Marcos 16

Sinubli Yang Mebie i Jesus

(Mateo 28:1-8; Lucas 24:1-12; Juan 20:1-10)

1Kalabas na ning Aldo ning Sabbath, sinali lang pabanglu di Maria Magdalena, Mariang ima nang Santiago, at Salome ban ikuskus da king bangke nang Jesus. 2Abak a maranun ning Domingo#16:2 King Griego: Mumunang aldo ning paruminggu kanita, kabang saslag ya ing aldo, minta la king kutkutan. 3Kabang dalan, ngara king metung at metung, Ninu kaya ing makasaup kekatamu ban ilako ne ing batung makasabat king pasbul ning kutkutan? 4Inyang lumawe la ikit da ing makalako ne ing maragul a batu. 5At inyang milub na la king kutkutan, ikit de ing metung a kayanakan a lalaking makalukluk king bandang wanan at makaimalan yang maputi. Mitakutan la.

6E kayu tatakut, ngana ning lalaki. Panintunan ye i Jesus ning Nazaret, ing mipaku king krus? Ala ne keti. Sinubli neng mebie! Oyan ing lugal nung nukarin de binili. 7#Mt 26:32; Mc 14:28.Inya mako na kayu at sabian yu kang Pedro at karing aliwang alagad king muna ne kekayu Galilea. Dasnan yu ne karin antimo ing sinabi na kekayu kanita pa.

8Linual la at memulaying meko king kutkutan uling gagalgal la king takut. Oneng kaninu man ala lang sinabi uli na ning pangatakutan da.

ING MAKABANG KAPUPUSAN NA NITING MAYAP A BALITA

Pepakit Ya i Jesus kang Maria Magdalena

(Mateo 28:9-10; Juan 20:11-18)

[ 9Domingung abak a maranun kanita, kaybat nang sinubling mebie Jesus, pepakit yang mumuna kang Maria Magdalena nung kenu na la pepalualan ding pitung demonyu. 10Pintalan na lang Maria Magdalena ding alagad nang Jesus at belitanan na la. Disnan na lang malungkut at manangis. 11E re peniwalan inyang dimdam da kang Maria Magdalena king mabie ya i Jesus at king pepakit ya keya.

Pepakit Ya i Jesus karing Aduang Alagad

(Lucas 24:13-35)

12Kaybat na nita, pepakit ya i Jesus king aliwang paralan karing adua kabang maglakad lang papunta king baryu. 13Migbalik la Jerusalem at belita ra karing kayabe ra ing milyari, oneng e ra la munaman peniwalan.

Pepakit Ya i Jesus karing Labing Metung

(Mateo 28:16-20; Lucas 24:36-49; Juan 20:19-23; Ding Dapat 1:6-8)

14Katataulian, pepakit ya i Jesus karing labing metung kabang mamangan la. Sebianan na la uli na ning keyalan dang kasalpantayanan at ning kesiasan dang buntuk, at uling e la bisang maniwala karing menakit keya kaybat nang sinubling mebie. 15#Dapat 1:8.At sinabi nang Jesus karela, Munta kayu king mabilug a yatu at panaral ye ing Mayap a Balita karing sablang tau.#16:15 King Griego: sablang melalang. 16Miligtas ya ing ninumang maniwala at pabinyag; oneng miparusan ya ing ninumang e maniwala. 17Karetang maniwala, mayakit la deting mayupayang tanda: king lagyu ku makapalual lang demonyu; makapaniabi lang aliwang amanu; 18e la numanu balang agyang talnan da la ring ubingan o makainum lang lasun; itumpak da la ring gamat da karing masakit at deti kumayap la.

Ing Pamaitas Na Banuang Jesus

(Lucas 24:50-53; Ding Dapat 1:9-11)

19 # Dapat 1:9-11. Kaybat nang migsalita karela, mitas ya banua ing Ginung Jesus, at linukluk ya king banda nang wanan ning Dios. 20Meko la ding alagad at menaral la karing sablang lugal. Seupan na la ning Ginu king obrang iti at pepatunayan na ing panaral da king kapamilatan na ning binie nang upaya karela, ing upayang makagawang milagru. Amen.]

ING MAKUYAD A KAPUPUSAN NA NITING MAYAP A BALITA

[ 9Pintalan de ring babai i Pedro at ding kakaluguran na, at belita ra karela ing sablang sinabi na ning lalaking atagpuan da king kutkutan. 10Kaybat na nita, i Jesus mismu, king kapamilatan da ring alagad na, pepabal na king mabilug a yatu ing banal at ing e kukupas a balita na ning alang anggang kaligtasan.]

Currently Selected:

Marcos 16: PmPV

Highlight

Copy