Mwanzo 13

Buraimu watanukana na Loti

1Sambi Buraimu akilawa Miswiri kure na nkawake, pamoja na vyaâwere nawo piya, wakilongozana na Loti wakuka upande wa Negebu.

2Wakati siwo ari tajiri nkulu sana, wa mifuwo ya manyama wengi wawenye, parata pamoja na oru. 3Ikisa akitenda safari yake akilawa Negebu, akuka mpaka Beteli, mpaka mahala paanzire kutenga ema yake, kati ya Beteli na Ai, 4mpaka nopare pânzire kujenga uralu wa kafara ure. Nopare akintukuza Mola wetu kwa zina rake.

5Sambi Loti âlongozane na Buraimu ire, na iye novyo ákiwa nawo mifuwo ya makondoo na ng'ombe, na ema. 6Ndi ntamana, awákijuzi kwikala pamoja konta inti ire íkiwa noto, apáwerepo mahala pakutula mali a kila mmoja. 7Noparepare, ukilawirira umani wa wasunga wa Buraimu na wasunga wa Loti. Kwasa javyo, kwa wakati nowo, waKanaa na waPerezi wákikalanga noyo inti-yo.

8Basi Buraimu akimwambira Loti javi: “Epa usiwepo umani omi nowe, wala wasunga wangu na wako, kwa kuwa tiwa munu na jamaa yake. 9Inti-yi piya airi mmakono mwako? Autondola pausaka? Nukulebela unitanuke, ikiwa uwe ukukirira upande wa nkono-sonto, omi nukukirira wa nkono-nriro, na ikiwa ukukirira upande wa nkono-nriro, omi nukukirira wa nkono-sonto.” 10Loti akilamusa maso akinang'aniza kawona muto wa Yordani na munrati mure piya muwa maji-maji. Múkiwa kamba bushtani ya peponi, kamba inti ya Miswiri. Nrati ure uritandikira ukukirira Sowari. Evi vikuna kábula Mola wetu saanamba kudangula Sodoma na Gomora. 11Ndi ntamana Loti akitondola nrati wa muto wa Yordani ure piya, noparepare akilawa akukirira upande wa malawira-juwa. Basi iye na mwenziwe ire wakitanukana. 12Buraimu akibaki Kanaa na Loti akikala nanyenje ya kaya za nrati wa Yordani ure akitenga ema zake karibu ya kaya ya Sodoma. 13Fala waSodoma wákiwa wabaya pakulu na wákikolanga madambi pakulu ka Mola.

Mola akumpa tamaa Buraimu kumpa inti ya Kanaa

14Bandi ya kutanuka Loti, Mola kamwámbira Buraimu javi: “Lamusa maso kulawa pauri-po unang'anize kibula na suheli, malawira-juwa na maswera-juwa, 15konta eyo inti yauwona-yo omi nukupa uwe pamoja na ujukulu wako iwe yenu daima milele. 16Omi níkurisa rikolo rako muwe wengi wawenye kamba vunvu ra ardhi. Hapana ákidiri kuwalanga vunvu ra ardhi, ndi kamba hapana aja kukidiri kuwalanga ujukulu wako. 17Lamuka upite ukenenda inti-yo piya urefu na upana wijiwe, konta omi núkupa.” 18Basi Buraimu akilamuka akisamisa ema zake akilawa akuka akikala karibu ya miti mikulu ya Mamre, kaya ya Heboroni, nokurekure akijenga uralu wa kafara apate kuntukuza Mola.

Currently Selected:

Mwanzo 13: wmwBI

Highlight

Copy