Mark 11

Kolomong-Auli 11-16 Yesos Mindili Nomba Kolupa Kene, Lomburupa Ola Molupa Mulú-Koleana Kelepa Purum Temanele

11:1-11 Yi Nuim King Te Kolea Tenga Suku Pumba Purum Kene Tiring Mele Yesos Jerusallem Sukundu Pumba Purum Kene Aku-Siku Tiring Temanele

1[Yesos kene yu lumbili andúlima kene] enini kolea-auli Jerusallem nondupa oku, ma-pangi te ‘Ma-Pangi Unji-Ollip Punie’ nili akuna kolea-kelú tale, Betepas kene Betani kene akuselenga uring. Kanu-kene Yesos-ni yu lumbili anduli yi tale liipa mundupa, 2elselendu nimba mele: “Ne kolea-kelú kanukumbele akuna pukulu kene kung-dongki walú te, yambu te yunga bulu-mingina ui wale te kepe naa molku anduringele ka teku panjingéle nena sukundu molumba kanunglí, akili puku posukulu yandu meku wangli pale. 3Pusinglí tekulu mulunglí kene yambu te-ni elsendu “Akili nambimuna tekembeleye?” nim lem else-ni i-siku niangli: “Auliele yunu-ni ‘Kung-dongkele mipili.’ nimu-na ombu liikimbulu. Yunu dongki-walále alsupa nondupa yandu liipa mundumba.” niale.” nimba elsele liipa mundurum.

4Liipa mundurum yisele pukulu, kung-dongki walú te, lku-keri-puluna ka teku panjiringele kanukulu kene kung kanili puku posiku liiringli. Aku-siku tinglí tiringli kanuku kene 5akuna muluring yambu mare-ni elselendu “Kung-dongki walále nambimuna posukimbiliye?” niku walsiring kene 6elsele-ni, Yesos-ni ‘i-siku i-siku niale.’ nirim mele niringli kene “Kapula, [dongki-walále] meku pale.” niring.

7Kanu-kene elsele-ni kung-dongki walále Yesos mulurumna meku okulu kene, elsengla mulumbalema posukulu, dongkeliinga bulu-mingina ola pauwa tunjuringli kene Yesos kanuna ola mulurum. 8Yambu pulele-ni eninga mulumbalema posuku yu ombá kupulanum-na pauwa tolsiliiku puku, mare-ni unji-yala puniena puku yala-gomú languku liiku yu ombá kupulanum-na pauwa tolsiliiku puring. 9Kumbi-leku puring yambuma-ni kepe aeleku puring yambuma-ni kepe unji ambululiiku puku kene niku mele:

“‘Yunga bili ola mulupili.’ niamili.

‘Pulu Yi Yawe-ni liipa mundurum-na

yunga kongunale tenjimba okum yili

molupa kunjupili!’ Konana 118:25-26

10Oliunga anda-kolepa yi nuim king Depit[-ni

kalupa liirim yili]

yi nuim king molumba tekem yili

Pulu Yili-ni tepa konjupa

‘Yunu tondulu pupili.’ nipili.

Mulú-koleana ola yunga bili ola pípili!”

nilsiliiku puring.

11Kanu-kene Yesos Jerusallem sukundu pupa kene Pulu Yili popu toku kaluring lku-tembolluna sukundu pupa akuna [teku muluring uluma] pali kanurum, akiliinga-pe kolea kalá turum kilia kanupa kene [‘Isili-ui ulu te naa teambu.’ nimba] yu lumbili anduli yi rurepu kene [Jerusallem] ulsukundu puku, kolea-kelú Betani [pingí] puring.

11:12-14,20-26 Yesos-ni Unji-Pik Te Ung-Mura Sirim Kene Kulurum Temanele

12Ipulam-ui [Jerusallem nondupa lirim] kolea-kelú Betani munduku kelku kene [kelku Jerusallem pungí puring kene] Yesos yunu engle turum. 13Kanu-kene unji-pik te gomú tepa angiliirimele sulu tepa kanupa kene ‘Mong te túmunje.’ nimba nondupa pupa kanurum akiliinga-pe, pik-mong tuli kaliimbele ui wendu naa urumeliinga unji-mong te topa naa pirim, gomú mindi tirim kanurum. 14[Gomú mindi tirim-na] kanupa kene “Nu alsukunu yambuma-ni nungí mong te naa tani!” nirim. Aku nirimele yu lumbili andúlima-ni piliiring.

11:(11,) 15-18 Lku-Tembolluna Méle Taropu Toku Ku-Moni Liiku Muluring Yima Yesos-ni Topa Makururum Temanele

15Jerusallem kamu uring kene Yesos yunu Pulu Yili popu toku kaluring lku-tembolluna [“Juda-yambu naa molemele yambuma ‘Pulu Yili popu tamili.’ niku máku tolemele kolea” niring akuna] suku pupa kanupa kene akuna mélema maket teku muluring yambuma kene, mélema taropu toku liiku muluring yambuma kene, akuma kanupa kene enini pali topa makurupa, ku-moni lupa-lupama koki teku anju siring yambumanga poluma kene, kera-waembonu maket teku mania muluring poluma kene, topa kongndupa bulu-bale sipa kene, 16yambumandu nimba mele: “Yambuma méle maket kolea tenga tingí pungíndu lku-temboll palana naa pai. [Bulkundu anwali teku pai.]” nirim.

17Enini mani sipa kene nimba mele: “Pulu Yili-nga bukna ung te i-sipa nilimú:

‘Yambuma-ni nanga lkulindu

“Koleamanga pali yambu-talapema-ni

Pulu Yili-kene popu topu ung nilimulu lkuli.” ningí.’

ung kanili eni naa piliilimiliye? Asaya 56:7

Ung aku-sipa molemú akiliinga-pe eni lku ili

‘wa nolemele yambuma mo toku molemele lkuli’

mele niku piliiku kene aku-siku telemele.” nirim. Jeremaya 7:11

18Yesos-ni akili nirim-na piliiku kene Pulu Yili popu tunjuring yi-aulima kene, Pulu Yili-nga ung-manimanga puluma piliiku ung-bo tunjuring yima kene, enini yu toku kunjingí kupulanum te kururing. We-yambuma yu-ni mani sipa ung-bo tunjurum mele piliiku kene mini-wale munduring-na kanuku kene Juda-yambumanga yi-auli kanuma-ni yu-kene mundu-mong tenjiku yu toku kunjingí kupulanum te kururing.

19Penga ipinjali, kolea kalá tomba tirim kene kolea-auli [Jerusallem] ulsukundu pupa [tenga-lupa pemba purum].

11:20-26 (ilinga 11:12-14 kanui)

20Ipulele-ui, [unji-pik angiliirim koleana] oku puku kene unji-pik kanili kamu pulu pali kulurum kanuring. 21Aku-sipa tirim mele Pita-ni kanupa kene [Yesos-ni unjelendu bonongukundu nirim akili] kelepa piliipa kene yunundu nimba mele: “Rapai, kána! Unji-pik ili nu-ni [bonongu] ung-mura sinu unji kanili [walsekale] kulum.” nirim.

22Yesos-ni pundu topa nimba mele: “Pulu Yili-ni nanga ungele sika piliimba[liinga nimbú mele ‘Aima sika wendu ombá.’ niku] tondulu munduku piliai. 23Na-ni eni aima sika nimbu siker: “Yambu te-ni ‘na-ni nimbú mele aima sika wendu ombá.’ nimba numanu tale tepa naa pípili ne ma-pangielendu “Ungú tokunu numú-kusana sukundu pui!” nimbá kene yunu nimbá mele aima sika wendu ombá.” niker. 24Akiliinga eni i-sipu nimbu sambu: “‘Oliu [Pulu Yili-ni aima sika liipa tapunjumbaliinga ‘Teamili.’ nimulú mele sika kapula aku-sipu temulú.’ mola ‘Nimulú kene sika aku-sipa wendu ombá.’ niku] tondulu munduku piliiku kene Pulu Yili-kene popu toku ung niku mawa tingí mele pali Pulu Yili-ni sika tenjimbaliinga ulu kanuma sika wendu ombá.” niker.” nirim.

25“‘Ulu-pulu-kis tímuluma oliunga Lapa mulú-koleana molemále-ni ‘We mania pupili, kanupu konde tenjambu.’ nipili.’ niku, [Pulu Yili] yunu-kene popu toku ung niku angiliiku kene yambuma-ni eni teku kis-singéliinga numanu kis panjiku mulungí uluma ‘We mania pupili. Kanupu konde tenjamili.’ niangiko. 26(Akiliinga-pe yambuma-ni eni teku kis-singí uluma ‘We mania pupili.’ niku kanuku konde naa tinjíng lem eninga Lapa mulú-koleana molemále-ni kepe eni ulu-pulu-kis tingíma ‘Mania pupili.’ naa-ko nimba kanupa konde naa-ko tenjimba.)” nirim.

11:27-33 Yesos Namba Sirimeliinga Tombulku Niring Temanele

27Jerusallem alsuku uring kene Yesos yunu lku-temboll lku-suku andurum kene yi mare, Pulu Yili popu tunjuring yi-aulima kene, Pulu Yili-nga ung-manimanga puluma piliiku ung-bo tunjuring yima kene, Juda-yambumanga tápu-yima kene, 28enini oku yunu walsiku piliiku kene niku mele: “Nu namba nambulka nambale liikunu kene kongun ili telluye? Nae-ni kongun ili ‘Ti-pui.’ nimba nu nambale sipa liipa mundurumye?” niring.

29Yesos-ni eninindu pundu topa nimba mele: “Na-ni eni ung te walsipu piliambuko. Pe na-ni eni walsimbu mele eni na sumbi-siku pundu toku níngi lem ‘Na kongun ili teambu.’ nimba namba sirimeliinga pulele eni nimbu simbuko. 30[Na-ni i-sipu eni walsiker:] Ui [No-Liinjili] Jon omba yambuma no liinjirim kene yunu mulú-koleana [molemú yilinga] kongunale tenjimbandu yambuma no liinjirim mola ya mana-yambumanga kongunale tenjimbandu yambuma no liinjirimuye? [Nae-ni “Ti.” nirim-na tirimuye?] Niku sai.” nirim.

31[Yu-ni aku-sipa walsurum mele piliiku kene] eni-enini tombulku kene niku mele: “Yu-ni walsikim mele oliu-ni pundu topu, ‘[Jon] yunu mulú-koleana [molemú yilinga kongunale tenjimbandu yambuma no liinjirim].’ nímulu lem yu-ni oliundu nimba mele: ‘Aku lem eni Jon-ni nirim ungele nambimuna ‘Ung ili sika.’ niku naa piliiku liiringiye?’ nimbá. 32Mola oliu-ni nimbu mele: ‘Yu mana-yambumanga [kongunale tenjimbandu yambuma no liinjirim].’ nímulu lem “We-yambuma-ni oliu tungínje.” niku aku-siku ningíndu mundu-mong tiring. We-yambuma-ni ‘[No-Liinjili] Jon yu aima sika Pulu Yili-ni “Ninjui!” nimba, nimba sirimu ungma piliipa yambuma nimba sirim yi te mulurum.’ niku piliilimili akiliinga oliu nambi-temulúnje?” niku enini aku-siku tombulku niring.

33[Eni-enini aku-siku anju-yandu tombulku niku kene], Yesos-ndu pundu toku niku mele: “[Nu-ni walsikenu mele] oliu naa piliikumulu.” niring.

Aku-siku niring-na piliipa kene Yesos-ni eninindu nimba mele: “Kapula. [Na-ni eni walsiker ungeliinga ung te pundu toku naa nikimilieliinga] eni na walsikimili ungeliinga ung te pundu topu, nandu kongun ili ‘Ti-pui.’ nimba na liipa mundupa namba sirim yilinga bili eni naa nimbu simbuko.” nirim.

Currently Selected:

Mark 11: mux

Highlight

Copy