Slg 10

Maravata duhwala Lazglafta da Kwarney

1Mamu sana mndu ta hgə lu ka Kwarney ma luwa Sezare. Tsatsi mali ta ghəŋa sana ghuɓa la sludza la Ruma ta hgə lu ka « ghuɓa la Italiya. » 2Ŋərma mndu tsa mndu ya nda gwal ga taŋ tani. Ta zləŋay ta Lazglafta, dagala mnduha la *Yahuda mbaha tsi. Ta magay ta duʼa da Lazglafta inda fitik. 3Ma sana fitik ta nzemndi hkən tama, ka slanaghatá sana mazəmzəm. Ka nghaŋtá tsi ta duhwala Lazglafta ta lam da həga ga taŋ ka hgaŋta. « Kwarney! » kaʼa nda tsi. 4Ka nghə tsi ta tsa duhwala Lazglafta ya nda zləŋ nda zləŋ. Kaʼa mantsa: « Nya ní Mghama ɗa! » kaʼa. « Ɓhadafɓha tsa maga duʼa ta mag ka ya, nda tsa mbaha mnduha ta mbah ka ya da Lazglafta, kəl tsi ka havapta ka kagha. 5Ghuna nda va nana ta mnduha da luwa Yafa da mnanatá Simuŋ ta hgə lu ka *Piyer ya ka sagha tsi. 6Ya waʼa ga sana mnda kɓa huta Simuŋ hga ni tawa drəf hga taŋ ya, » ka tsa duhwala Lazglafta ya nda tsi. 7Na gi laghwa tsa duhwala Lazglafta ta gwaɗa nda tsi ya, ka hgaftá tsi ta kwalvaha ni his nda ŋərma sludza ni turtuk ta ksanatá slna manda ghalya. 8Tahula rusanafta ni ta həŋ ta inda tsa skwi ta luta ya, ka ghunaghatá tsi ta həŋ da luwa Yafa.

Mnanaŋta Sulkum nda ghuɓa ta gwaɗa ta Piyer

9Ga mahtsima ni ta lab tsa mnduha ya ta tvi, ndusa həŋ ka lam da tsa luwa Yafa ya, ka laf *Piyer ta dədəmatá ghəŋa həga da maga duʼa. Taghwaŋ a fitik ma ghəŋ nda tsaya wa. 10Ka kuzlanaftá maya ta Piyer, ta kumay ma ta skwi ŋa zay. Tata də nda da lu ta skwi zay ŋa ni. Ka slanaghatá sana mazəmzəm. 11Ka nghə tsi ta gunata luwa, ka saha sana skwi manda gatá gwada habuŋ lu ta wa ni ta wa ni, ka saha ta haɗik. 12Inda nimtak fwaɗ səla mista ni, nda skwiha ta mbaɗa nda huɗi ta haɗik, nda zarakha tani mida. 13« Sliʼaf sliʼa gha Piyer ka hana ka, ka za ka, » ka sana lwi gwaɗganata. 14Ka Piyer mantsa: « Va a yu Mghama ɗa wa. Haɗ skwa mbiɗa nda skwi kul raku ka zay ta kəɗ walaŋta lami da wa ɗa wu, » kaʼa. 15« Ka nda ra tsa skwi ya ka zay ka Lazglafta ya ná, ma nghə kagha ka skwi kul raku ka zay, » ka tsa lwi ya ka mahis nda tsi. 16Hkən vranaftani mantsa ya, ka vriŋtá tsi ta tsa skwi ya ta luwa.

17« Nu mndəra tsaya ma skwi tama, » ka Piyer ta ndana klatá ghəŋa tsa mazəmzəm ta slanaghata ya, nda ɓhadaghata tsa gwal ghunaf Kwarney ya ta wa tgha manda kɗakwa taŋ ta ɗawaŋtá vla həga la Simuŋ. 18« Hadna ta nzakwa Simuŋ ta hgə lu ka Piyer ya ra? » Ka həŋ gwaɗata nda lwi kuzlahkuzlah. 19Tata ndana skwi ta ghəŋa tsa mazəmzəm ya Piyer kay ná, « Wya mnduha hkən ta psa kagha, 20sliʼaf sliʼa ka laha ka, ŋa dzaʼa gha kawadaga nda həŋ. Yaha ka da dga ghəŋ, kabga iʼi ta ghunagaghatá həŋ, » ka Sulkum nda ghuɓa nda tsi. 21Ka sliʼaftá Piyer ka saha slanaghatá tsa mnduha ya. « Wana yu, iʼi tsa mndu ta psə kuni ya. Nya ta klagaghunaghata na? » kaʼa nda həŋ. 22« Kwarney ka mali ta ghəŋa ghuɓa sludzi, ta nzakway ka ŋərma mndu, ta zləŋa Lazglafta, ta ghubu inda la *Yahuda ya ta ghunaŋnakta. Duhwala Lazglafta ta mnanata ŋa hgadaptá kagha da taŋ ŋa sna skwi dzaʼa ka mnanata, » ka həŋ nda tsi. 23Ka hladamtá Piyer ta həŋ, ka han həŋ hada.

Sliʼafta Piyer ka laghu da Kwarney

Ga mahtsima ni, ka sliʼaftá tsi ka laghu mista taŋ. Ka sliʼaftá sanlaha ma zwana ma ma luwa Yafa ka pghaghatá həŋ. 24Ka ɓhadaghatá həŋ da luwa Sezare. Ga mahtsima ni, ta kzlaykzlay Kwarney nda la ga taŋ tani, nda huɗuhuɗa graha ni gwal hagaf tsi ya, ta həŋ. 25Manda ɓhadaghata *Piyer, ka lagha Kwarney da guyay, ka zləmbatá tsi ma ghuva ni ka ga zgu ŋa ni. 26« Sliʼaf sliʼa, mndu iʼi guli, » ka Piyer ka sliʼanafta. 27Tata dzaʼa nda ghwa yiva həŋ nda Kwarney, ka lam tsi da həga. Ka slanaghatá tsi ta hiɓatá mnduha hada. 28Kaʼa nda həŋ mantsa: « Nda sna kuni ná, pyaf pya lu ta guyay mnda la Zudiya ta vgha nda la mayəm, ɓalavakata lam da həga ga taŋ. Tsaw haɗ mnda səla ya ŋa mnay kazlay: *Nda ghuɓa yeya, ghuɓa a yeya ka guya vgha nda tsi wu kəʼa wu, ka Lazglafta marihata. 29Tsaya kwal yu kul dgaŋtá ghəŋ ka sagha hgaŋər ka ta iʼi. Ta kumay yu tama ta snaŋtá ghəŋa skwi kəl kuni ka hgaktá iʼi, » kaʼa. 30Ka Kwarney mantsa: Mafwaɗa fitik na, manda va na luwa, ta maga duʼa yu ma həga ɗa ta nzəmndi hkən, ka gi sagha sana mndu nda suɗatá lguta ŋusliŋ tilil ta vgha ni ta kəma ɗa. 31Kaʼa nda iʼi mantsa: « Kwarney, sna sna Lazglafta ta duʼa gha, havap hava guli ka mbaha mnduha ta mbah ka. 32Ghuna tama ta mnduha da luwa Yafa da hgaghaktá Simuŋ ta hgə lu ka Piyer ta nzaku ga sana mndu, Simuŋ hga ni, mnda kɓa huta, ta wa drəf hga ni ya, » kaʼa. 33« Gi kəl yu ka ghunadaptá mnduha da kagha. Ɗina na sagha sagha ka na. Ndanana, wana aŋni demdem ta kəma gha ŋa sna skwi ya mna gha Mgham ŋa mnaŋnata, » kaʼa.

Piyer ta gwaɗa ga Kwarney

34Mbaɗa *Piyer ka zlraftá gwaɗa. Wya kaʼa: « Kahwathwata, ndanana grafta yu kazlay: Haɗ Lazglafta ta gala mndu wu kəʼa. 35Inda mndu dər má ma mndəra la wa tsi ta zləŋa hga ni, ka maga skwi tɗukwa ná, zɗəgana zɗa. 36Ghunaf ghuna Lazglafta ta gwaɗa ni ŋa zwana la Israʼila ma mnanaŋtá *Lfiɗa Gwaɗa ta nzaku nda ma *Yesu *Kristi, ta nzakway ka Mghama inda mnduha, ta həŋ. 37Nda sna kuni ta skwi ta zlrafta ta haɗika Galili, ka zluʼutá tsi ta vli ta haɗika Zudiya demdem, tahula kɗakwa Yuhwana ta mna gwaɗa, nda ya ta maga batem. 38Nda sna kuni ka Lazglafta pghəganaghatá mbrakwa Sulkum nda ghuɓa ta Yesu Kristi mnda la Nazaret. Nda sna kuni guli ka Yesu ranaftá inda vli ka maga zɗaku, ka mbamba gwal ghurgana halaway ta həŋ, kabga kawadaga Lazglafta nda tsi. 39Aŋi, nda nza aŋni ka masləmtsəka inda skwi maga tsi ta haɗika la *Yahuda nda Ursalima. Ka dzatá lu nda ma zləŋafta ta udzu. 40Ka sliʼaganaptá Lazglafta nda hafu baɗu mahkən. Ka vlaŋtá tsi ta tva maraŋtá ghəŋa ni. 41Ŋa tsa aŋni tiŋlaghu Lazglafta ta zbapta ŋa nzakway ka masləmtsəka ni ya. Ŋa tsa aŋni si ta za skwi, ka sa skwi kawadaga nda tsi ya maraŋta tsi ta ghəŋa ni, tahula sliʼagaptani mataba gwal nda rwa ya. Ŋa inda mnduha demdem a maraŋta tsi ta ghəŋa ni wa. 42Tsatsi ta mnaŋnata, ka mna kuni ŋa mnduha, ka sladanafta kuni kazlay: Tsatsi sladana Lazglafta ka mnda tsa guma ta ghəŋa gwal nda hafu, nda ya ta ghəŋa gwal nda rwa kəʼa. 43Inda la anabi ná, mna mna həŋ ta ghəŋa ni kazlay: Dər wati ma mndu ta zlghafta dzaʼa mutsay ta planatá dmakwa ni, nda ma mbrakwa hga ni, » kaʼa.

Saha Sulkum nda ghuɓa ta ghəŋa gwal kul nzakway ka la Yahuda

44Tata mna tsa gwaɗaha ya *Piyer, ka saha Sulkum nda ghuɓa ta ghəŋa inda tsa gwal ta sna tsa gwaɗa ya. 45Ka ndərmim inda tsa gwal zlghay nda ŋuɗuf nda tsa fafaɗa taŋ ta lab mista Piyer ya kay, ta vlagata Lazglafta ta Sulkum nda ghuɓa ta ghəŋa inda tsa gwal kul nzakway ka la *Yahuda ya. 46Ka snə həŋ ta gwaɗay tsa mnduha ya ta gwaɗa nda sanlaha ma gwaɗa. Ka zləzlvu həŋ ta glakwa Lazglafta. Ka Piyer mantsa: 47« Dzaʼa pyaf pya lu ta maganaftá batem nda imi ta na mnduha na, ya wana mutsaf mutsa həŋ ta Sulkum nda ghuɓa manda va amu na ra? » kaʼa. 48Ka Piyer guli mantsa: « Maganaftá batem ta həŋ nda hga Mgham *Yesu *Kristi, » kaʼa. Tahula tsa, ka ndəɓanata həŋ ta dzvu ŋa nzɗavatani tsəɓakw fitik da həŋ.

Currently Selected:

Slg 10: xed

Highlight

Copy