Ding Dapat 7

Ing Pamagsalita nang Esteban

1Kitang ning Pekapun ding Pari kang Esteban, Tutu pin ing bibintang da laban keka?

2 # Gen 12:1. Nganang mekibat Esteban, Mangatua ku at kapatad! Pakiramdaman yu sa ining sabian ku! Ing Dios a panibatan na ning ligaya pepakit ya king makatua tamung i Abraham kanitang iting penibatan tamu kasalukuyan na pang manuknangan karin Mesopotamia; kanitang bayu ya linipat karin Haran, 3at nganang migsalita ning Dios kang Abraham, Lakuan me ing pamilya mu at bansa at munta ka king lugal a ituru ku keka. 4#Gen 11:31; Gen 12:4.Makanyan yang meko karin Caldea at miras Haran ban manuknangan karin. Kamate na ning pengari nang lalaki, pepapuntan ne ning Dios i Abraham king lugal a iti a ngeni kekayung pitutuknanganan. 5#Gen 12:7; 13:15; 15:18; 17:8.E ne dininan ning Dios agyang malati mung dake king gabun a iti para maging bandi nang sariling Abraham; oneng pengaku na ning Dios king ibie ne keya at maging bandi neng sarili, at miyabie ya karing maging lahi na. Ala ya pang anak i Abraham kanitang oras a pengaku na ning Dios ing makanyan. 6#Gen 15:13, 14.Anti keni ing sinabi na ning Dios kang Abraham, Manuknangan la ding lahi mu king aliwang bansa at maging ipus la karin at pasakitan da la kilub ding apat a ralan a banua. 7#Exo 3:12.Oneng aku ing matul king bansang manipus karela, nganang mengaku ning Dios, at kaybat mako la ketang bansang ita at samba la kanaku king lugal a iti. 8#Gen 17:10-14; Gen 21:2-4; Gen 25:26; Gen 29:31—35:18.Kaybat na nita, binie ne ning Dios kang Abraham ing seremonia na ning sirkunsisyun bilang palatandanan na ning kasunduan. Makanyan neng sinirkunsisyunan Abraham i Isaac king kawalung aldo kaybat nang mibait. Gewa na naman Isaac iti kang Jacob at makanyan munaman ing depat nang Jacob karing labing aduang makatua na ning Israel.#7:8 King Griego: ding patriarka.

9 # Gen 37:11; Gen 37:28; Gen 39:2, 21. Pengalaluan de ring makatua na ning Israel i Jose at pisali reng anting ipus karin Ehipto. Oneng ing Dios atyu kang Jose. 10#Gen 41:39-41.Linigtas ne king sablang kaligaligan a delanan na. Binendisyunan ne ning Dios i Jose at dininan neng kabiasnan inyang minarap ya king ari ning Ehipto. Inya tilduan ne ning ari#7:10 Kareng aliwang likas: Faraon. a maging gobernador na ning mabilug a bansa ampon ning palasyu na. 11#Gen 42:1, 2.Kanita naman mika danup king mabilug a Ehipto at Canaan, at maragul ing kasakitan a pepasari na niti. E na la menakit apangabiayan da ring makatua tamu. 12Inyang abalitan nang Jacob king dakal ing kabiayan karin Ehipto, tiburan na la ding kekatamung makatua, at ita ya ing pamagumpisa na ning pamaglakbe da karin. 13#Gen 45:1; Gen 45:16.King kadua rang pamagsaria karin Ehipto pepakilala ya i Jose karing kapatad nang lalaki, at makanyan neng milyaring akilala ning ari ing pamilya nang Jose. 14#Gen 45:9, 10, 17, 18; Gen 46:27.Peparala yang panabilin i Jose kang Jacob a tata na at inagkat ne ampon ing mabilug a pamilya ban lumipat Ehipto; pitu lang pulu't lima katau heganagana. 15#Gen 46:1-7; Gen 49:33.Kanita ya linuslus papunta Ehipto i Jacob, at karin na la ngan mete, ya ampon ding makatua tamu. 16#Gen 23:3-16; 33:19; 50:7-13; Jos 24:32.Kaybat na nita, linipat da la ring karelang bangke karin king Sikem. Kitkut da la king kutkutan a seli nang Abraham king tribu nang Hamor.

17 # Exo 1:7, 8. Inyang milalapit na ing panaun para tuparan na ning Dios ing pengaku na kang Abraham, tutu nang maragul ing bilang na ning kekatamung lahi karin Ehipto. 18Bandang tauli ing metung a ari a e makakilala kang Jose ya ing mig-ari king Ehipto. 19#Exo 1:10, 11; Exo 1:22.Lininlang ne ing kekatamung lahi at meging mabagsik ya karing kekatamung makatua; sapilitan na lang pepayugse lual bale ding bingut dang bayung bait ba lang mate. 20#Exo 2:2.Ketang panaun a ita kanita ne man mibait i Moises; metung yang bingut a tutung makayama.#7:20 kaluguran ne ning Dios. Selikut de kilub ning bale king kekaban da ring atlung bulan, 21#Exo 2:3-10.at inyang liwal de king bale, inampun ne ning prinsesang anak na ning ari at sinese ne antimong sarili nang anak. 22Tiru na kang Moises ing sablang kabiasnan karin Ehipto, at meging mayupaya ya king dapat na at pamagsalita.

23 # Exo 2:11-15. Inyang idad neng apat apulung banua i Moises aisip nang dinalo karing kalahi nang Israelita. 24Ikit neng panasakitan na ning metung a tau Ehipto ing metung karela. Pigmasakit ne ing Israelita at minablas ya king tau Ehipto angga king apate ne. ( 25Inisip na king akilala da ring kalahi na king gagamitan ne ning Dios ba na lang gawan malaya; oneng e ra kilala ing makanyan.) 26Kabukasan, ikit na lang mipapate ding aduang Israelita, at sibukan nang memilatan karela. Nganang miniabi, Kapamu, tau kekayu, e kayu wari mikamag-anak,#7:26 mikapatad. baket mipanasakit kayung makanyan? 27Oneng ita mismung penibatan na ning pamipate tepus ne i Moises, at nganang kinutang keya, Ninu ing minie upaya keka para sakupan mu kami at atulan? 28Pota galang buri mu ku namang paten kalupa na nitang tau Ehipto a pete mu napon? 29#Exo 18:3, 4.Inyang dimdam nang Moises iti meko ya Ehipto, at menuknangan ya king sakup ning Midian. Karin mikayanak yang aduang lalaki.

30 # Exo 3:1-10. Kaybat dang milabas ding apat apulung banua, pepakit ya kang Moises ing metung a anghel libutad ning lablab ning mitataung tanaman keta king disyerto malapit king Bunduk ning Sinai. 31Mipanganga ya i Moises king ikit na, at linapit ya king tanaman ba neng lawen masalese. Oneng dimdam neng migsalita ing Ginu. Ngana, 32Aku ing Dios da ring kekang makatua, ing Dios nang Abraham, Isaac at Jacob. Ginalgal ya king takut i Moises at migtakap yang lupa. 33At ngana ning Ginu, Ilukas mu la ding sandalyas mu, uling sagradung gabun ing lugal a tutukluan mu. 34Miglalawe ku at ikit ku ing mabayat a kasakitan a daralanan na ning kanakung balen karin Ehipto. Dimdam ku ing karelang saingsing at tinipa ku ngeni ban iligtas ku la. Meka keni ngeni, tuburan da ka karin Ehipto.

35 # Exo 2:14. Iti ya ing Moises a tinggian da ring memalen na ning Israel. Ya itang kitnan dang Ninu ing minie upaya keka para sakupan mu kami at atulan? Ya kabud ing tinubud na ning Dios bilang talapanibala at talapagligtas at saup ning anghel a ikit na king mitataung tanaman. 36#Exo 7:3; Exo 14:21; Bilang 14:33.Tinaid na la at liwal Ehipto at dinapat yang milagru at makapagmulalang bage karin at king Dagat a Malutu at king disyerto#7:36 O kaya: ilang. kilub ding apat apulung banua. 37#Deut 18:15, 18.Ya itang Moises a sinabi karing memalen na ning Israel, Itubud ne kekayu ning Dios ing metung a propeta, antimo nung makananu na kung tinubud. Metung yang propetang manibatan mismu karing kekayung kalahi. 38#Exo 19:1—20:17; Deut 5:1-33.Ya naman itang minantabe karing Israelita a mitipun king disyerto; atyu karin kayabe da ring kekatamung makatua, at itang anghel a migsalita keya keta king Bunduk ning Sinai; tinggap na ing mabie nang amanu ning Dios ban ipayabut na angga kekatamu.

39Oneng buri dang e re pemintuan ding kekatamung makatua; tinggian de at buri da pa ing magbalik la karin Ehipto. 40#Exo 32:1.Inya sinabi da kang Aaron, Igawa mu keng dios a manimuna kekami. E mi balu nung nanu na ing milyari kanitang Moises a milual kekatamu king Ehipto. 41#Exo 32:2-6.Kanita na la ginawang metung a idolo a kaubug biserung baka at dininan deng ain-sakripisyu at pigpiestan de at perangalan ing mismung gewa da ring gamat da. 42#Amos 5:25-27.Oneng gilutan na la ning Dios at pepaburen na lang sinamba karing batuin na ning banua, antimo ing makasulat king libru da ring propeta,

Balen Israel! E para kaku

inya pete yu la at inain-sakripisyu

ding animal

king kekaban ding apat apulung

banua keta king disyerto.

43Ing tolda nang Molek a dios-diosan ya itang kekong pisanan,

at ing larawan ning batuin ning idolo yung i Refan;

deti pawa lang dios-diosan a gewa yu ban samban.

Inya ipayugse da kayu lagpus king angganan ning lugal a ausan dang Babilonia.

44 # Exo 25:9, 40. Atyu karing kekatamung makatua keta king disyerto ing Toldang Tipanan ning Dios at ning tau. Megawa ya iting tolda antimo nung makananu nang penabilin ning Dios kang Moises. Miyakma ya ketang padrun a pepakit na ning Dios keya. 45#Jos 3:14-17.Bandang tauli, pisanan de ring makatua tamung migmana kaniti, at pidaladala de kanitang tiki na lang Josue king gabun da ring aliwang bansa a tinabi na ning Dios alang-alang karela. Karin ya menatili ing tolda angga king panaun nang David. 46#2 Sam 7:1-16; 1 Cro 17:1-14.Tinggap nang David ing lugud na ning Dios, inya inawad na king Dios ing paintulutan ne sanang makapagawang bale para king Dios nang Jacob. 47#1 Ari 6:1-38; 2 Cro 3:1-17.Oneng i Solomon ya ing mikalmang pepagawang bale para king Dios.

48Makanyan man, e ya manuknangan ing Kakataskatasan a Dios karing bale a gewa da ring tau; antimo ing sasabian na ning propeta,

49 # Isa 66:1, 2. Ing banua ya ing kakung tronu,

at ing yatu ya ing tumpakan ding bitis ku.

At ngana ning Ginu,

Nanu yang klasing bale ing buri mung gawan para kaku?

Isanu waring lugal a malyari kung pipagpaynawan?

50Ninung ginawa kareting sablang bage?

Aliwa wari ako?

51 # Isa 63:10. Mangasias kayu wari lub; tutu na la waring alang pakiramdam ding pusu yu? Tutu na kayu waring mengaklak ban e yu pansinan ing amanu na ning Dios? Ala kayung keyaliwa karing kekayung makatua; e ye munaman patugutan sasagkan ing Banal a Espiritu! 52Atin waring metung mu mang propeta a e ra mo sa linupig ding kekayung makatua? Pete da la ring tinubud na ning Dios a memahayag kaniting panaun a malambat nang milabas tungkul king paniatang na ning banal nang Talasuyu. At ngeni ikayu ing menganiaya at mekamate keya. 53Ikayu ding mekatanggap king kautusan ning Dios, kautusan a binie da ring anghel. Makanyan man ikayu ding e tinupad kaniting kautusan!

Ing Pangabasibas nang Esteban

54Inyang dimdam da iti ding miembru na ning Konsehu kang Esteban mimua la at mitigis a ipan king kamua ra keya. 55Oneng i Esteban a kitmuan king Banal a Espiritu, tinalanga ya banua at ikit na ing ligaya na ning Dios, at i Jesus a atyu banda nang wanan. 56Nganang sinabi, Lawan yu, akakit keng makabuklat ing banua at makatalakad ya ing Anak ning Tau king banda nang wanan ning Dios!

57Kinulisak lang masikan at tikpan da la ring balugbug da at delusungan de i Esteban. 58keladkad de lual na ning siudad at pemasibas deng batu. Likas da ing imalan da ring testigung menganiaya keya, at pepabante ra king metung a kayanakan a milagyuan Saulo. 59Alang tuknang ing pamamasibas dang batu kang Esteban kabang nganang mamaus king Ginu, Ginung Jesus, tanggapan me ing kanakung kaladua! 60Siniklaud ya at kilisak nang masikan, Ginu, e mu sa ipaparsala karela iti! Mete ya kaybat nang asabi iti.

Currently Selected:

Ding Dapat 7: PmPV

Highlight

Copy