Genesis 25

Ding Aliwa na pang Lahing Abraham

(1 Cronica 1:32-33)

1Bukud kang Sarah meging asawa ne pang Abraham i Ketura. 2Ding meging anak na kang Ketura ila di Zimran, Joksan, Medan, Midian, Isbak, at i Suah. 3I Joksan ya ing tata da ri Seba at Dedan. I Dedan ya ing tata da ring taung Asurim, Letusim, at Leumim. 4Ding anak nang lalaking Midian ila ri Efa, Efer, Hanok, Abida, at Eldaa. Deti lahi na la ngan Ketura.

5Pepamana nang Abraham ing pibandian na kang Isaac. 6Inyang mabie ya pa, dininan na na lang mana ring anak nang lalaki karing babaing kasese na. Pepapuntalan na la king dane aslagan ban ilaut la kang Isaac.

Ing Pangamate at Pangakutkut nang Abraham

7Disnan nang Abraham ing idad dinalan pitung pulu at limang banua. 8Kaybat mepatlud ya inawa; mete yang maligaya at sidsad king ketuan. At inabe re karing mete da ring kamaganak na. 9Kitkut de ring anak nang i Isaac at i Ismael king dane aslagan na ning Mamre, king kueba karin Makpela, king marangle nang Efron a anak nang Zohar, ing Hiteo. 10#Gen 23:3-16.Ing gabun ya itang seli nang Abraham karing Hiteo. Karin ya mikutkut siping na ning asawa nang i Sarah. 11Kamate nang Abraham, binendisyunan ne ning Dios ing anak nang i Isaac a menuknangan malapit Beer-lahai-roi.

Ding Lahi nang Ismael

(1 Cronica 1:28-31)

12Oreti ding anak nang Ismael a anak nang Abraham kang Agar a tubu Ehipto at ipus nang Sarah. 13Ding makatuki ila ding lagyu da ring anak nang Ismael; makasulat la agpang king pamidalan-dalan na ning karelang pangabait: i Nebayot a pangane na, i Kedar, i Adbeel, i Mibsam, 14i Misma, i Duma, i Massa, 15i Hadad, i Tema, i Jetur, i Napis, at i Kedema. 16Ila deti ring anak nang Ismael. Deting labing adua lagyu da la ring pamuntuk da ring lahi agpang king sarili dang baryu at lugal a pitutuknangan. 17Mebie yang dinalan atlung pulu at pitung banua i Ismael. Kaybat mepatlud ya inawa. Mete ya at inabe re karing mete nang kamaganak. 18Menuknangan la ding lahi nang Ismael pilatan na ning Havila at Shur, banda nang aslagan ning Ehipto papunta Asiria; manuknangan ya ing balang metung karela tulid dang tolda ding kamaganak na.

I Esau at i Jacob

19Oyni ing istoria na ning pamilya nang Isaac a anak nang Abraham. 20Apat yang pulung banua i Isaac inyang ayasawa ne i Rebeca a anak nang Betuel (ing Arameo ning Mesopotamia). I Rebeca kapatad neng Laban a Arameo munaman. 21Menalangin ya i Isaac king Ginu para king asawa na uling e ya manganak. Pekiramdaman na ning Ginu ing panalangin na; kinagli ya at mebuktut i Rebeca. 22Oneng mitutulakan la ding anak king atian na angga king asabi na, Nung makanyan ing malilyari mayap pang mate na ku! Minaus ya king Ginu ba nang abalu nung nanu mo ing sabian na.

23 # Roma 9:12. Oyni ing pakibat ning Ginu,

Adua lang bansa ding atyu king atian mu,

adua lang lahing milalaban ding ibait mu.

Mas masikan ya ing metung kesa king kadua,

at suyuan ne ning koya ing wali na.

24Inyang dinatang na ing oras a manganak ya, beit na la ding kambal a lalaki. 25Malare-lare ya at bulbulin a balat ing minunang mibait. Inya inaus deng Esau. 26Tinuki yang mibait ing kapatad na; makatalan ya king sakung nang Esau; inya inaus deng Jacob. Anam yang pulung banua i Isaac inyang mibait la.

Pisali nang Esau ing Katuliran na

27Meragul la ding anak. Mayap yang mangasu i Esau; magdatun ya king kaparangan. Samantalang i Jacob naman tau yang tahimik at maratun king toldang tuknangan da. 28Paborito neng Isaac i Esau uling maburi ya karing ararakap na niti king pamangasu na. I Jacob naman ya ing paborito nang Rebeca.

29-30Misan a aldo, kabang maglutu yang sabo butul gule a malare i Jacob, dinatang yang ibat king marangle i Esau, at maranup ya. Ngana kang Jacob, Dinan mu na ku mu keng lulutu mung sabo gule a malare uling tutu na kung maranup. (Iti ing sangkan nung inya inaus deng Edom).#25:29-30 Ing buri nang sabian: malutu.

31Nganang Jacob, Ibie me pa kanaku ing katuliran mu bilang pangane at kaybat dinan da ka kening lulutu ku.

32Nganang Esau, Nanung ulaga na ning katuliran ku bilang pangane ngening mamamate na kung danup?

33 # Heb 12:16. Nganang Jacob, Sumpa ka pa mu kanaku. Sinumpa ya i Esau at binie na kang Jacob ing katuliran na bilang pangane. 34Kanita i Jacob dininan neng tinape at king sabo gule a malare. Mengan ya at minum; tinikdo ya at saka ne meko. E na pepakamalan Esau ing katuliran na bilang pangane.

Currently Selected:

Genesis 25: PmPV

Highlight

Copy