Mwanduso 11

Lingo da Babeli

1Umwaka wanhu wa zisi zose wakala na ulonzi umwe muhala na walonga mbuli zimwe muhala. 2Wanhu viwagendile kulawa ulawilo wa zua, wafika bawe da Shinali, wakala. 3Wailongela, “Izoni! Chitende matafali chiyasome moto vinogile.” Wakala na matafali badala ya mabwe, na tulasi badala ya ulongo. 4Maabaho walonga, “Lelo chiizengele bululu jetu na lingo dizafika mbaka kuulanga, muladi zina jetu dimanyike ng'hani na sekechiimwage muna iisi.”

5Mbali Mndewa Mulungu kahumuluka na kudiwona bululu na lingo dodikalile dizengigwa na wanhu. 6Na Mndewa Mulungu kalonga, “Lola wanhu wano wose ni wamwe na wolonga ulonzi umwe, uno ni mwanduso wa sang'hano yawo. Lelo wezadaha kutenda chinhu chochose chiwoilungila. 7Leka chihumuluke na kutibula ulonzi wawo muladi sekewaitegeleze.” 8Ivo Mndewa Mulungu kawapwililisa muna iisi yose, nawo waleka kuzenga dibululu. 9Lekamana bululu ijo ditangigwa Babeli, kwaviya Mndewa Mulungu katibula ulonzi wa isi yose, na kulawa uko Mndewa Mulungu kawapwililisa wanhu mwiisi yose.

Welesi wa Shemu

10Uno uwo ludongo lwa welesi wa Shemu. Shemu viyakalile na miyaka gana kamweleka Alifakisadi, iyo ikala miyaka midi vidimalile digombo. 11Shemu viyamweleke Alifakisadi kakala miyaka magana matano, na keleka wana wamwenga wa chilume na wa chike.

12Alifakisadi viyakalile na miyaka malongo matatu na mitano, kamweleka Shela. 13Alifakisadi viyamweleke Shela, kakala miyaka magana mane na mitatu, na keleka wana wamwenga wa chilume na wa chike.

14Shela viyakalile na miyaka malongo matatu, kamweleka Ebeli. 15Shela viyamweleke Ebeli kakala miyaka magana mane na mitatu, na keleka wana wamwenga wa chilume na wa chike.

16Ebeli viyakalile na miyaka malongo matatu na mine kamweleka Pelegi. 17Ebeli viyamweleke Pelegi kakala miyaka magana mane na malongo matatu, na keleka wana wamwenga wa chilume na wa chike.

18Pelegi viyakalile na miyaka malongo matatu, kamweleka Lewu. 19Pelegi viyamweleke Lewu kakala miyaka magana maidi na kenda, na keleka wana wamwenga wa chilume na wa chike.

20Lewu viyakalile na miyaka malongo matatu na midi kamweleka Selugi. 21Lewu viyamweleke Selugi kakala miyaka magana maidi na saba, na keleka wana wamwenga wa chilume na wa chike.

22Selugi viyakalile na miyaka malongo matatu, kamweleka Naholi. 23Selugi viyamweleke Naholi kakala miyaka magana maidi, na keleka wana wamwenga wa chilume na wa chike.

24Naholi viyakalile na miyaka malongo maidi na kenda kamweleka Tela. 25Naholi viyamweleke Tela kakala miyaka gana na longo na kenda, na keleka wana wamwenga wa chilume na wa chike.

26Tela viyakalile na miyaka malongo saba kaweleka Abulamu na Naholi na Halani.

Welesi wa Tela

27Uno niuwo welesi wa Tela. Tela kaweleka Abulamu na Naholi na Halani. Nayo Halani kamweleka Lutu. 28Halani kadanganika Ulu kuna iisi ya Wakalidayo kuyavumbukile chipindi Tela tati yake yang'hali kokala uko. 29Abulamu na Naholi wasola wake. Muke wa Abulamu katangigwa Salayi na muke wa Naholi katangigwa Milika, mndele wa Halani. Halani iviya niiyo tati yawo Milika na Isika. 30Mbali Salayi kakala kabule wana kwaviya kakala mgumba.

31Tela kamsola Abulamu mwanage, na Lutu mzukulu wake yoyelekigwe mwanage Halani, na Salayi muke wake Abulamu, na wasegela wose hamwe kulawa Ulu, bululu da Wakalidayo, kuhita kuna iisi ya Kanaani. Viwafikile Halani wakala uko. 32Tela viyakalile na miyaka magana maidi na mitano, kadanganika uko Halani.

Currently Selected:

Mwanduso 11: Ching'hwele

Highlight

Copy