ná, sabwa sa kɗekkɗek ka lu nda aŋni ra? Magava a tsaya mantsa wa! Sagha hahəŋ ka ghəŋa taŋ zliŋnista, » kaʼa. 38Ka sliʼaftá tsa gwal ghunadagha lu ya rusanaftá gwal tsa guma. Ka ksaftá zləŋ ta həŋ, snaŋər həŋ kazlay: Mnduha la Ruma i Pwal nda Silas kəʼa. 39Ka lagha həŋ da ndəɓa dzvu, ka həŋ mantsa: « Ga ghunaga ŋni ta dmaku, » ka həŋ. Ka hligiŋtá həŋ ta həŋ ma gamak. Ka ndəɓanatá həŋ ta dzvu ta həŋ ŋa sliʼapta taŋ ma tsa luwa ya. 40Saba i Pwal nda Silas ma gamak, ka laghu həŋ da Lidiya. Tahula nghanaghata taŋ ta zwana ma, ka vlaŋtá mbraku ta həŋ ka sliʼaftá həŋ ka laghu.

Currently Selected:

Slg 16: xed

Highlight

Copy