Lucas 2

Ing Pangabait nang Jesus

(Mateo 1:18-25)

1King panaun a ita, inutus nang Emperador Augusto king magpalista la ding sablang atyu king sasakupan na ning Imperyo ning Roma. 2Iting mumunang pamipalista merapat inyang i Quirino ya ing gobernador na ning Siria. 3Inya minuli ya ing balang metung king sarili nang balen ban palista.

4Manibat Nazaret, Galilea, minta ya i Jose king Betlehem, Judea, ing balen a beitan nang David, uling ibat ya i Jose king lahi nang David. 5Kayabe neng minuli i Maria a maging asawa na ban palista munaman. Miyaldo ne kanita. 6Kabang atyu la karin, miras ing oras ning pamanganak nang Maria. 7At beit ne ing pangane nang anak a lalaki. Binalut neng lampin at kinera ne king lilibangan, uling alang lugal para karela king pipaglayunanan.

Ding Pastul at ding Anghel

8King sakup na mu rin ning lugal a ita, ating pastul king marangle. Lalamayan da lang babanten ding tupa ra. 9#Tob 5:4.Bigla yang pepakit karela ing anghel ning Ginu. At linaganap king makapatulug ing makasilo nang ligaya ning Ginu. Tiblan na la ning maragul a takut! 10Oneng ngana ning anghel karela, E kayu mitatakutan! Uling pagdala da kayung mayap a balita a munie maragul a tula karing sablang tau. 11Uling king benging iti king balen nang David mibait ya ing kekayung Talapagligtas, ing Cristo a Ginu. 12Ing tanda kaniti ya ini: manakit kayung metung a bingut a makabalut lampin at makakera king lilibangan.

13At bigla yang meyakit siping na ning anghel ing metung a maragul a grupu ding anghel banua. Ngarang pupuri king Dios,

14Ligaya king Dios king kakataskatasan,

at keti sulip kapayapan karetang

taung katulan na!#2:14 Karing aliwang kasulatan: kapayapan, mayap a pilubluban karing tau.

15Inyang migbalik na la banua ding anghel, ngara ding pastul king metung at metung, Tara munta tamu Betlehem ban akit tamu iting mepalyaring balita na kekatamu ning Ginu.

16Inya memalagua lang meko at atagpuan de i Maria at i Jose, at ikit de ing bingut a makakera king lilibangan. 17Panakit da ring pastul king bingut belita da karela ing sinabi na ning anghel tungkul keya. 18At mipamulala la ding sablang mekaramdam king belita da ring pastul. 19Mitanam la deting bage king pamisip nang Maria at migunamgunam ya tungkul kareti. 20Mibalik la king marangle ding pastul a pupuri king Dios uli na ning sablang dimdam da at ikit; makayakma ngan king sinabi na ning anghel karela.

Ing Pangarinan nang Lagyung Jesus

21 # Lev 12:3; Lc 1:31. Kalabas na ning paruminggu, inyang miras na ing aldo masirkunsisyun#2:21 O kaya: matuli. ya ing bingut, pemalagyuan deng Jesus, ing lagyung binie na ning anghel bayu ya pa mipangagli.

Ing Pangadaun nang Jesus king Templo

22Miras ing aldo ban tuparan da ri Jose at Maria ing yuyutus na ning Kautusan nang Moises at gampanan ing seremonia king pamaglinis. Inya dela re ing anak king Jerusalem ban iyain de king Ginu. 23#Exo 13:2, 12.Iti ya ing makasulat king kautusan na ning Ginu, Kailangan yang mitalaga king Ginu ing balang lalaking pangane. 24#Lev 12:6-8.At minta la naman karin ban miyain ain-sakripisyu antimo ing yuyutus na ning kautusan ning Ginu: kaparis a batubatu o kaya aduang pitsun.

25Ating metung a lalaking manuknangan karin Jerusalem, ing lagyu na Simeon. Metung yang taung mayap at ating takut king Dios. Panayan na ing pangaligtas na ning Israel. Ing Banal a Espiritu atyu kang Simeon. 26Pepabalu na kang Simeon ning Banal a Espiritu king e ya mate anggang e ne akit ing Cristo a pengaku na ning Ginu. 27King agkat ning Banal a Espiritu, linub ya i Simeon king Templo. Inyang ding pengari nang Jesus dela re king Templo ban daptan ing aduan na ning Kautusan, 28kimunan neng Simeon ing anak karing takde na at pepasalamat ya king Dios. Ngana:

29Ginu, ngening tiparan mu ing kekang pangaku,

paburen mu neng paynawa ining kekang talasuyu.

30Ikit da na mu rin ding mata ku ing kekang pamagligtas

31a kekang sidia king arapan ding sablang bansa.

32 # Isa 42:6; 49:6; 52:10. Metung a sala a pakilala king kekang dalan karing paganu,

at munie dangalan king Israel

a kekang balen.

33Mipamulala la ding pengari na ning anak king sinabi nang Simeon tungkul king anak da. 34Binendisyunan na lang Simeon at ngana kang Mariang ima nang Jesus, Pinili ne ning Dios iting anak para king kapahamakan at king kaligtasan da ring dakal king Israel. Makatalaga yang maging tanda a ibat king Dios; oneng insultuan de ring dakal a tau. 35Makanyan mibulalag ing isipan ding dakal. At sugatan ne ing pusu mu ning kalungkutan a kasing taram ning metung a punyal.

36 # Jdt 8:4, 5. Atin munamang metung a propetang babai karin, ing lagyu na Anna. Anak neng Fanuel a ibat king tribu nang Aser. Metung yang babaing tutu nang matua at keutus niang pitung banua ning asawa na; 37kaybat mebalu ne kilub ding walung pulu at apat a banua. E bitasang mamako king Templo. Aldo't bengi sasamba ya king Dios king kapamilatan na ning pamag-ayunu at pamanalangin. 38Ketang oras munamang ita, dinatang ya at pepasalamat king Dios. Migsalita ya tungkul king anak para karetang manaya king pamagligtas na ning Dios king Jerusalem.

Ing Pamagbalik da Nazaret

39 # Mt 2:23. Inyang atuparan da na ing sablang aduan na ning Kautusan ning Ginu, migbalik la Nazaret, Galilea, ing balen dang tibuan. 40At meragul ya ing anak at meging masikan ya. Mebiasa ya at ing grasya na ning Dios atyu kang Jesus.

Ing Anak a Jesus Kilub ning Templo

41 # Exo 12:1-27; Deut 16:1-8. Balang banua pupunta la Jerusalem ding pengari nang Jesus ban tumagun king Piesta ning Pamaglagpus.#2:41 Kareng aliwang likas: Pascua. Lawan ya ing glosaryo. 42Inyang labi neng aduang banua tua i Jesus, mekipamiesta la antimo ing sadia rang daraptan. 43Kaybat na ning piesta minuli la, oneng pepailakuan ya Jerusalem ing anak a i Jesus. E ra apansingan iti ding pengari na; 44inisip da king kayabe da ne king grupu ra. Pepatingapun na lang maglakad inyang apansingan da king e re kayabe. Penintun de karing kamaganak da at kakaluguran, 45oneng e re ikit. Inya migbalik la Jerusalem ban panintunan de. 46King katlung aldo, ikit de kilub ning Templo; makalukluk yang kayabe da ring Judio a talaturu, makiramdam ya at mangutang karela. 47Mengapamulala la ding sablang mekaramdam kang Jesus king kabiasnan na at pakibat. 48Mipamulala la ding pengari na inyang ikit de at nganang ima na, Anak, obat depatan mu kekami iti? I tatang mu at aku migaganaka kami king pamanintun keka.

49Pekibat na karela, Baket penintun yu ku? E yu wari balu king kailangan kung atyu king bale nang Ibpa ko? 50Oneng e ra aintindian ing buri nang sabian.

51Kayabe reng migbalik Nazaret i Jesus. Meging mapamintu ya karela. Sinikap na ngang Maria iting bage king pusu na. 52#1 Sam 2:26; Kas 3:4.At dinagul ya i Jesus king masanting a pamikakatawan ampon king kabiasnan at katanggap-tanggap ya king Dios at karing tau.

Currently Selected:

Lucas 2: PmPV

Highlight

Copy