URA TIN AYRA 37
37
YOSEF
Doyra di Yoseffa
1Yakob kal hu mbassa Kanaanda hu li ma bum kak ay huna. 2Ni u dlara kay goryoŋ Yakobma, Yosef basaɗam tew ki doogo yam kiɗisiya ni nam taa yoorina u gorsemma. Nam tuɗ tew tew ni u goryoŋ Bila u Zilpana boyogi suu vi bumma. Yosef mba cuɗ dlara gorsemma laɗ cora ki maŋ bum halaŋ.
3Israel min Yosef su goryom suu hiŋŋa halaŋ, kay nam vuɗummi hu li ma nam mbuɗ ki maana. Nam ɗerem baraw ma tam ndali kolo kolona egemu. 4Gorsemma wi ana bum minim suusi halaŋi ni asi vam ki hurusi gonokka, ka dam boy ma jivi oloɗi.
5Yosef doyra damu, nam cuɗuɗ vunuɗ maŋ gorsemma, asi tlam honira su olo. 6Nam dasi ana, «Humugi vun doyra dan ndaɗta haa. 7Aygi ay ŋgoo hu senena a njun wirisna, ma an njunumma col kolo u sem ɗegee, magina ŋguy yam manna hin cuk kaŋga fokom halaŋ.» 8Gorsemma dam ana, «Aŋ hin kak mulna, ɗowba ti mulla kami su?» Asi mbuɗ lam honira su olo kay vun doyra nam cuɗuɗta u boy ma nam damma.
9Doyra daŋga hin dam olo, nam cuɗuɗ vunuɗ maŋ gorsemma ana, «Faɗta u tilna u ciciwra doogo yam dew goɓ kaŋga fokonu.» 10Nam cuɗuɗ vunuɗ maŋ bum u gorsemma. Bum yalam dam ana, «U doyra daŋ ndaɗta ni ana mege? Ni anu, suŋ, u gorseŋŋa ami mba goɓ kaŋga fokoŋu na su?» 11Gorsemma hurusi mbuɗ ki yowmusna egem may, bum humum ka maa kay boy nammaɗi.#Sun. 7.9
Gorseŋ Yosefna gusum kiyo
12Gorseŋ Yosefna tuɗ Sekem a taa yoori suu vi busina. 13Israel di Yosef ana, «Gorseŋŋa ha taa yoorina ni hu Sekembi su? Mbay an sunuŋ ha egesiya.» Yosef hoŋ dira ana, «An wanni.» 14Israel dam ana, «Tuɗ gol gorseŋŋa u yoorina ay com, asi ka jivi su? Aŋ hoŋ ay dan boy namma.» Nam sunum ay na ni nam ay ni hu ɦuɗugumba Hebronda. Yosef hin tuɗ Sekem ni na gaw.
15Sana fam nam viɗ ki ŋgoo duk usuna, nam joɓom ana, «Aŋ hal mege?» 16Yosef hoŋ dam ana, «An halni gorsenna, dan ay gige asi ka taa yoori masisina ni arage?» 17Sana dam ana, «Asi tuɗ wa, an hum asi ɓak tasi ana, tuɗuygi hu Dotan.»
Yosef cuɗ u gorsemma tuɗ fasi hu Dotan. 18Asi wam nam tuɗ ay na day bay tew egesi tu may ni ɓak tasi ana, cam kiyo. 19Asi ɓak tasi ana, «Sa ma doyra dam ɦayna ka tuɗ aya. 20Mbaagi ay caygina kiyo, goloŋga basira ca ni gaygina ki hu taa dew. Aygi hin tuɗ di vo ana, vabakŋa vam komom ki wa. Doy mamba li hin li ni ana me kala ni aygi hin wi tuwa.»
21Ruben hum boy namma na ni, suɗum ki kosiya nam di ana, «Caygina kiɗi.» 22Ruben dasi ana, «Vooygi busu kiɗi, gaygina ki hu goloŋga ki bagi wanda, ŋgeneygi koygi egembi.» Nam halni ana nam suɗum ki kosi hoŋom maŋ bumu.
23Hu li ma Yosef mba egesina may ni, asi vam fokom baraw mamma tam ndali kolo kolo cuki tamma kiyo. 24Asi vam gam ki hu goloŋga, goloŋ ndaɗta yo ka huɗi, huruɗ ki ni ɦawaa. 25Ŋgoo dagan asi lak kaŋga a ti tlena.
Gol irisiya ni suu Ismaelna tuɗ ay u jamballa na girkilik ay ii ma Galaadna na. Tlesuu asi yowosi ay kay jamballa a paarana ni tlesuu li mbul ma hisna u komona u daɓaŋga may, asi tuɗ tlesuu asina ni Egipte. 26Yuda di gorsemma ana, «Va ma ay fam u cira ci wayaygina ŋgayam busuɗum kira ni mege? 27Mbay gusuygina ki ko suu Ismaelna caygina kiɗi, kay nammi wayaygina, ni tliwiygiya.» Gorsemma vi boy namma.
28Hu li ma suu paa suu Madiyanna mba jak egesi may ni, asi tli Yosef ay ki hu goloŋga gusum ki kosi sili dok-mba'. Suu paara tuɗ u nam Egipte.#Sun. 7.9 29Ruben hoŋ ay mba gol hu goloŋga na ni, fi Yosef ka huɗi, nam haa baraw mamma tamma kiyo. 30Tuɗ ha eg gorsemma di ana, «Goona ka hu goloŋgaɗi, an tuɗ vi konni arage?»
31Asi vi ɦu dew, ŋgaɗamu, yow baraw ma vi Yosef ma kolo kolona cukum duk busu ɦuna. 32Asi sun baraw ma ndali kolo kolona maŋ busi dam ha ana, «Gola ni dlara ami faɗta, barawna ni ma vi goroŋŋa ɗowba ɦawa su?» 33Yakob wi barawna wini di ana, «Ni baraw ma vi goronnana, vabak ma co komom ki ni komiya. Yosef kini powi daŋ may.» 34Nam haa baraw mamma tamma kiyo, njun baraw bolna hurumu. Nam buu coco a li hahaw goromara. 35Goryom suu njufiina u suu boyogina halaŋ mbay egem a ɗilim irimba ni nam ka minɗi. Nam di ana, «An tew eg goronna hu lina vi suu miɗina ni u tiina.» Nam tuɗ fok u tiina.
36Suu Madiyanna tuɗ gus Yosef ki ko Potifar ma ŋgol asgaana vi Farawna hu Egipte.
Currently Selected:
URA TIN AYRA 37: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
