Mateo 3

Ing Pamanaral nang Juan a Maminyag

(Marcos 1:1-8; Lucas 3:1-18; Juan 1:19-28)

1King panaun a ita, linual ya at menaral i Juan a Maminyag king disyerto karin Judea. 2#Mt 4:17; Mc 1:15.Nganang menaral: Sumisi kayu at painggulut karing kasalanan yu, uling malapit ne ing Kayarian ning Banua. 3#Isa 40:3.I Juan ya ing taung amanuan ning propeta Isaias inyang nganang sinabi,

Ing siwala king disyerto kukulait na:

Isadia yu ing dalanan ning Ginu,

itulid yu la ding dalan a tuntunan na!

4 # 2 Ari 1:8. Gewa king buak kamelyu ing imalan a susulud nang Juan at makababat yang gewa king balat animal. Durun at pulut-panilan ing pamangan na. 5Migsaria la kang Juan ding tau Jerusalem at ding sablang tau Judea at ding manuknangan king sakup ning Ilug ning Jordan. 6Sinabi da la ring kasalanan da at bininyag na lang Juan king Ilug ning Jordan.

7 # Mt 12:34; 23:33. Oneng panakit na karing dakal a Pariseo at Saduseo a daratang ban pabinyag, ngana karela, Ikong lahing ubingan, ninu ing minutus kekayu ban takasan yu ing daratang a kaparusan? 8Nung tune kayung sisisi karing kasalanan yu, ipakilala yu king pamagbayu yung bie. 9#Jn 8:33.E yu pangangas sasabian king lahi na kayung Abraham. Sasabian ku kekayu, agyang karing batung deni ing Dios makapalto yang tune nang lahing Abraham. 10#Mt 7:19.Ngeni pa makasadia neng dugpa ing palakul karing yamut da ring tanaman, ban ing isanu mang tanaman a e mikakabungang mayap, makutud ya at miyugse king api. 11Bibinyagan da kayu king danum ban mipakilala king sisisian yu la at painggulutan ding kasalanan yu; oneng ing daratang katuki ku lalu yang mayupaya kesa kanaku. E ku man karapatdapat mamitbit karing sandalyas na. Binyagan na kayu king Banal a Espiritu at king api. 12#Kab 5:14, 23.Atyu king gamat na ing sabungke na; linisan na ing pidadaran na at tipunan na ing pale#3:12 King Griego: trigu. king kamalig na, oneng dulukan na ing sepu king aping e matatda kapilan man.

Ing Pangabinyag nang Jesus

(Marcos 1:9-11; Lucas 3:21-22)

13Kanita dinatang ya i Jesus king Ilug ning Jordan; menibatan ya Galilea. Dinatang ya ban pabinyag kang Juan. 14Tatanggian ne sanang Juan, uling ngana, Aku ing sukat pabinyag keka, oneng ngeni ika pa ing lalapit kanaku!

15Nganang mekibat Jesus kang Juan, Paburen mung makanyan ing malyari, uling iti ya ing kailangan malyari at sukat tang daptan ban matupad ing kaburian ning Dios. Panamdam nang Juan kaniti, menusig ya kang Jesus.

16Kabinyag nang Jesus, agad yang sinaka king danum at mibuklat ya ing banua. Ikit ne ing Espiritu ning Dios at kukuldas yang balamu metung a patipati at tinuklu ya keya. 17#Gen 22:2; Dalit 2:7; Isa 42:1; Mt 12:18; 17:5; Mc 1:11; Lc 9:35.Migsalita yang ibat banua ing metung a siwala ngana, Iti ya ing Anak kung pakamalan a tutu kung katulan.

Currently Selected:

Mateo 3: PmPV

Highlight

Copy